ပ္ဍဲကဵုပေဲါရုဲမာဲ သၞာံ (၂၀၂၅) ဏံဂှ် ညးဂွံဒုၚ်ရုဲ ဇၞးလဝ်ပေဲါရုဲမာဲ သၞာံ (၂၀၁၀၊ ၂၀၁၅၊ ၂၀၂၀) သီု (၃) အလန် ဒံက်တာအံၚ်နာၚ်ဥူ ဟွံလုပ်ဒုၚ်ရုဲရရောၚ် မၞိဟ်ကြပ်ကဵု ညးမွဲတၠဂှ် ဟီုရ။

“ပေဲါရုဲမာဲ (၂၀၂၅) ဏံ ၜိုတ်အဲတီတှ်ေ ဒံက်တာအံၚ်နာၚ်ဥူ ဟွံလုပ်ဒုၚ်ရုဲရပုဟ်၊ ညးကၠောန်အာ ပရေၚ်ပညာကဵု ပရဟိတရရောၚ်” သာ်ဝွံ မၞိဟ်ကြပ်ကဵု ဒံက်တာအံၚ်နာၚ်ဥူမွဲတၠဂှ် ဟီုရ။

ဒံက်တာအံၚ်နာၚ်ဥူဝွံ ပတိုန်လဝ်လိက်နုက်တိတ် နူဗော်ညဳသၟဟ်မန်တုဲ လၟုဟ်မ္ဂး က္ဍိုက်ပ်ကၠောန်သ္ပရေၚ်တၠုၚ်မံၚ် ပရေၚ်ပညာ ပ္ဍဲဘာအဓိပတ္တိ ဍုၚ်မတ်မလီုရ။

ပ္ဍဲကဵုပေဲါရုဲမာဲ အလန်ကၠာအိုတ် သၞာံ (၂၀၁၀) ဂှ် ဒံက်တာအံၚ်နာၚ်ဥူ လုပ်ဒုၚ်ရုဲ ပ္ဍဲပွိုၚ်တ္ကအ်ခၟိုၚ်(ၜါသွာၚ်) ကၠတ်ထဝ်တွဵုရး ဒေသ (၁) တုဲ ဂွံဒုၚ်ရုဲစှ်လဝ်ရ။ ဆက်တုဲ ပေဲါရုဲမာဲ (၂၀၁၅) ဂှ်လေဝ် လုပ်ဒုၚ်ရုဲဒၞာဲဂှ်ပၠန်ဂှ် ဂွံဒုၚ်ရုဲစှ်ပၠန်တုဲ ပေဲါရုဲမာဲ (၂၀၂၀) ဂှ်လေဝ် ဂွံဒုၚ်ရုဲစှ် ဒၞာဲဂှ်ပၠန်ရ။

ဒံက်တာအံၚ်နာၚ်ဥူဝွံ ပ္ဍဲကာလလက်ထက်အလဵုအသဳ အေန်အေဝ်ဒဳ (၂၀၁၆-၂၀၂၀) ဂှ် သီုဒှ်လဝ် ဒုဥက္ကဌကၠတ်ထဝ် တွဵုရးဍုၚ်မန်ကီု ပၞောဝ်ကဵုအမာတ်ကၠတ်ထဝ်မန်ဂမၠိုၚ်မ္ဂး ဒံက်တာအံၚ်နာၚ်ဥူဂှ် သီုကဵုညးဍုၚ်ကွာန်တအ် စိုတ်လျုၚ်အိုတ်မွဲတၠလေဝ် ဒှ်ရ။

ဒံက်တာအံၚ်နာၚ်ဥူဂှ် ဗွဲကြဴနူ ပၞာန်သီအဝဵု သၞာံ (၂၀၂၁) ဂိတုဖေဖဝ်ဝါရဳ (၁) တုဲဂှ် ဟိုတ်နူဗော်ညဳသၟဟ်မန် ဗလးဏာညးစၞး ပ္ဍဲကံၚ်သဳပၞာန်-ကမ္မေယှန်ပၞာန် အဆံၚ်ကၟိန်ဍုၚ် (၁) တၠကဵု အဆံၚ်တွဵုရး (၁) တၠဂှ်တုဲ ဒံက်တာအံၚ်နာၚ်ဥူ ပတိုန်လိက်နုက်တိတ် နူဗော်ညဳသၟဟ်မန်ရ။

ဗွဲကြဴနူဂှ်မ္ဂး ဒံက်တာအံၚ်နာၚ်ဥူဝွံ ဟွံကၠောန်ကမၠောန်ပရေၚ်ဍုၚ်ကွာန်တုဲ ကၠောန်တဴဒၟံၚ် ကမၠောန်ပရဟိတကဵု ပရေၚ်ပညာနွံရောၚ် ဂွံတီကေတ်ရ။