ဟိုတ်နူဗဒှ်ပလာပ်ပထုဲကဵု ပရေင်တန်ကြန် ၜိုဟ်သြိုဟ် ပ္ဍဲကၟိန်ဍုင် ကေုာံ လ္တူညးဍုင်ကွာန်တအ်ဂးတုဲ ဗော်သွးကောန်ဂကူကရေင် KNU ဂှ် စၟတ်သမ္တီထောံ နဒဒှ်ဂကောံဟွံလုပ်သၞောဝ်မွဲရောင် နူကဏေံတေံ (အဝ်ဂေတ် ၂၈) ဂှ် ဌာနဝန်ဇၞော်ပရေင်အပ္ဍဲဍုင် ဂကောံကမ္မယှေန်ပၞာန်တအ် လလောင်တြးကၠုင်ရ။

တုပ်သာ်ဂှ်ကီု ဟိုတ်နူပန်ဗ္တိုက် ပလီုပလာ်ကၠေံလဝ် ဒဒန်ဆက်စၠောံ၊ ကပေါတ်ကြိယာ၊ စက်ယာဥ်၊ စမြိုင်ကၟိန်ဍုင်မပိုင်ပြဳလဝ်ဂမၠိုင်ဂးတုဲ KNU ဂှ် စၟတ်သမ္တီထောံ နဒဒှ်ဂကောံပကီုပရာပ်မွဲရောင် နူကဵုဂကောံဗ္တိုက်သရိုဟ် ပြဝပကီုပရာပ်ဗဟဵု ကမ္မယှေန်ပၞာန်တအ် ထပ်လလောင်ပ္တိတ်လဝ် ပ္ဍဲတ္ရဲအဝ်ဂေတ် ၂၈ ဂှ်ပၠန်ရ။

ဗော်သွးကောန်ဂကူကရေင် KNU ဝွံ ပ္ဍဲသၞာံ ၂၀၁၈ ဂှ် ပါလုပ်ထ္ပက်လဝ်စၟတ်တဲ ပ္ဍဲလိက်ကသုက်တုပ်စိုတ်ဒေါံပန်ပှော်အလုံဍုင် NCA ကၠာလေဝ် ကာလဒပ်ပၞာန်ဗၟာ သီအဝဵု သၞာံ ၂၀၂၁ ဂှ် လိက်ကသုက် NCA ကီု သီုသၞောဝ်ဥပဒေ ၂၀၀၈ တအ် စကာဟွံဂွံ လီုအာဣရဂးတုဲ ကလေင်ဒစဵုဒစး လုပ်ပေါဲဗ္တိုက်ရပ်လွဟ်ကဵု ဒပ်ပၞာန်ဗၟာ စဵုတ္ရဲဏအ်ရ။

ဆက်စပ်ကဵုဒပ်ပၞာန်ဗၟာတအ် ပ္တိတ်လလောင်ကၠုင် နဒဒှ်ဂကောံဟွံလုပ်သၞောဝ်၊ ဂကောံပကီုပရာပ် နူကဏေံတေံဂှ်တုဲ “ဟွံဒှ်အမ်သဝ်ပုဟ်” ညးမၞုံအခေါင်ဟီုဂး ပဒိုဝ်သဝ်တဝ်ဏဳ ဟီုဂးလဝ်ကဵုဌာန်ပရိုင်တအ်ရ။

“ညးဂှ် ဒှ်ဂကောံပကီုပရာပ်ဇေတ်တ်ရောဂှ် ညးဍုင်ကွာန်တအ် တီမံင်တုဲတုဲရ၊ ကိစ္စဏအ်ဂှ် တၟေင်ဟွံမွဲ၊ ဆဂး နွံမွဲရ၊ ပထောံပိုယ် ဂကောံဟွံလုပ်သၞောဝ်ဂးတုဲ ညးဍုင်ကွာန်တအ် ညံင်ဂွိုအ်ဆက်ဆောံကဵုပိုယ်ဂှ် ဍေံတအ် (ဒပ်ပၞာန်ဗၟာ) ဖန်ဇန်ကၠုင်ရ” သာ်ဝွံ ညးဆက်ဟီုလဝ်ရ။

မွဲလ္ပာ်ဂှ် ဟိုတ်နူဒပ်ပၞာန်ဗၟာတအ် လလောင်ကၠုင် လ္တူ KNU သာ်ဂှ်တုဲ ပ္ဍဲသ္ကုတ်သၠုင်ကျာဍုင်ဗၟာ (ကရေင်၊ မန်၊ ရးတၞင်သဳ) တအ်ဂှ် အသိင်ပေါဲပၞာန် သွက်ဂွံထတ်ကာတ်ဂၠိုင်တိုန်နွံရောင် ခါတ်အကာဲလဝ်အိုတ်ရ။

စပ္တံနူကဏေံတေံ (အဝ်ဂေတ် ၂၈) လေဝ် ကရောင်ပၞာန် ဒပ်ပၞာန်ဗၟာတအ် ဇက်တိတ်အာ နူဍုင်ဖါအင် ဗပေင်ဇြဟတ် လ္ပာ်ကအ်ကြိက်တေံနွံရောင် ဂွံတီကေတ်ရ။

“KNU ဂှ် ဍေံပထောံဂကောံဟွံလုပ်သၞောဝ် (မတရားအသင်း) တှ်ေ ရဲဆက်ကဵု KNU တှ်ေ ဍေံတအ် (ဒပ်ပၞာန်ဗၟာ) ကေတ်အရေဝ် ရပ်စပ်ဂွံမာန်၊ တုဲတှ်ေ သ္ကုတ်သၠုင်ကျာပိုယ်ဏအ် ပေါဲပၞာန်ဘဂွံကာတ်တိုန်နွံမာန်” သာ်ဏအ် ညးလ္ရတ်ပရေင်ဍုင်ကွာန်မွဲတၠ ဟီုရ။

နူမလောန်ကၠုင်သၞာံ ၂၀၂၄ ဂိတုသေပ်တေမ်ဗါ စၟတ်တ္ရဲ ၂ တေံဂှ်လေဝ် ဒပ်ပၞာန်ကဝ်က (MNDAA)၊ ဒပ်ပၞာန်တအင်ပလံင် (TNLA) ကေုာံ ဒပ်ပၞာန်ရခေင် (AA) တအ်ဂှ်  ဒပ်ပၞာန်ဗၟာတအ် လလောင်ပ္တိတ်လဝ် နဒဒှ်ဂကောံပကီုပရာပ်ကီုရ။