လိက်ပရေင်လညာတ်၊ ယက္ခဂုမ္ဘဏ်

“ဗီုလဵုရောရဲ အကာဲအရာပရေင်ဍုင်ကွာန် ဗီုလဵုဒှ် မေန်အံင်လှာင်တံ ပလေဝ်ပလေတ်တိုန် ပရေင်ပေါဲရုဲမာဲယျတှ်ေ ဗော်ညဳသၟဟ်မန်လေဝ် က္လင်ကေတ်ရမျာင်တှ်ေ ချဳတိုန်ညိညိရ။ ဗီုလဵုရဲ ဗီုလဵုချပ်လဝ်နွံ ပံက်စသြိုဟ်ညိကီုလေဝ် ပိုဲက္လင်တုဲ သ္ဂောံကဵုဝေင်ကသပ်ကီုလေဝ်” ရမျာင်ဏံ တိတ်ကၠုင် နူဝိုင်တက်ကျာ ဇျှေင်ကဝ်ဖဳမွဲဒၞါဲရ။ “အဝ်ရဲ အဲစိုတ်ပြေ ဍောင်ၜိုတ်အာကဵု ပရေင်ဍုင်ကွာန်မန်တံရ။ ရဲတံဟွံဂွံကၠောန်လဝ်ဏီတှ်ေ အလန်ဏံ ရဲတံလုပ်ကၠောန်ညိ။ အဲဘိုင်ကဵုဒြဟတ်ဏောင်လေဝ်” “ဟာရဲမွဲပၠန်လေဝ် ပိုဲရဲပရေင်ဍုင်ကွာန်ဟွံသေင်လေဝ် ရဲတံရ ကေင်ကၠောန် ပိုဲညးကွာန်တံ မုဟွံဆေင်ကဵုပရေင်ဍုင်ကွာန်ပုဟ်လေဝ်ရဲ” ညးချူလိက်ဂွံမိင်ကေတ် ရမျာင်ညးတံတုဲ ဒှ်ချူကၠုင်လိက်ပရေင်လညာတ်ဝွံရ။

 မၞိဟ်ဗွဲမဂၠိုင်ဂှ် ဟွံဆေင်ကဵုပရေင်ဍုင်ကွာန်တုဲ မၞိဟ်လုပ်လဝ်ဗော်ပရေင်ဍုင်ကွာန်တံဟေင် ဆေင်စပ်ဒၟံင်ကဵုပရေင်ဍုင်ကွာန်ရောင် သာ်ဏံ ဒုင်ဂိုင်လဝ်အိုတ်ရ။ ပရေင်ဍုင်ကွာန်ဟီုဂှ် ဇၟာပ်ပ်မၞိဟ် ဆေင်စပ်ဒၟံင်ကဵုပရေင်ဍုင်ကွာန်ရောင်။ အတိုင်ဂလာန်ပရေင်ဍုင်ကွာန်မဟီုဂှ် ပိုဲမၞိဟ်တံ ထေက်ကဵုသ္ဒးကၠိုဟ် သ္ဒးတီလဝ်ထေက်ရောင်။ သအာင်အာနူကဵုရဲလုပ်ကၠောန်ဒၟံင် ပ္ဍဲဗော်ပရေင်ဍုင်ကွာန်တုဲ ဗွဲတၟေင် မၞိဟ်မစုက်လုက်ဒၟံင်ကဵု ကမၠောန်ပရေင်မၞိဟ်တံကီု၊ မၞိဟ်ဆက်စပ် မစုက်လုပ်ဒၟံင်ကဵုဂကူတံကီု ၜိုန်ရဟွံဂွံလုပ်ကၠောန်လဝ် ပ္ဍဲကမၠောန်ဗော်ပရေင်ဍုင်ကွာန်ကီုလေဝ် ပရေင်ဍုင်ကွာန်ဂှ် တီဒၟံင်မၞိဟ်တံဂှ်ရ။ မၞိဟ်တံဂှ်လေဝ် သ္ဒးတီလဝ် အရာပရေင်ဍုင်ကွာန်တံဂှ်ကီုရောင်။

