မွဲဒမြိပ်ဂၠံၚ်ဇၞော် စၟတ် (၈) သကုတ်ဒေသရေဝ် ဇြပ်ဗုဂှ် ဒပ်ပၠန်ဂတးဂမၠိုၚ်တအ်ကဵု ဒပ်ကမ္မယှေန်ပၞာန်တအ် ကေတ်ထောံ ဓဝ်ပလိုဟ်ညးသ္ကအ်ဟာဂှ် ညးဒေသလ္ၚဵု ဒှ်မံၚ်သံသယနွံရောၚ် ညးဒေသမွဲတၠ ဟီုရ။

ဂၠံၚ်ဇၞော် စၟတ် (၈) သကုတ်ဒေသရေဝ် ဇြပ်ဗုဂှ် ဂိတုအံက်တိုဝ်ဗာဖာမံက်ဏံ ကရောၚ်ပၞာန် ဒပ်ကမ္မယှေန်ပၞာန်တအ် ဍိုက်ဇက်တိုန်ကၠုၚ် ဒၞာဲဒေသ ဂကောံပၠန်ဂတးဂမၠိုၚ် ဖျေံလဝ်သဇိုၚ်ဂှ် ၜိုတ်ဆရမျှာၚ်လွဟ်ဗြုၜါပိလစုတ်ဓဝ်တုဲ သီုဒပ်ၜါလ္ပာ်ဂှ် ခြာ တိတ်အာညးသ္ကအ်ဂှ်ရ ညံၚ်ဟွံဂွံဒှ်ပေါဲဗတိုက်ပန်ပှော်ဂှ် ကေတ်လဝ်ဓဝ်ပလိုတ်ညး သ္ကအ်နွံမာန် ညးဒေသ အကြာပယျဵု ပွိုၚ်ဍုၚ်ဇြပ်ဗုကဵု ပွိုၚ်ဍုၚ်ရေဝ်မွဲတၠ ဟီုထ္ၜးရ။

“အဃောကၠာတုဲကၠုၚ် ၜိုတ် (၁၀) တ္ၚဲလ္ပာ်တေံဂှ် ဒၞာဲဂကောံပၠန်ဂတးပံၚ်တောဲဂမၠိုၚ်တအ် ချဳဒရာၚ်ဖျေံလဝ်သဇိုၚ်ဂှ် ကရောၚ်ပၞာန်ဗၟာတအ် ဍိုက်ဇက်တိုန်ကၠုၚ် ၜါပိသွာၚ် ဇြဟတ်ဟွံအောန်နွံမံၚ်၊ ညးဒေသလ္ပာ်ပိုဲဏံ ထေၚ်ကေတ်တှေ် အလန်ဏံ ပေါဲဇၞော်ဒှ်ရ၊ မုမုဆေၚ် ရမျှာၚ်လွဟ်ဗြုဂွံမွဲၜါလစုတ်တုဲတှေ် ဗီုညး ညးခြာ သ္ၚောဲတိတ်အာ ရဲတေံ ဆုတ် ပါဲတိတ်အာညိ၊ ဒပ်ကရောၚ်ပၞာန်ဗၟာတအ်လေဝ် ဟွံဗက်ပုဟ်၊ လတူဂၠံၚ်ကာဂှ်လေဝ် ပၞာန်ဗၟာတအ်ဟွံဖျေံလဝ်ဒၞာဲပုဟ်၊ ပိုဲထေၚ်ကေတ်တှ်ေ ဒပ်ပၠန်ဂတးတအ်ကဵု ဒပ်ပၞာန်ဗၟာ ကဆံၚ်သၟဝ်ဏံကဵု ကဆံၚ်သၟဝ်ဏံ ကေတ်အဆက်ညးသ္ကအ်တုဲတှေ် ဗီုပြေပြံၚ်မံၚ်အာညးသ္ကအ်ဒှ်မာန်” သာ်ဝွံ မၞိဟ်တြုံ မၞုံအာယုက် (၄၀) သၞာံပြၚ် ဒၟံၚ်တန်တဴမံၚ် ပ္ဍဲပယျဵုပွိုၚ်ဍုၚ်ဇြပ်ဗုကဵု ပွိုၚ်ဍုၚ်ရေဝ်မွဲတၠ ဟီုထ္ၜးရ။

