လညာတ်ပါ်ပါဲ၊ ယက္ခဂုမ္ဘဏ်

“ဟိုတ်နူအကာဲအရာ ပရေင်ဍုင်ကွာန်တုဲ ဂၠာဲညးစၞးအလံင်အမာတ် ဝါတ်ဟဍေံ ရဲညးဒစဵုဒစးလဝ်ကဵုဗော်ဂှ် လ္ပဒုင်တဲညိ” နူညးမၞုံတာလျိုင် ဗဟဵုကမ္မတဳ ဗော်ညဳသၟဟ်မန် နကဵုယၟုအကံက် Facebook.Kominmin ချူပတိုန်ူလဝ်လ္တူလပှ်ကျာ ဂွံဆဵုကေတ်ရ။ ဟိုတ်နူကဵုလိက်ဂှ်တုဲ လိက်ပရေင်ဏံဒှ်ကၠုင်ရ။

ပရေင်ဍုင်ကွာန်ဟီုဂှ် ဆေင်စပ်ဒၟံင်ကဵုဇၟာပ်မၞိဟ်တုဲ ဇၟာပ်မၞိဟ်အခေါင်ဟီု စပ်ကဵုပရေင်ဍုင်ကွာန်မာန်ရ။ ၜိုန်ဂှ်လေဝ် ပ္ဍဲပရေင်ဍုင်ကွာန်ဂှ်ပၠန် ဆက်စပ်ကဵုပူဂဵု၊ ဆက်စပ်ကဵုဂကောံ၊ ဆပ်စပ်ကဵုဒေသ၊ ဆက်စပ်ကဵုဂကူ၊ ဆက်စပ်ကဵုဍုင် နွံဒၟံင်အဆံင်ကဵု အဆံင်ပၠန်ရ။

ဇကုမွဲဓဝ် မံင်ဒၟံင်က္ဍိုပ်မွဲ တင်က္ၜံင်ၜါရမ္ဂး ဗီုနွံပၟိက်ဂှ်ဟီု ဟီုဒၟံင်ကၠိုဟ်တ္ၚဲ၊ ကၠိုဟ်ဂိတု၊ ကၠိုဟ်သၞာံလေဝ် မုဟွံဒှ်မွဲသာ်ရ။ အလဵုဇကုနွံဒၟံင် ပ္ဍဲဂကောံ၊ ဗော်မွဲမွဲတုဲ ဟီုဏာဂလာန် ပြဝရုန်မဵု အောန်ကဵုပရေင်စန်ဒက်မ္ဂး ဒှ်ဇီုကပိုက်ကဵုဂကောံ၊ ဗော်ဇကုဂှ်မာန်ရောင်။

ဗော်ညဳသၟဟ်မန်ဝွံ ဒုင်သဇိုင်ကဵုကောန်ဂကောံ မလုပ်လဝ်ဗော်တံသၟးတုဲ ဒက်ပတန်လဝ်ဗော်ဟာ ဒုင်သဇိုင်ကဵုဂကူတုဲ ဒက်ပတန်လဝ်ဗော်ဟာဂှ် ညးတာလျိုင်ဗော် သ္ပပတံနူကောန်ဗော် အဆံင်သဝ်အိုတ်တုဲ စဵုကဵုစိုပ် ညးမဒှ်အဆံင်သၠုင်အိုတ် ဥက္ကဌဗော် ဒးတၟးဒၟံင် ပ္ဍဲဇာဉာဏ်ဇကုဇကု လၟိုန်န်ကာလရောင်။ ကုပူဂဵု မဟီုဂးဒၟံင် ဣဓံင်ဣဏံင်တံဂှ် ဗလးလဝ် အတိုင်ဂှ်ရဟာ မိက်သၟာန်ဏာ ညးတာလျိုင်ဗော်တံရ။

ဗော်ပရေင်ဍုင်ကွာန်ဟီုဂှ် ဒုင်သဇိုင်ကဵုပရေင်ဒုင်စသိုင်ပူဂဵုတုဲ ဒက်လဝ်ဟွံသေင်ရ။ ဒုင်သဇိုင်ကဵု ကောန်ညးဍုင်ကွာန်တုဲဟေင် ဒက်ပတန်လဝ်ရ။ ဗော်ညဳသၟဟ်မန်ဂှ် ဗွဲတၟေင် ဒုင်လဝ်သဇိုင်ကဵု ညးဍုင်ကွာန်တံသၟးဟွံက သီုဒုင်လဝ်သဇိုင် ဂကူမန်ရ။ ပ္ဍဲဂကူမန်ဂှ်ပၠန် ဗော်မန်ညံင်သ္ဂောံနွံမွဲဓဝ်ဂှ် ပတိတ်ကၠုင်ဒြဟတ်ပကောံကၠုင်လဝ်တုဲ ညံင်ရဴဟွံက္လေင်ထပ်ဒှ်ၜါဂှ် ဒှ်တာလျိုင် ကောန်ဗော်ညဳသၟဟ်မန်တံရ။ ကောန်ဗော်ညဳသၟဟ်မန် မ္ဒးမင်မွဲထိင်ဒဝ်အာ ညံင်ရဴဗော်ဟွံဂွံမံက်တိုန်တၟိရ။