မုဟိုတ်ရောမ္ဂး? ပရေင်ဍုင်ကွာန်ဟီုဂှ် သၠဲလးတဴဗွဲမလောန်သၟးဟွံက ဇြိုဟ်နက်တုဲ ဍိုန်လေဝ် ဍိုန်ၜတ်တဴဗွဲမလောန်ကွေံရ။ ပရေင်ဍုင်ကွာန်ဂှ် ကာလတက်ကျာဟီုဂး ညံင်ကဵုလောဲလောဲရကီုလေဝ် ကာလစုက်ကၠုင်ကၞေင် စုက်ကၠုင်က္ၜံင် စုက်ကၠုင်သြိုဟ်ရဟီုမ္ဂး ဗီုဇကုကၠိုဟ်ကေတ်လဝ် လ္တူပရေင်ဍုင်ကွာန်ဂှ် ကာလသ္ဒးကၠောန်မ္ဂး တၞဟ်ခြာစလေပ်တဴရ။ ပရေင်ဍုင်ကွာန်ဟီုဂှ် ပြယာဲ မာယာ စၞုက်စၞာဲဂၠိုင်တဴဗွဲမလောန်ရ။ ပရေင်ဍုင်ကွာန်ဟီုဂှ် ဗှ်ကေတ်ပ္ဍဲလိက်အုပ်သၟးဂှ် ဟွံရုမ်ဂပ်ရ။ ပရေင်ဍုင်ကွာန်ဟီုဂှ် သ္ပပတံနူပရေင်ဒဒှ် ဝင်နူအတိက်တေံ မ္ဒးချပ်လဝ် မ္ဒးလ္ၚတ်လဝ် မ္ဒးတီလဝ်ရ။

ဟိုတ်ဂှ်ရ ဝင်ဟီုဂှ် ပ္ဍဲပရေင်ဍုင်ကွာန် ဟွံမွဲဟွံတုဲ ဒှ်ပရောပရာဘာသာ မွဲဘာသာရ။ ဒုင်သဇိုင်ကဵု ဝင်အတိက် မကတဵုဒှ်ကၠုင်လဝ် ပြသၞာ ပဋိပက္ခတံဂှ် ပံင်ပစပ်ကဵုသဘဴဓဝ်တုဲ မ္ဒးဂၠာဲသွဟ် သှ်က္လးကၠေံရ။ ဟိုတ်ဂှ်ရ ပ္ဍဲပရေင်ဍုင်ကွာန်ဂှ် ၜိုန်ရဂွံဗှ်လဝ်ပ္ဍဲလိက်ကီုလေဝ် ဒဒှ်ပရေင်ကမၠောန် နွံသာ်လဵုဂှ် သ္ဒးကၠိုဟ်တီလဝ်ကီုရောင်။ သ္ဂောံတီကၠိုဟ်ကေတ်မာန်ဂှ် သ္ဒးကေင်ဗက်လ္ၚတ်လဝ် ပရေင်ဍုင်ကွာန်လၟိုန်မှ ဂၠာဲပၞော်တိတ်ဒးရ။ ပၞော်ဂၠံင်တရဴဗၠးၜး ပရေင်ဍုင်ကွာန် ကောန်ဂကူဇကု ဂၠံင်လဵုသ္ဂောံတိတ်ဂှ် တီကေတ်မာန်ရ။