ဂၠံၚ်ဇၞော် စၟတ် (၈) သကုတ်ဒေသ ပယျဵုပွိုၚ်ဍုၚ်ဇြပ်ဗု အကြာရေဝ်ဂှ် ကရောၚ်ပၞာန် ဒပ်ကမ္မယှေန်ပၞာန်တအ် ချဳဒရာၚ်စိုပ်ကၠုၚ်တုဲ ပၞုက်လဝ်ဇကုသ္ၚိတ်ဇြမံၚ်ရ။ တုပ်သာ်ဂှ်ကီု ဂကောံပၠန်ဂတးမန်၊ ကရေၚ်တအ်လေဝ် ပါဲဆုတ်တိတ်အာညိ၊ မံၚ်ဒၟံၚ်ဒၞာဲညး ဒၞာဲညး ၜိုဟ်ဩိုဟ်ဩိုဟ်ရရောၚ် ညးဆက်ဟီုရ။

“နူကဵုဒပ်ကရောၚ်ပၞာန်ဗၟာတအ် ချဳဒရာၚ်စိုပ်ကၠုၚ် ဒေသဂကောံပၠန်ဂတးတအ်ဂှ်တုဲတှ်ေ ရဲစတေံ(ရဲပၠန်ဂတး) ဆုတ်ပဲါတိတ်အာညိဓဝ်ရ၊ ကရောၚ်ပၞာန်ဗၟာတအ်လေဝ် ဟွံဗက်ပုဟ်၊ ရဲပၠန်ဂတးတအ်လေဝ် ဟွံပန်ဗတိုက်ပုဟ်၊ ဒဵုလၟုဟ်ဂှ် မုလေဝ်ဟွံဗြုမွဲသာ်ပုဟ်၊ ဇှ်ရ ပိုဲထေၚ်ခယျမံၚ်တှ်ေ ကေတ်လဝ်အဆက်ညးသ္ကအ်တုဲတှေ် လ္ပပန်ပှော်ညးသ္ကအ် ဒှ်မာန်” သာ်ဝွံ ညးဒေသဂှ် ဆက်ဟီုရ။

ဂိတုအံက်တိုဝ်ဗာ ဒုတိယသတ္တာဟဂှ် ဟိုတ်နူကရောၚ်ပၞာန် ဒပ်ကမ္မယှေန်ပၞာန်တအ် ထ္ပက်လုပ်စိုပ်ကၠုၚ် တိဍာ်ဒေသဂကောံပၠန်ဂတးတအ် ဖျေံသဇိုၚ် ချဳဒရာၚ် အကြာ ပယျဵုပွိုၚ်ဍုၚ်ဇြပ်ဗုကဵု အကြာပယျဵုပွိုၚ်ဍုၚ်ရေဝ်ဂှ်တုဲ ညးဍုၚ်ကွာန်ဒေသလ္ၚဵု ဒှ်ဂဝိၚ် ဖေက်ပေါဲပၞာန်ကတဵုဒှ်ဂှ်ရ သ္ၚိကၟိန်လ္ၚဵု ပါဲဓလေတ်အာနွံ၊ ပြံၚ်ပဆုဲလဝ် ကပေါတ်ပိုန်ဟာန်လေဝ် နွံရ။

ဆဂး ဒဵုကဵုလၟုဟ် အကြာဂကောံပၠန်ဂတးတအ်ကဵု ဒပ်ကမ္မယှေန်ပၞာန်တအ် ပေါဲဗတိုက်ဟွံဒှ်ညးသ္ကအ်မွဲသာ်ဏီဂှ်တုဲ ညးဒေသ ပြံၚ်ပဆုဲလဝ်ကပေါတ်ပိုန် ဟာန်လ္ၚဵုတအ်လေဝ် ကလေၚ်စဴအာ ကွာန်ညးကဵုညးကီုရောၚ် ဂွံတီကေတ်ရ။