ဗြဲဇၞော်ဂူဆက်ဒၟံင်တုဲ ဝါဗ္ၚတိဂၠိုန်(တိသဝ်သဝ်)လ္ၚဵုဂှ် ဍာ်ဗၠိုက်လအ်လတုဲ ဒးဂွိင်ကဵုတၞံသြောံချိုတ်ရောင် တၠဝါလ္ၚဵု ဒှ်ဂဝိင်ရ။
လၟုဟ်မ္ဂး ဗြဲဂူဇၞော်တရိုပ်ဒၟံင်လံကဵုသတ္တာဟဒှ်တုဲ ဝါဗ္ၚတိဂၠိုန်(တိသဝ်သဝ်)တံဂှ် ဗၠိုက်ဒၟံင်လံကဵုသတ္တာဟတုဲ ယဝ်ဗြဲဇၞော် ဆက်ပၠန်မ္ဂး သြောံချိုတ်အိုတ်ရောင် တၠဝါဍုင်ကၟာဝက်မွဲတၠ ဟီုသာ်ဝွံရ။
“ဗြဲဇၞော်ဂူဆက်လံမံင် တိဂၠိုန်(တိသဝ်သဝ်)တံဂှ် ဗၠိုက်မံင်လံဂွံၜိုတ်မွဲသတ္တာဟဒှ်ရ၊ မံက်မွဲလစုတ် ဗၠိုက်မွဲလစုတ် ဗြဲဇၞော်ဂူမံင်ဖိုဟ် ယဝ်ဆက်ဂူတရိုပ်ဆက်ပၠန်တှ်ေ ဖေက်သြောံချိုတ်အိုတ်” နာဲဗမိုင် ဟီုရ။
အခိင်ဗြဲဂူဇၞော်လၟုဟ်ဏံဂှ် တိဂၠိုန်(တိသဝ်သဝ်)လ္ၚဵုဂှ် ဆဂွံဗတံလဝ်တုဲတုဲ အဃောတၞံသြောံယာ(ၚုဟ်)တိုန်ခိုဟ်ဂှ် ဟိုတ်နူဗြဲဇၞော်ဂူတရိုပ်ဒၟံင်ဆက်ဆက်ဂှ်တုဲ တိခံက်လ္ၚဵုဗၠိုက်မံင်လံကဵုသတ္တာဟဒှ်ရ။
အတိုင်နူဌာနဗြဲကျာတံတော်ဆလဝ်ဂှ်မ္ဂး ဗြဲကျာသွက်ဂွံဆက်ဂူတရိုပ်မံင်ဏီတုဲ ခံက်ဝါတိဂၠိုန်(တိသဝ်သဝ်)ဂမၠိုင် သွက်ဒးဆက်ဗၠိုက်အာနွံဂှ်တုဲ တၠဝါတံဒှ်မင်ဂဝိင်အိုတ်ရ။
“အခိင်တံသၞာံဗြဲစဂူဂှ် ရဲကၠောန်ဗ္ၚတံ ဒးဗီုပိက်၊ အခိင်ဗတံမဏံရ ဗတံလေဝ်တုဲ ဗြဲလေဝ်ဂူဇၞော်ဆက်ဆက်ဟဂှ်၊ ယဝ်ဆက်ဂူဇၞော်အာပၠန်တှ်ေ ဂွံရတ်မံင်သြောံညိဏီဟာ” တၠဝါတၞဟ်မွဲတၠပၠန်ဂှ် ဟီုရ။
ဝါဗ္ၚတိဂၠိုန်(တိသဝ်သဝ်)ဍုင်မန်မွဲဒမြိပ်ဂှ်မ္ဂး မွဲကာလဗြဲဇၞော်ဂူဏံဂှ် ဗၠိုက်မွဲလစုတ် မံက်မွဲလစုတ်ဒှ်ဒၟံင်တုဲ ယဝ်ရ ဗြဲဇၞော် ဆက်ဂူကၠုင်ပၠန်မ္ဂး တိခံက်ဗၠိုက်တ္ၚဲလံတံဂှ် သြောံသွက်ဂွံချိုတ်ကှ်အာနွံရောင်ဂှ်လေဝ် တၠဝါဗ္ၚတံ ဟီုရ။
ဗြဲကသီုသၞာံဏံဂှ် နူစအခိင်ဗြဲစဂူဂှ် ဒဵုကဵုတ္ၚဲဏံ ဂူဒၟံင်ဆက်ဆက်ဂှ်တုဲ သြောံဝါကီု၊ တၞံထ္ၜိုတ်တဵုဖျေံ လဝ်တၟိကီု၊ တၞံသတ် ဆု မပ္တံကဵု တၞံဒူရေန်တဵုဖျေံလဝ်တၟိကီုတံဂှ် တၞးပြဟ်သရိုဟ်ဂၠိုင်တုဲ ဒးဂွိင်ကဵု သွက်ဂွံချိုတ်ရောင် တၠကၠအ်တံဟီုထ္ၜး ဂွံ တီကေတ်ရ။
