ပ္ဍဲအခိၚ်လိုက်ဝှ်ဏံ ဟိုတ်နူဗြဲဟွံအိုတ်ဏီတုဲ ဂွံခွါတ်ထ္ၜိုတ်လဇုဲမံၚ်ကီု၊ ၚုဟ်ထ္ၜိုတ်သဝ်စှ်ေမံၚ် နူသၞာံတုဲကၠုၚ်တေံကီုဂှ်ရ အကာဲအရာ တၠကၠအ်ထ္ၜိုတ်တအ် ဟွံခိုဟ်ရောၚ် တၠကၠအ်ထ္ၜိုတ်တအ် ဟီုရ။

ဇၟာပ်စိုပ်အခိၚ်လိုက်ဝှ်ဏံမ္ဂး ဒှ်အခိၚ်ခွါတ်ထ္ၜိုတ်ကီုလေဝ် သၞာံဏံဂှ် ဟိုတ်နူဗြဲဂၠိၚ်တုဲ တၠကၠအ်ထ္ၜိုတ်တအ် ဟွံဂွံခွါတ်ဏီဂှ်မွဲသာ်၊ ၚုဟ်ထၜိုတ်ပံက်မံၚ်တ္ၚဲဏံဂှ်လေဝ် သဝ်မံၚ်ဂှ်မွဲသာ်ကီုတုဲ သွက်တၠကၠအ်ထ္ၜိုတ်တအ် အကာဲအရာ ပရေံမံၚ်ရောၚ် တၠ ကၠအ်ထ္ၜိုတ် နာဲသဝ်ယျဳ နူဍုၚ်ဇြပ်ဗု ဟီုရ။

“အရိုဟ်ဟ်သၞာံ အခိၚ်ဏံတှ်ေ ဂွံမံၚ်ထ္ၜိုတ်ယျ၊ ဝှ်သၞာံဏံဂှ် ဗြဲဂူဇၞော်မံၚ်ဖိုဟ်၊ တုဲမွဲသာ်ပၠန်ဂှ် ၚုဟ်ထ္ၜိုတ်ပံက်မံၚ်လၟုဟ်ဂှ် ဗက်ၚုဟ်သၞာံတုဲကၠုၚ်တေံ ဟွံဂွံပုဟ်၊ သၞာံတုဲကၠုၚ်တေံမှ မွဲပံၚ် (၃၀၀၀) ပြၚ်မံၚ်ဂှ် လၟုဟ် နွံသၟဝ် (၃၀၀၀) တှ်ေ ကဵုၚုဟ်ဖျာလၟုဟ်ကဵု သၞာံတုဲကၠုၚ်တေံ ဟွံတုပ်၊ သွက်တၠအ်ထ္ၜိုတ်တအ် အကာဲအရာပရေံမံၚ်” သာ်ဝွံ ညးဟီုရ။

ၚုဟ်ထ္ၜိုတ်ပံက်မံၚ်တ္ၚဲဏံဂှ် ထၜိုတ် (မှိုၚ်း ၃) Local-3 ဂှ် ၚုဟ်နွံအကြာ (၂၈၀၀) တုဲ ဍာ်ထၜိုတ်ဂှ် ရဲရာန်တအ်ရာန်မံၚ် မွဲပံၚ် အကြာ (၂၇၀၀) ဒ္ကေဝ်ရ။ ထၜိုတ် RSS – 1 ဂှ် ၚုဟ်ပံက်မံၚ် အကြာ (၃၀၀၀) ဒ္ကေဝ်ပြၚ်ပြၚ်ရ။

တၟော်ကဵုၚုဟ်ကပေါတ်ဖျာ သၞာံတုဲကၠုၚ်တေံမ္ဂး ၚုဟ်ထၜိုတ်ဂှ် ဒးဗက်ဗွဝ်ဖျာတုဲ ၚုဟ်ဒးသၠုၚ်နူသၞာံတုဲကၠုၚ်တေံဏီရောၚ် တၠကၠအ်ထ္ၜိုတ်တအ် စၟဳလဝ်ရ။

“ၚုဟ်ထၜိုတ်သၞာံတုဲကၠုၚ်တေံ မွဲပံၚ် အကြာ (၃၀၀၀) ဂှ် ၚုဟ်ထဝ်မွဲဒ္ကေဝ် နွံအကြာ (၆၀) ကိုဋ်ရ၊ ၚုဟ်ထဝ်သၞာံဏံ ကြပ်ဒှ်အာ (၈၀) ကိုဋ်ရလေဝ်၊ ၚုဟ်ထ္ၜိုတ်ဂှ် နွံသဝ်နူၚုဟ်သၞာံတုဲကၠုၚ်တေံဏီတှ်ေ ဒှ်ဟွံထေက်၊ ဍာံဍာံတေံဂှ် ၚုဟ်ဒးသၠုၚ်နူ သၞာံတုဲကၠုၚ်တေံဏီ” သာ်ဝွံ တၠကၠအ်ထ္ၜိုတ်မွဲတၠလေဝ်ဒှ် တၠကမၠောန်ဆေၚ်သွံရာန်ထ္ၜိုတ်မွဲတၠလေဝ်ဒှ် နာဲထောန် နူမုဟ်ဍုၚ်ဂှ် ဟီုရ။

ပ္ဍဲတွဵုရးဍုၚ်မန်ဂှ် ကၠအ်ထ္ၜိုတ် (၅) ကိုဋ်ဨကနွံတုဲ အပ္ဍဲဂှ်မ္ဂး ပွိုၚ်ဍုၚ်မုဟ်ဍုၚ်ကဵု ပွိုၚ်ဍုၚ်ဇြပ်ဗုသၟးဂှ် (၅) လက်ဨကပြၚ်နွံရ။ တော်ကဵုအလုံမွဲကၟိန်ဍုၚ်ဗၟာမ္ဂး ကၠအ်ထ္ၜိုတ်ပ္ဍဲဍုၚ်မန် နွံ (၃၇.၆ %) ဂှ် ဒှ်လၟိဟ်ဂၠိုၚ်အိုတ်ရောၚ် ဂွံတီကေတ်ရ။