သၟတ်ကွးဘာဗွဲမဂၠိုၚ် အခိၚ်နွံဒၟံၚ်ပ္ဍဲသ္ၚိဂှ် ကဵုအခိၚ် အခိၚ်ဗှ်လိက်အောန်တုဲ ကဵုအခိၚ်ဝေၚ် (Game) ဂၠိုၚ်ဂှ်ရ ဒှ်ဒၟံၚ်တၚ်ကော်ဆဴဇၞော်ဇၞော် သွက်ဘဝသၟတ်ကွးဘာတအ် အနာဂတ်မွဲရောၚ် မိမဗွဲမဂၠိုၚ် ဟီုကရောတ်တဴအိုတ်ရ။
တ္ၚဲကၟာတ်ဘာကီု၊ အခိၚ်စှ်ေနူဘာကီုဂှ် သၟတ်ကွးဘာဗွဲမဂၠိုၚ် စွံအာရီုကဵု ပရေၚ်ဗှ်လိက်အောန်တုဲ ကဵုအခိၚ်ပရေၚ်ဝေၚ် (Game) ဂၠိုၚ်၊ မိမလေဝ်ဟီုဟွံမာန်အိုတ်ရောၚ် မိမကွးဘာ တန်လဒေါဝ်မွဲတၠ ဟီုရ။
“ဒးကဵုအခေတ်ဖုၚ်ဏံ ကောန်ပိုဲမွဲဓဝ်ဟွံသေၚ်ရ၊ အတိုၚ်အရာပ်ရ တ္ၚဲကၟာတ်ဘာကီု၊ အခိၚ်စှ်ေနူဘာတုဲကီု ဍေံပကောံကေတ် ရဲတုပ်ကဵုဍေံတအ်တုဲတှ်ေ ပကောံညးသ္ကအ် ဝေၚ် (Game) ဖုၚ်၊ မိမဟီုလေဝ် ဟွံကေတ်အိုတ်ပုဟ်၊ လအ်အာ ဝါတ်အာ၊ ဒှ်မံၚ်တၚ်ကော်ဆဴကဵု ဘဝဍေံတအ် အနာဂတ်ဇၞော်ဇၞော်” သာ်ဝွံ မိမကွးဘာ နူပွိုၚ်ဍုၚ်ဇြပ်ဗု နာဲတာန်ဆုၚ် ဟီုရ။
သၟတ်ကွးဘာတအ်ဂှ် ပ္ဍဲကဵုဘာဗ္တောန်လိက်လေဝ် ညံၚ်ဟွံဂွံကေတ်ဏာဖုၚ်ဂှ် အ္စာဘာတအ် ၜိုန်ရပ္တိတ်လဝ်စေဝ်ပၞောန်နွံကီုလေဝ် အခိၚ်အ္စာဟွံမွဲမ္ဂး ကၠတ်ပ္တိတ်ဖုၚ်တုဲ ကၠတ်ဝေၚ်မံၚ် (Game) ဖုၚ်လေဝ်နွံရောၚ် ကွးဘာတန်သၠုၚ်မွဲတၠ ဟီုပၠန်ရ။
“ပ္ဍဲဘာတှ်ေ မွဲလေဝ်ကေတ်ဏာဖုၚ်ဟွံဂွံပုဟ်၊ ဆဵုဒးဖုၚ်တှ်ေ အ္စာတအ် ညးသီထောံဏောၚ် ပ္တိတ်လဝ်စေဝ်ပၞောန်နွံမံၚ်ရရ၊ ဆဂးတှ်ေ ကွးဘာလ္ၚဵုဂှ် ကၠတ်ကေတ်ဏာဂှ်ရ၊ အခိၚ်အ္စာဟွံမွဲတှ်ေ ကၠတ်ဆက်ဖုၚ် ပရေၚ်ဝုတ်ဗၠာဲလေဝ်နွံ၊ ကၠတ်ဝေၚ် (Game) ဖုၚ်လေဝ်နွံ၊ အခေတ်ဖုၚ်ဏံ သၟတ်ကွးဘာတအ် လီုလာ်ဟွံသာပုဟ်၊ ဝေတ်ဟီုလေဝ်ဟွံမာန်ပုဟ်” သာ်ဝွံ အ္စာဘာကောန်ဂကူမန် နူပွိုၚ်ဍုၚ်မုဟ်ဍုၚ်မွဲတၠဂှ် ဟီုရ။
အခိၚ်ကွတ်စက်ဂတာပ်ခေတ် မပ္တံကဵု ဖုၚ်၊ ကမ်ပျူတာ၊ အေန်တာနေက် သၠဲလး တောတက်မံၚ်တ္ၚဲဏံဂှ် ဇၟာပ်သၟတ်၊ ကောန်ၚာ် ရပ်ဖုၚ်လေပ်တအ် ဝေၚ် (Game) ဖုၚ် လေပ်မံၚ်ဖအိုတ်တုဲ ဇီုကပိုက်ကၠုၚ်ကဵု ပရေၚ်ကတ်ပညာသဇိုၚ်ရ။
သၟတ်ကွးဘာ ဘာတန်အလဵုအသဳကီု၊ သၟတ်ကွးဘာ ပ္ဍဲဘာကောန်ဂကူကီုဂှ် ဗွဲမဂၠိုၚ်ဂှ် ရပ်သုၚ်စောဲဖုၚ်တုဲ ကဵုအခိၚ်ဝေၚ် (Game) ဖုၚ်ကီု၊ ဝေၚ်သဵုယှေဝ်မဳဒဳယာနာနာကီု ဂၠိုၚ်တဴရ။
သၟတ်ကောန်ၚာ်လ္ၚဵုဂှ် စောဲလာမ်ဝေၚ် (Game) ဖုၚ် ၜက်သၞောတ်တုဲ အခိၚ်ကတ်ပညာ အောန်စှ်ေကၠုၚ်၊ ဒ္ဂေတ်လၟေတ် လီုလာ်ကၠုၚ် နွံဂၠိုၚ်ဒၟံၚ်ရောၚ် ဂွံတီကေတ်ရ။
