ဂကောံကွးဘာတက္ကသိုလ်သၚ်မန် ဍုၚ်သေံဝွံ ပံက်ပ္တန်လဝ် အစဳဇန်”သၠုၚ်ပ္တိုန်ဍာ်ဒကေဝ်ပညာဗဟုသုတ” နွံတုဲ ဇၟာပ်စိုပ်တ္ရဲအဒိုတ်၊ အခိၚ်ဍုၚ်သေံ(၈)နာဍဳမ္ဂး နူကဵုလပှ်ကျာမွဲကဆံၚ် ဖျေံဗ္တောန်ကဵုဒၟံၚ်ပညာဇၟောဝ်ခေတ် လၟေၚ်သတ္တာဟနွံရောၚ် ဂွံဆဵုကေတ်ရ။
နကဵုဂကောံကွးဘာတက္ကသိုလ်သၚ်မန် ဍုၚ်သေံဝွံ (၁) ရန်တၟအ်ကဵုသွက်သ္ဂောံသၠုၚ်ပတိုန် ပရေၚ်ပညာခမဳသၚ်မန်ကီု၊ (၂) ခမဳသၚ်မန်၊ ကောန်ဂကူမန် မွဲဟာန်ကေုာံ သၟတ်မန် မတန်တဴဒၟံၚ်ဍုၚ်ဇဳ၊ ဒေသဇဳတအ် သ္ဂောံဗပေၚ်အာဍာ်ကေဝ်ပညာ ဗွဲမတာပ်ကဵုခေတ်၊ ဂတာပ်ကဵုအခိၚ်အခါကာလပညာပစ္စုပ္ပန်လၟုဟ်ဏံကီု၊ (၃) သွက်ဂွံဒှ်အာ (Networking) ပရေင်ဆက်စၠောံ ပရေၚ်ကၠောံဍ အကြာခမဳသၚ်တၠပညာမန် မွဲဟာန်ကေုာံ သၟတ်ကောန်ဂကူမန်တအ်တုဲ ပံက်ပ္တန်ကၠုၚ်လဝ် အစဳဇန် “သၠုၚ်ပ္တိုန်ဍာ်ဒကေဝ်ပညာဗဟုသုတ” ဏံရ။
အစဳဇန်ဝွံ ပပ္တံနူဂိတုက္ထိုန်(၉)မံက်၊ အံက်တဝ်ဗာ စၟတ်တ္ရဲ(၂၉)ဂှ် စပံက်ကၠုၚ်လဝ်တုဲ အခိၚ်လၟုဟ်ဏံမ္ဂး ပံက်ဂွံလဝ် ၜါသတ္တာဟတုဲရ။ သတ္တာဟကၠာဂှ် တၠဂုဏ်အ္စာခေမာသာရ ညးမဒှ်ဥက္ကဌဂကောံကွးဘာတက္ကသိုလ် သၚ်မန် ဍုၚ်သေံ ကဵုကၠုၚ်လဝ်တန်ဗ္တောန် နကဵုက္ဍိုပ်လိက်”Basic: Academic Writing from Sentence Structure to Essay” ရ။
သတ္တာဟဒုတိယ တုဲကၠုၚ်ဏံဂှ် တၠဂုဏ်အ္စာဒံက်တာသူရိယ(USA) ကဵုကၠုၚ်တန်ဗ္တောန်နကဵုက္ဍိုပ်လိက် “Academic Speaking Speaking Skills”တုဲ၊ သတ္တာဟဏံမ္ဂး အ္စာနာဲသိုက်ဆာန်ကီု တၠဂုဏ်အ္စာဒံက်တာဇိနဓဇ(USA)ကီု သွက်ဂွံဖျေံဗ္တောန်အာနကဵုက္ဍိုပ်လိက်တၞဟ်တၞဟ်နွံပၠန်ရ။
“ပြဟ်ပြဟ်ဏံ ပိုဲပံက်ဂွံလဝ် ၜါသတ္တာဟတုဲရ၊ နကဵုသကုတ်ပထမဏံဂှ် ပိုဲအာတ်မိက်ဂွံလဝ် အ္စာကဵုတန်ဗ္တောန် (၉) တၠ၊ သီုသၚ် သီုကဵုခရှ်ရ။ အကြာဂှ်တှ်ေ ပိုဲဂွံအဆက်ကဵု မကဵုတန်ဗ္တောန်သၟဟ်အစောန်မာန်မ္ဂးတှ်ေ ပိုယ်ပံက်အာကဵုပၠန်ရ” သာ်ဝွံ တၠဂုဏ်အ္စာ မောနေယျာဓိက ညးမဒှ်ဒုဟိတဓရ ဂကောံကွးဘာတက္ကသိုလ်သၚ်မန်ဍုၚ်သေံ ဟီုမြော်လဝ်ကု ဌာန်ပရိုၚ်ဗၠးၜးမန်ရ။
