တၠကမၠောန်ရုၚ်ဂဒဵုထၜိုတ်ဍုၚ်မန်ဗွဲမဂၠိုၚ်ဂှ် ပြံၚ်ကၠောံကၠုၚ် ရုၚ်ကၠောန်ထၜိုတ်ဂတှ်ေ အဆံၚ်သၠုၚ်နွံဂၠိုၚ်ကၠုၚ်ကွေံကွေံရောၚ် တၠကမၠောန်ထၜိုတ်နူမုဟ်ဍုၚ်မွဲတၠ ဟီုထ္ၜးရ။

သၞာံတုဲတုဲကၠုၚ်တေံမ္ဂး တၠကမၠောန်သွံရာန်ထၜိုတ်တအ်ဂှ် ရာန်ထၜိုတ်ဂတှ်ေတုဲ ပံက်ကၠုၚ်ရုၚ်ဂဒဵုထၜိုတ်၊ သွံရာန်ထၜိုတ်ဂတှ်ေ ဂၠိုၚ်ရ။

လၟုဟ်မ္ဂး နူကဵုရုၚ်ကမၠောန်ဂဒဵုထၜိုတ်ဂှ် တၠကမၠောန်ပံက်လဝ်ရုၚ်ထၜိုတ်ဗွဲမဂၠိုၚ်တအ် ပြံၚ်ကၠောံကၠောန်ကၠုၚ် ရုၚ်ကမၠောန်ကၠောန်ထၜိုတ်ဂတှ်ေ အဆံၚ်သၠုၚ်သၠုၚ် နွံဂၠိုၚ်ကၠုၚ်မံၚ်ရောၚ် တၠကမၠောန်ရုၚ်ထၜိုတ် နူမုဟ်ဍုၚ်မွဲတၠ ဟီုသာ်ဝွံရ။

“စနူသၞာံတုဲကၠုၚ်တေံရ ရဲသွံရာန်ထၜိုတ်ဂတှ်ေ (မှိုၚ်း) ဂဒဵုဂှ် အောန်စှ်ေကၠုၚ်၊ သၞာံဏံဟီုတှ်ေ တၠကမၠောန်ရုၚ်ထၜိုတ်ဗွဲမဂၠိုၚ်ဂှ် ပြံၚ်သၠာဲကၠောန်ကၠုၚ် ရုၚ်ကၠောန်ထၜိုတ်ဂတှ်ေ အဆံၚ်မုက်ဂၞန် (၁) နွံဂၠိုၚ်” သာ်ဝွံ ညးဟီုရ။

ထၜိုတ်ဂဒဵုစိန်စိန်ဂှ် ၚုဟ်ဟွံခိုဟ်နူကဵု ထၜိုတ်ဂတှ်ေအဆံၚ်သၠုၚ် မုက်ဂၞန် (၁) ဂှ်တုဲ ပရဲပရၚ်ပၠန်လေဝ် ထၜိုတ်ဂတှ်ေ အဆံၚ်သၠုၚ် မုက်ဂၞန် (၁) ဂှ် ဂွံဂၠိုၚ်နူထၜိုတ်ဂဒဵုဏီ ရောၚ်ဂှ် ညးထပ်ဟီုရ။

“ရဲကၠောန်ထၜိုတ်ဂဒဵု (မှိုၚ်း) ဂှ် ဒှ်ကမၠောန်ၜိုတ်ရဲကၠောန်ဗုတ်ထၜိုတ်ဂတှ်ေ အဆံၚ်သၠုၚ် မုက်ဂၞန် (၁) ဂှ်ဟွံဒှ်၊ ဟိုတ်နူဂှ်ရ တၠကမၠောန်ထၜိုတ်ဗွဲမဂၠိုၚ်ဂှ် ပံက်တိုန်ရုၚ်ရာန်ဍာ်ထၜိုတ်၊ နူဍာ်ထၜိုတ်ဂှ် ကၠောန်ဗုတ်ထၜိုတ်ဂတှ်ေ အဆံၚ် မုက်ဂၞန် (၁)၊ နဲဏံဏောၚ် တၠကမၠောန်ရုၚ်ထၜိုတ်တအ် ဒှ်မံၚ်ကမၠောန်” သာ်ဝွံ သ္ဂးရ။

နူကဵုတၠကမၠောန်ရုၚ်ကၠောန်ထၜိုတ်တအ် ပံက်တိုန် ကၠောန်ထၜိုတ်ဗုတ်အဆံၚ်မုက်ဂၞန် (၁) ဂၠိုၚ်ကၠုၚ်တုဲ ရဲတၠကၠအ်ထၜိုတ်တအ်လေဝ် ဟွံဗုတ်ထၜိုတ်ဂတှေ်မွဲသာ် သွံကေတ်ဍာ် ထၜိုတ်ဂၠိုၚ်ရ။

ဟိုတ်နူရုၚ်စက်ကၠောန်ဗုတ်ထၜိုတ်အဆံၚ်သၠုၚ်ဂှ် ပံက်ဂၠိုၚ်ကၠုၚ်တုဲ တၠကၠအ်ထၜိုတ်ဂမၠိုၚ်တအ်လေဝ် ဟွံကၠောန်ဗုတ်ထၜိုတ်ဂတှ်ေမွဲသာ် သွံကၠုၚ် ဍာ်ထၜိုတ်အိုတ်ရောၚ် ဂွံတီကေတ်ရ။