သွက်ဂွံဗပေင်လဝ်ဩန် ဒၞာဲလိင်မၞိဟ်သ္ပကောန်ပၞာန်ဗၟာစၞးအရာပ်-ကွာန်ဂှ် ဂကောံအုပ်ဓုပ်အရာပ်-ကွာန်လ္ၚဵု မ္ဒးကၠတ်ဗ ပေင်စုတ်လဝ်ဩန် သွာင်ပရဟိတကွာန်နွံမံင်ရောင် ညးလုပ်ဂကောံအုပ်ဓုပ်ကွာန် ဒေသဍုင်မန်မွဲတၠ ဟီုလဴ ထ္ၜးရ။
သွက်စရိတ်ဒးလိင်စုတ်မၞိဟ်စၞး သ္ပကောန်ပၞာန် ပ္ဍဲအရာပ် ပ္ဍဲကွာန်တအ်ဂှ် ဂွံဗက်ဩန်ပ္ဍဲညးဍုင်ကွာန်ပၠန်လေဝ် ဖေက်မံက်ပြာကတ်အာဂှ်ရ ပညဳပညပ်ကဵု ညးဇၞော်အရာပ် ကွာန်တအ်တုဲ ကၠတ်ဗပေင်စုတ်မံင် ဩန်သွာင်ပရဟိတကွာန်ရောင် ညးလုပ်ဂကောံအုပ်ဓုပ်ကွာန်ဂှ် ဟီုထ္ၜးသာ်ဝွံရ။
“ဒေသပိုဲဏံဂှ် ကြပ်မံင်ကဵု ရဲပၠန်ဂတးတအ် ချဳဒရာင်မံင်တုဲတှ်ေ ဂွံဗက်ဩန်ပ္ဍဲသ္ၚိညးဍုင်ကွာန်တအ်လေဝ်ဂှ် ဖေက်မံက် ပြာကတ်အာ ဖေက်ဒှ်အန္တရာဲ၊ ဇှ်ရ ဩန်ပ္ဍဲကွာန်ဂှ်ဟွံဗက်တုဲ ဩန်သွာင်ပရဟိတ ဂကောံချိုတ်ဂျိုင်ပ္ဍဲကွာန်ဂှ်ရ ပညဳ ကေတ်လဝ်ဓဝ်ပလိုဟ်ကဵု လေံကျာ် ကဵု မိမညးဇၞော်အရာပ် ကွာန်တအ်တုဲတှ်ေ ကၠတ်သုင်စောဲမံင်ဩန်ဂှ်နွံ” သာ်ဝွံ ညးဟီုရ။
ဩန်လိင်စုတ်မၞိဟ်စၞး သ္ပကောန်ပၞာန်ဂှ် နူကဵုညးတာလျိုင်ကံင်သဳပၞာန်တအ် ဇၟာပ်ကေတ်ကောန်ပၞာန်ပ္ဍဲကွာန်ဂှ်မ္ဂး မွဲအ လန်မ္ဂး အောန်အိုတ် ၃၀ ကိုဋ် ဒဵုကဵု ၄၀ ကိုဋ်ဂှ် ဒးကေတ်သုင်စောဲမံင် ဩန်သွာင်ပရဟိတ ပ္ဍဲကွာန်ဂှ်နွံ မၞိဟ်ဂှ်ဆက်လဴ ကဵုရ။
“ဍေံကေတ်လၟေင်ဂိတုဟွံသေင် ၜါဂိတုမွဲဝါ ဘာပၞာန်ဍေံပံက်တှ်ေ ဍေံဒးကေတ်ကောန်ပၞာန် နူကဵုညးတာလျိုင်ဍေံ ကေတ်ကၠုင်အဆက်တှ်ေ စၞးဂှ် ကောန်ကွာန်ဇကုညံင်ဟွံဂွံဒးအာဂှ်တှ်ေ လိင်စုတ်မၞိဟ်စၞး၊ မွဲမွဲအလန်တှ်ေ အောန်အိုတ် ၃၀ ကိုဋ် ၄၀ ကိုဋ် ပတိတ်မံင်ဩန်နူကဵု သွာင်ပရဟိတဂှ် မိင်မံင်ဂှ် လၟေင်ဂတဏံတှ်ေ ဂလိုင်ဂှ်ဂှ် ဟွံရုမ်ရ ဒးလိင်မၞိဟ် က္ဍင်တိုန် မိင်မံင် ၅၀ ကိုဋ်ဒှ်အာဟာ ဟွံတီ” ညးဆက်ဟီုရ။
သွက်ဂွံလိင်စုတ်မၞိဟ်စၞး သ္ပကောန်ပၞာန်(ဗၟာ)ဂှ် ပွိုင်ဍုင်ဗွဲမဂၠိုင်ဂှ် သကိုပ်အုပ်ဓုပ်ကွာန် အရာပ်တအ် ဗက်ကံက်ကေတ် ဒၟံင် ပ္ဍဲညးဍုင်ကွာန်တအ်နွံတုဲ သကိုပ်အုပ်ဓုပ်ကွာန်ဂှ် ဒှ်ဂဝိင်ကဵုပရေင်ဂီုကၠီုတုဲ ဟွံဂံင်ဩန်ပ္ဍဲညးဍုင်ကွာန်တအ် မွဲသာ် နဲကဲညးကဵုညး ဗပေင်စုတ်ဒၟံင်ဩန် သွက်ဂွံလိင်စုတ်မၞိဟ်သ္ပကောန်ပၞာန်(ဗၟာ)ဂှ်ရ။
သကိုပ်အုပ်ဓုပ်ကွာန်ဗွဲမဂၠိုင်ဂှ်ဗက်ကံက်ကေတ်ဒၟံင်ပ္ဍဲညးဍုင်ကွာန်တအ် မွဲဂိတု ၅၀၀၀ နွံ ၁၀၀၀၀ လက်နွံတုဲ သကိုပ် အုပ်ဓုပ်ကွာန်လ္ၚဵုဟွံဗက်ကံက်ကေတ်ဩန်ပ္ဍဲညးဍုင်ကွာန်တအ်ဂှ် ဂၠံက်သုင်စောဲဩန်ကေင်ကာကွာန် အရာပ်နွံ၊ ပံက် ဝိုင်ဝေင်ၛင်လံင်ဩန်တုဲ ဗပေင်စုတ်လဝ်နွံ၊ ဂွံလဝ်ဩန်သွံရာန်တိကၠအ်တုဲ ဗပေင်စုတ်လဝ်နွံ ဗီုညးကဵုညး ဒးဗပေင်ကဵု ဒၟံင် ဩန်သွက်ဂွံလိင်စုတ်မၞိဟ်စၞး သ္ပကောန်ပၞာန်(ဗၟာ)အကာဲအရာညးကဵုညးအိုတ်ရောင် ဂွံတီကေတ်ရ။