သွက်အစဳဇန်ဏံဂှ် နဒးဒှ်သ္ကုတ်ပထမမ္ဂး အာတ်မိက်နိမည်ဘိက်ဂွံလဝ် အ္စာကဵုတန်ဗ္တောန် (၉)တၠတအ်တုဲ မပ္တံကဵု ကျာ်ဇၞော်ရာဝိက(USA)၊ တၠဂုဏ်အ္စာဒံက်တာဇိနဓဇ(USA)၊ တၠဂုဏ်အ္စာဒံက်တာသူရိယ(USA)၊ တၠဂုဏ်အ္စာခေမာသာရ၊ တၠဂုဏ်အ္စာသြဘာသ၊ ဒံက်တာအ္စာပညာမန်(USA)၊ အ္စာဗဳထဝ်မန်ဇြာဲ(DK)၊ ဒံက်တာအ္စာသာင်နန်ဇူ ကေုာံ အ္စာနာဲသိုက်ဆာန်တအ် ပါလုပ်ရ။
သ္ကုတ်ပထမဏံမ္ဂး ဒဵုကဵုစိုပ်ဂိတု ဒဳဇြေန်ဗာ သၞာံ(၂၀၂၅) အိုတ်တေံ ဖျေံဗ္တောန်ကဵုအာ နကဵုက္ဍိုပ်လိက်နာနာ ဍာ်ဒကေဝ်ပညာ ဗဟုသုတနာနာတုဲ ရံၚ်ကဵု အ္စာကဵုတန်ဗ္တောန်တအ်ကီု၊ ရံၚ်ကဵုအခိၚ်ခမဳသၚ် ကေုာံ ကွးဘာမန်တအ်ကီု ကေုာံ ရံၚ်ကဵုအကာဲအရာတၞဟ်တၞဟ်တုဲ ဆက်ပံက်အာ သ္ကုတ်ဒုတိယတေံရောၚ် သ္ဂးရ။
“ရံၚ်အာကဵုအ္စာ (၉) တၠဂှ်တှ်ေ လၟေၚ်သတ္တာဟ ပိုဲစိုပ်အာ အကြာဂိတုဒဳဇြေန်ဗာ ဒဵုကဵုသၞာံ (၂၀၂၅) ဏံအိုတ်ရ။ တုဲပၠန် သွက်ဂွံပံက်အာ သကုတ်ဒုတိယဂှ်တှ်ေ ယဝ်ရပိုဲဂွံအဆက်ကဵု အ္စာတန်ဗ္တောန်တအ်ကီု ရံၚ်ကဵုအခိၚ်ခမဳသၚ်မန်တအ် ကွးဘာမန် အကာဲအရာတၞဟ်တၞဟ်သာ်တုဲတှ်ေ ပိုယ်တအ်ဆက်လလောၚ်တြးအာ ပ္ဍဲမုက်လိက်ဂကောံပိုယ် “ဂကောံကွးဘာတက္ကသိုလ်သၚ်မန်ဍုၚ်သေံ” ပၠန်ဏောၚ်” တၠဂုဏ်အ္စာ မောနေယျာဓိက ဆက်ဟီုမြော်လဝ်ရ။
ဟိုတ်ဒှ်သာ်ဂှ်ရ ခမဳသၚ်မန်၊ သၟတ်မန်၊ ကောန်ဂကူမန် ညးမစိုတ်လုပ်စကဵုအစဳဇန်ဏံဂှ် ဇၟာပ်စိုပ်တ္ရဲအဒိုတ်၊ စိုပ်အခိၚ်နာဍဳ ဍုၚ်သေံ(၈)နာဍဳမ္ဂး နူကဵုမုက်လိက်လပှ်ကျာ ဂကောံကွးဘာတက္ကသိုလ် သၚ်မန် ဍုၚ်သေံမွဲကဆံၚ် ဟွံသေၚ်မ္ဂး နကဵု(Zoom)မွဲကဆံင် ဗွဲမဗၠးၜး ဗွဲမသၠးပွး လုပ်ကတ်လ္ရတ်မာန်ရောၚ်ဂှ် ညးတာလျိုင်ဂကောံကွးဘာတက္ကသိုလ်သင်မန်ဍုင်သေံတအ် ဟီုမြော်ဖ္တိုက်ဖ္အောဝ်လဝ်ရ။
ဗီုရုပ်-ဂကောံကွးဘာတက္ကသိုလ်သၚ်မန်ဍုၚ်သေံ