ဗော်ညဳသၟဟ်မန်ဂှ် ဒှ်ဗော်သ္ပစၞးကဵုဂကူမန်တုဲ ကောန်ဂကူမန်ဍာံ ၜိုန်ဟွံဂွံလုပ်လဝ် ဗော်ညဳသၟဟ်မန်ကီုလေဝ် ဆေင်စပ်ဒၟံင်ကဵုဗော်ညဳသၟဟ်မန်ရ။ အခေါင်ဟီုဂးပါ်ပါဲ ပတိုန်ထ္ၜးနာနာနွံရ။ “ဇကုတံ ဟွံလုပ်လဝ်ဗော် ဇကုတံ လ္ပကၠုင်ဟီုပါ်ပါဲမံင် မိက်ဂွံဖန်ကီုတှ်ေ လုပ်ကၠုင်ဗော်” ဂလာန်သာ်ဏံလေဝ် ကေင်မိင်လဝ် ပ္ဍဲအကြာညးတာလျိုင်ဗော်တံနွံရ။ ဟွံမိက်ဒုင်ပါ်ပါဲကဵုဂကူမန်မ္ဂး လ္ပဒုင်သဇိုင်ကဵုဂကူမန်ညိ မိက်ဂွံသ္ဂးရ။

မၞိဟ်လညာတ်ဟွံတုပ် တိတ်အာနူဗော်တုဲ ညံင်သ္ဂောံက္လေင်စဴကၠုင်ဗော်ဂှ် ဒးကော်ဘိက် ဒးဟီုတွံ ဒးစန်ဒက်ပၠောပ်ရ။ မၞိဟ်ဒစဵုဒစးကဵုဗော်ဟီုဂှ် ဒုင်သဇိုင်ကဵုမုတုဲ ဒစဵုဒစးလဝ် ပိုဲတံသ္ဒးကၠးလဝ်ရောင်။ သ္ဒးရံင်ကဵုအခိင်အခါ ကာလ ဒေသရောင်။ ဗော်သ္ပစၞးကဵုဂကူဂှ် သ္ပလဝ်ညံင်ရဴ ဗော်အပါဇကုအပိုင်တုဲ ဟီုဂးဖန်ဖက်မံင်ဂှ် ညိဟွံဒးရးရောင်ဂှ် သၟိက်မိက်ဂွံကဵုတီကၠိုဟ်ရ။

ပရေင်ဍုင်ကွာန်မ္ဂးဂှ် ဒှ်ဒၟံင်မွဲဗီုဓဝ် မွဲဂၠးဓဝ်ဟွံသေင်ရ။ ပရေင်ဍုင်ကွာန်ဍုင်ဗၟာဂှ် သာတုဲ ထုဲထံင်နူကဵုပရေင်ဍုင်ကွာန် ဍုင်သ္အာင်တံရ။ သၞောဝ်သၞောတ်ဥပဒေ ၜိုန်ရနွံကီုလေဝ် ဂန်လဝ်လွဟ်တုဲ ဟွံကေတ်သၞောဝ်သၞောတ် ဗီုဒးစိုတ်ဖန် ဗီုဒးစိုတ်သ္ပမံင်အိုတ်ရ။ ဟိုတ်ဂှ်ရ ရံင်အခိင်အခါကာလတုဲ ကာလဒးဒစဵုဒစးမ္ဂး ဒးဒစဵုဒစးတုဲ ကာလဒးက္လေင်ထံက်ဂလာန်မ္ဂး ဒးထံက်ဂလာန်ရ။ ရဲညးဒစဵုဒစးလဝ် ဗၠေတ်ကဵုဒၞာဲတံဂှ် နကဵုဇကုညးကဵုညး ညးတီဗၠေတ်တုဲ ညးဂွစကေတ်တ်ရ။ ဇကုဟွံဒးက္လေင်ဟီုဟဍာဲကုညးရ။

ကောန်ဗော်မွဲမွဲ ဗီုလဵုဗၠေတ်တ် ဗော်ဂှ် တုပ်တဴညံင်ရဴမိမရ။ ကောန်ဗော် မတိတ်အာဂှ် အခိင်ဂွံဓဝ်ဍာံတုဲ က္လေင်စဴကၠုင်မ္ဂး ဗော်သ္ဒးဒုင်တဲရောင်။ ဗော်ပရေင်ဍုင်ကွာန်မန်ဟီုမ္ဂးဂှ်သ္ဒးဍိုန်ဍောတ် ဇိပ်ဂၠိပ် လ္တူဂကူမန်ရောင်။ ဂကူမန်ဇကု အလုံသီုဖအိုတ် ညံင်သ္ဂောံထံက်ဂလာန်ကဵုဗော်ဇကုဂှ် ညးမဒှ်ကောန်ဗော် စနူဍောတ် စဵုကဵုဇၞော် မ္ဒးစန်ဒက်အာ ဂကူမန်ရောင်။