ဆၜိုတ်ဏံဓဝ်လေဝ် ရုမ်ဂပ်ဟွံသေင်ရ။ ပံင်ပစပ်နကဵု နဇိုင်နတဲ ညံင်သ္ဂောံမာန်ဂှ်လေဝ် ပၟိက်ဇၞော်တဴရ။ ပရေင်ဍုင်ကွာန်ဟီုဗက်ဂှ် ဂၠံင်တရဴပရေင်ဍုင်ကွာန်ရပ်လွဟ်လေဝ်နွံ၊ ဂၠံင်တရဴ ပရေင်ဍုင်ကွာန် နကဵုဗော်ပရေင်ဍုင်ကွာန်လေဝ်နွံ၊ ဂၠံင်တရဴပရေင်ဍုင်ကွာန် အာနကဵုဂကောံမၞိဟ် ဣဏံလေဝ်နွံရ။ ဆဂှ်ဟွံကဏီ ဒုင်သဇိုင်ကဵုလၟေင်ကမၠောန်တံဂှ်တုဲ တင်ဒုင်ဂိုင်ကေတ် ပ္ဍဲဇကုဇကု ဗီုလဵုနွံ၊ ပ္ဍဲကဵုတင်ဒုင်ဂိုင်ကေတ်ဂှ်လေဝ် ဒုင်သဇိုင်ကဵုသဘဴဓဝ်လဵုရော? ဒုင်သဇိုင်ကဵုလညာတ် သဘဴဓဝ်ကမ်မျူနေတ်ဟာ? ဒုင်သဇိုင်ကဵုလညာတ် သဘဴဓဝ်လေတ်ပရေယ်ဒဳမဵုကရေဇြဳဟာ? ဒုင်သဇိုင်ကဵုလညာတ် သဘဴဓဝ်ဇြိုဝ်ယှေဝ်လေတ်ဟာ? ။ တုဲပၠန် ပိုဲတံကၠောန်သွက်ဂကူပိုဲသၟးဟာ? သာ်ဂှ်ဟွံသေင်မ္ဂး ပိုဲကၠောန်သွက်ကောန်ဂကူ အလုံကၟိန်ဍုင်ဟာ? နွံဂၠိုင်ကဵုသာ်ရ။

ပိုဲကၠောန်သွက်ကောန်ဂကူ အလုံကၟိန်ဍုင်ရောင်မ္ဂး ဂကူပိုဲ ကဵုညးဍုင်ကွာန်ပိုဲ ပိုဲစွံသဘဴဓဝ် ပရေင်ဍုင်ကွာန်လဵုရော? ဂကူပိုဲဂှ် ပိုဲတံစွံဒၟံင်အဆံင်ပရေင်ဍုင်ကွာန် အဆံင်လဵုရော? ပိုဲတံသ္ဒးချပ်ဒးရ။ လက်ကရဴပရေင်ဍုင်ကွာန် ကောန်ဂကူ အလုံကၟိန်ဍုင်ဂှ် ကသပ်ဂၞန်မၞုံကဵုလညာတ်ဉာဏ်ပညာ ညံင်သ္ဂောံနွံဂှ် ပၟိက်ဇၞော်တဴဗွဲမလောန်ရ။

ဟိုတ်ဂှ်ရ ဇကုက္ဍိုက်ပ် ကၠောန်ပရေင်ဍုင်ကွာန် သွက်ဂကူဇကု သွက်မၞိဟ်သၟတ်ဇကုမ္ဂး ပ္ဍဲဂကူဇကုဂှ် မုပြသၞာကတဵုဒှ်ဒၟံင်ရော၊ ဆဵုဂဗဇီုကပိုက်ဒၟံင်ကဵုပြသၞာမုရော၊ ဇကုပါ်ပါဲသ္ဒးမာန်တုဲ ပြသၞာလဵု သ္ဒးသောင်က္လးကၠာ၊ ပြသၞာလဵု သ္ဒးသောင်လက်ကရဴရောဂှ် သ္ဒးပြုပြေင်ပါ်ပါဲဒးရောင်။ ဒှ်ပြသၞာပရေင်ကောန်ဂကူမ္ဂး သ္ဒးသောင်သာ်လဵု? ဒှ်ပြသၞာပရေင်ကောန်ဂကူ အလုံကၟိန်ဍုင်မ္ဂး သ္ဒးသောင်က္လးနဲကဲသာ်လဵု? မပတံသာ်ဏံ စိစောန်မှ စရာဲကမၠောန်ပရေင်ဍုင်ကွာန်ဇကု တောတက်တိုန်မာန်ရ။

