သၟတ်လ္ၚဵု ဒုင်ဖအိုတ်ဩန်တုဲ ရုန်ဂစာန်ကၠုင် ပရေင်ဩန်လုပ် နူကဵုသဵုယှေဝ်မဳဒဳယာ (Social media) ဂၠိုင်တိုန်ကၠုင်ရောင် သၟတ်ညး မဂစာန်ရေင်တၠုင်ဒၟံင်မွဲတၠ ဟီုလဴထ္ၜးရ။
သဵုယှေဝ်မဳဒဳယာ (Social media) မပ္တံကဵု ယူဂျု YouTube ကီု၊ တေတ်တံက် TikTok ကီု၊ ဝှေတ်ဗော် Facebook ကီု သွက်သ္ဂောံဂွံ ပရိသာတ် (follow) ဂၠိုင်ဂၠိုင်မာန်ဂှ် ဩန်ဂွံလုပ်ဂးတုဲ ပ္အပ်ကၠုင်ကဵု တၠကွတ်ဘိုင်ရေင်တၠုင်တအ် နကဵု ဗၞတ်ဗ္ၜတ် ၚုဟ်မး နွံကၠုင်ရ။
“သၟတ်ရဲစိုတ်လုပ်စလ္ၚဵုဂှ်တှ်ေ ဂစာန်မံင် လ္ပာ်တေတ်တံက် TikTokနွံ၊ မၞိဟ်လ္ၚဵုဂှ်တှ်ေ ဂစာန်မံင် သီုၜါဗီု သီုပိဗီုနွံ၊ ဗီုညး ကဵုညးရ၊ ဂွံဂွံ follow ပေင် ၁ ဠက်တှ်ေ ဩန်လုပ်ရ ဂးလဝ်ဟဂှ်၊ ဆဂးတှ်ေ ဗီုဂွံပ္တိုန်တအ်၊ ဗီုဂွံဒုင်တဲဩန်တအ်၊ ဍေံ နွံ ကဆံင်တၟာဂလိုင်ဏီ ဗီုဒးကဵုဂှ်တှ်ေ မွဲကဵုမွဲ ဟွံတုပ်ပုဟ်၊ လ္ၚဵုဂှ်တှ်ေ အကြာ ၁၀ ကိုဋ် ၁၅ ကိုဋ်နွံ ဗီုညး ဗီုညးရ” သာ်ဝွံ သၟတ် ဂစာန်မံင် သွာင် တေတ်တံက် TikTok လတူဍုင်မတ်မလီုမွဲတၠ ဟီုထ္ၜးရ။
ပ္ဍဲကဵုသၟတ်ရုန်ဂစာန်ဒၟံင် သွက်ဂွံဂွံဩန် နူသဵုယှေဝ်မဳဒဳယာဗွဲမဂၠိုင်ဂှ် ဂွံအံင်ဇၞးအာအတိုင်နူကဵု သဵုယှေဝ်မဳဒဳယာတအ် ဗၞတ်ဗ္ၜတ်လဝ်ဩန်ဂွံလုပ်ဂှ် နွံအောန်ကွေံကွေံတုဲ မၞိဟ်ပူဂဵုဒယှ်ပြာကတ်ကဏ္ဍမွဲမွဲသာ်လ္ၚဵုဂှ်ဟေင် ဒှ်ကမၠောန်နွံကီုရ။
အခေါင်အရာ ရုန်ဂစာန် သွက်ဂွံဂွံဩန်နူကဵု သဵုယှေဝ်မဳဒဳယာဂှ် သၟတ်လ္ၚဵုဂှ် တိုန်ကတ်လ္ၚတ်ဒၟံင်လတူဍုင်မတ်မလီုနွံ၊ သၟတ်လ္ၚဵုဂှ် တိုန်ကတ်လ္ၚတ်ဒၟံင်လတူဍုင်လဂုင်လေဝ် နွံဗွဲမဂၠိုင်ရ။
အပါသၟတ်ညးမရုန်ဂစာန်ဒၟံင် မွဲတၠဂှ်- “ဍေံတအ်ဂစာန်မံင်သ္ဇက်ဟီုဟွံမွဲရ ဗီုဍေံဟီုဂှ်တှ်ေ စဳဇန်တက်မံင်ပရေင် ဇာတ်တေံ ပရေင်ဇာတ်ဏံဂှ်နွံ၊ မုဟွံလအ်တှ်ေ သွက်ဂွံပတိုန်လတူသဵုယှေဝ်မဳဒဳယာ ဂးလဝ်ဟဂှ်၊ ပတိုန်တုဲ မၞိဟ်လုပ်ဗဵုဂၠိုင်တှ်ေ ဂွံပရိသာတ်ဂလိုင်လဵုတှ်ေ ဩန်စလုပ်ရ မုရ ဍေံဟီုမံင်ကီုရ၊ ဆဂး ဩန်နူသ္ၚိဏံဂှ်တှ်ေ မွဲဂိတု ၃ ကိုဋ် ၄ ကိုဋ် ဒးပြင်ပတိုန်ကဵုမံင် ဟွံသာလးလး ဩန်အိုတ်အာ ဟွံအောန်ရ ဩန်နူဍေံဂွံဂွံဂှ် မုလေဝ် ဟွံဆဵုဏီ” သာ်ဝွံ အပါသၟတ်ရုန်ဂစာန်ဒၟံင် ပ္ဍဲလ္ဂုင်ဂှ် ဟီုရ။
ပရေင်ဩန်လုပ်နူကဵု သဵုယှေဝ်မဳဒဳယာဂှ် ပူဂဵု ဇြေဝ်လဳ Cele ဒယှ်တှ် လ္ၚဵုတအ်ကီု၊ ပူဂဵုတက်ပရေင်ကဏ္ဍနာနာ ဒယှ်ပြာကတ် လ္ၚဵုတအ်ကီု၊ သၟာဒယှ်ေဒွက်လ္ၚဵုတအ်ကီု၊ တၠကွတ်တက်ကၠောန်ပ္တိုန် ရုပ် Video ကွတ်နာနာတအ်ကီု ဩန်လုပ်မံင် ဗီုညး ကဵုညး နွံကၠုင်ဂှ်တုဲ သၟတ်လ္ၚဵု စိုတ်လုပ်စကဵု ပရေင်ဩန်လုပ်နူကဵု သဵုယှေဝ်မဳဒဳယာဂှ် နွံဂၠိုင်တိုန်ကၠုင်ရောင် ဂွံတီကေတ်ရ။