ဆက်တုဲ မုမိက်ဂွံထံက်ထ္ၜးညိပၠန်ရောမ္ဂး ဆေင်စပ်ကဵုတၠအကံက် Kominmin ချူပတိုန်လဝ် လ္တူလာင် လပှ်ကျာတုဲ နူကဵုဌာန်ပရိုင်ဗၠးၜးမန် ချူပတိုန်နဒဒှ်ပရိုင်ဂှ် နူကဵုကောန်ဗော် မၞုံကဵုအဆံင် ကေင်ကာဗဟဵုမွဲတၠလေဝ်ဒှ် အံင်ဇၞးလဝ်မာဲ နူကဵုပေါဲရုဲမာဲသၞာံ ၂၀၂၀ လေဝ်ဒှ် မွဲတၠဂှ် “အဝ် အာစာပရိုင်ဏး မအရေဝ်နူလ္တူ Facebook လေဝ် ချူသ္ပထောံပရိုင်ကီု” သာ်ဏံ ချူကဵုလဝ်ခမ်မေန်ဂှ် ဂွံဆဵုကေတ်ရ။ အာစာပရိုင်ဟီုဂှ် ညံင်ဂွံဒှ်ပရိုင်မွဲပိုဒ်ဂှ် ညးဂၠိုက်ဂၠာဲ နကဵုတင်နင် ချိုတ်တ်ပၠိုတ်တ်တုဲ ညးမ္ဒးခၞံဗဒှ်ပရိုင်ရ၊ လ္တူပရိုင်ညးချူဂှ် ညးဂံင်ကေတ်တာလျိုင်တုဲဟေင် ညးချူဗဒှ်ဏာပရိုင်ရ။

မၞိဟ်တမြအ် ကြအ်အ်မွဲ ဟီုဂးမံင်ဣဓံင်ဣဏံင်ဂှ် အာစာပရိုင်တံ ဂွံဖန်ဗဒှ်ဏာပရိုင်ဂှ် ဒှ်ဟွံမာန်ရ။ လ္တူညးမၞုံကဵုတာလျိုင် ဆက်စပ်ကဵုဂကောံမွဲမွဲတုဲဟေင် ညးချူဏာပရိုင်ရ။ ကုညးမဒှ်ဒၟံင် ညးမၞုံကဵုတာလျိုင်တံဂှ်ရ ဇကုဇကုမ္ဒးစွံသတိ လၟိုန်ကာလရ။ အရေဝ်ဂလာန်ဇကု မဟီုပတိတ်ဏာဂှ် ညံင်ဟွံဂွံဒှ်ပရိုင် ဇီုကပိုက်ကဵုဂကောံကီု ဂကူကီုဂှ် မ္ဒးမင်မွဲပါင်ရ။ ဒၟာနူဇကုဟွံမင်မွဲ ကာယပါင်တုဲ အာပတိုန်ဒၟံင်ဒုဟ်ကဵုအာစာပရိုင်ဂှ် ဟွံဒးရောင် မိက်ဂွံထံက်ထ္ၜးဏာရ။

သရုပ်ကၠေံ လိက်ပရေင်ဏံ ဂၠေံဂၠေံဍန်န်မ္ဂး ဗော်ပရေင်ဍုင်ကွာန် ဗော်ညဳသၟဟ်မန် သ္ပစၞးကဵုဂကူမန်ဍာံမ္ဂး ဇၟာပ်ဂကူမန် ညံင်သ္ဂောံထံက်ဂလာန်ကဵုဗော်ညဳသၟဟ်မန်ဂှ် စန်ဒက်အာညိဂှ် မိက်ဂွံဗတိုက်ဖအောဝ်ရ။ “ဒၟာနူဂလာန်မၞး ဝိုင်ဂကူလ္ပကဵုရး” အဓိပ္ပါဲက္ဍိုပ်လိက်ဏံ မိက်ဂွံသ္ဂးဂှ် ဗော်ညဳသၟဟ်မန်ဂှ် ဒှ်ဒၟံင်ဗော်ပ္ဍဲဝိုင်ဂကူတုဲ မၞိဟ်မင်မွဲကာယပါင်ဟွံမာန် ဟီု ချူကှ်ေမံင် လ္တူလပှ်ကျာ ဣဓံင်ဣဏံင်ဂှ်လေဝ် မ္ဒးထိင်ခွာအာထေက်ရောင် ပတိုန်ထ္ၜးဏာရ။