ပြသၞာတံဏံ ဂွံသောင်က္လးမာန်၊ ဂွံပါ်ပါဲမာန်ဂှ် အပ္ဍဲဇကုဇကု လညာတ်သဘဴဓဝ် ပရေင်ဍုင်ကွာန်ဇကု ခိုင်င်ဗိုန်န် ကၠးကၠးဖ္ဍးဖ္ဍး သ္ဒးနွံလဝ်ရောင်။ မုဟိုတ်ရောမ္ဂး ဇၟာပ်လညာတ် သဘဴဓဝ်ပရေင်ဍုင်ကွာန်ဂှ် အဆံင်ၚုဟ်မးဍေံကဵုဍေံ နွံတဴအိုတ်ရ။ လ္တူအဆံင်ၚုဟ်မးဍေံဂှ် ဇကုဇကုစွံပတန်ဒၞါဲဍေံဒၞါဲဍေံ ဒးၜိုတ်လဵုရော? သ္ဂောံစွံအဆံင်ဒၞါဲဍေံဒး သ္ဂောံရှ်ေသှ်ေဒ္ဂေတ်ဗက်ဒးဂှ် ၜိုတ်လဵုဇကုကၠိုဟ်လဝ်ရောဂှ် ပၟိက်ဇၞော်တဴဗွဲမလောန်ရောင်။ ပရေင်ဍုင်ကွာန်ဟီုဂှ် ကၠောန်ဆၜိုတ်မိပ် ကၠောန်ဆၜိုတ်စပုင်စှ်ေရတုဲ ကၠောန်ပရေင်ဍုင်ကွာန်မ္ဂး ဂုဏ်သိက္ခာ ပရေင်ဍုင်ကွာန်ဂကူဇကု သဝ်စှ်ေအာရ။ သိက္ခာပရေင်ဍုင်ကွာန်ဇကုဂွံသၠုင်ဂှ် သဘဴဓဝ်ပရေင်ဍုင်ကွာန်ဇကုသ္ဒးသၠုင်တုဲ သ္ဒးခိုင်ဗိုန် သ္ဒးဗိုန်ဇၟအ်တဴရောင်။

ဒုင်သဇိုင်ကဵုဂလာန်ဝိုင်တက်ကျာ နူၛေင်ကဝ်ဖဳမွဲဒၞါဲဂှ်တုဲ ၜိုန်ရဒှ်ချူကၠုင်လိက်ဝွံကီုလေဝ် ဗီုချူလဝ် ပ္ဍဲလိက်ပရေင်ဏံ ဟွံဂွံသောင်က္လးကျာကဵုညးတံရ။ ဆ္ဂး လ္တူဂလာန်ညးတံကျာမံင်ညးသ္ကံဂှ် အဲဂွံဟီုဏာသာ်ဝွံရ။ “ပရေင်ဍုင်ကွာန်ဟီုဂှ် မုရောမ္ဂး ပရေင်ကိစ္စအရာရာအိုဿီု မၞုံဒၟံင်ပ္ဍဲမၞိဟ်တံဂှ် ပရေင်ဍုင်ကွာန်ဖအိုတ်ရ။ ပိုဲတံ စိုတ်ဟွံလုပ်စကဵုပရေင်ဍုင်ကွာန်ပုဟ်၊ ပိုဲတံ ဟွံတီပရေင်ဍုင်ကွန်ပုဟ်၊ ပိုဲတီဆ ပိုဲဂွံစမွဲဗုင်ရ။ ပိုဲကၠောန်ဂွံမှ ပိုဲဂွံစ၊ ပရေင်ဍုင်ကွာန်ဟီုဂှ် အန္တရာဲနွံမံင် ပိုဲဖေက်မံင် ပိုဲဟွံကၠောန်ပုဟ်၊ ၜိုန်ရရဲတံ လဝ်စိုတ်သာ်ဏံကီုလေဝ် ပရေင်ဍုင်ကွာန်ဂှ် ပရေံကီု ခိုဟ်ကီုဂှ် ရဲတံပါဲဟွံဗၠးတုဲ လၟုဟ်ဗီုဒးစိုတ်ဂှ် ဟွံဂွံမံင်၊ ဟွံဂွံအာ၊ ဟွံဂွံဟီုဂှ် ပရေင်ဍုင်ကွာန်ဂှ် ဆက်စပ်မံင်ကဵုရဲတံရဂှ် ကဵုသ္ဂောံကၠးညိ” သာ်ဝွံ ဟီုဏာကဵုညးတံရောင်။