မယံၚ် (ဍုၚ်မန်)

ကိစ္စဂကောံဂိုဏ်လီဠာန်ဩန်အန်လာၚ် (Online Scam) ကျာဖျဂှ် ပြာကတ်အာ အလုံလိုက်မွဲတုဲ စပ္တံနူဂိတုနဝ်ဝေမ်ဗာ (၁၈၊ ၁၉၊ ၂၀) ပွိုၚ် (၃) တ္ၚဲဆက်ဆက် ဒပ်ပၞာန်ဗၟာ ကေုာံ ဒပ်မၚ်ပယျဵု BGF တအ် ရပ်ထောံကောန်ဍုၚ်သအာၚ် (၂၂) ဍုၚ်ဂှ် လၟိဟ်မၞိဟ် (၉၀၀) တၠပြၚ်တုဲ ဗွဲမဂၠိုၚ်ဂှ် ဒှ်ကောန်ဍုၚ်ကြုက်ရ။

နူစရပ်တ္ၚဲကၠာအိုတ် နဝ်ဝေမ်ဗာ (၁၈) ဂှ် (၃၄၆) တၠ၊ (၁၉) ဂှ် (၂၆၄) တၠ၊ (၂၀) ဂှ် (၃၅၀) တၠပြၚ်တုဲ သီုဖအိုတ် (၉၀၀) တၠပြၚ်ဂှ် နူကဵုကောန်ဍုၚ် (၂၂) ဍုၚ်ရ။ အပ္ဍဲကဵု (၂၂) ဍုၚ်ဂှ်မ္ဂး ဍုၚ်လဵုရောဂှ် ဟွံချူဓမံက်လဝ်တုဲ ကောန်ဍုၚ်ကြုက်ဂၠိုၚ်အိုတ်ရောၚ် ဒုသ္ကိုပ်ဗိုလ်ဇၞော် ဒပ်မၚ်ပယျဵု BGF နာဲမံၚ်ဇြဝ် ဟီုကဵုဂကောံပရိုၚ်တအ်ရ။

ဒပ်ပၞာန်ဗၟာ ကေုာံ ဒပ်မၚ်ပယျဵုတအ် လုပ်ရပ်ပ္ဍဲကဵုဍုၚ်တၟိယှိုဲကုက္ကိုဝ် (ဗြဝတဳ) ပွိုၚ် (၃) တ္ၚဲဂှ် စမြိုၚ် ဒၞာဲကမၠောန်လီဠာန်ဩန် အန်လာၚ် (ဌာန်ဒတန်ကျာဖျ) (၂၂) မ ပလီုပလာ်တုဲ ကောန်ပျူတာကဵု ကပေါတ်ဆက်စပ်တအ် (၂၆၅၃) မဂှ်ကီု၊ ဖုၚ်မိုဝ်ဗာၚ် (၂) လက်မပြၚ်ဂှ်ကီု ရပ်သီဂွံလဝ်နွံရောၚ် ညးမၞုံလျိုၚ်ဂှ် ဟီုရ။

ညးက္ဍိုက်ပ် ဒက်ပတန်လဝ် ဍုၚ်တၟိယှိုဲကုက္ကိုဝ် ညးက္ဍိုက်ပ်ကမၠောန်လီဠာန်ဩန်အန်လာၚ် ယှဳကျေတ်ကျာန်ဂှ် တုဲကၠုၚ်မုဟွံလအ်ဏံ အလဵုအသဳသေံတအ် ရပ်ပအပ်ကဵု ကြုက်တုဲမုဟွံလအ်မွဲသာ်၊ စပ်ကဵု ကမၠောန်လီဠာန်ဩန်အန်လာၚ်(ကျာဖျ)ဂှ်တုဲ အမေရိကာန် ပံက်ဏာ ဒပ်ဗတိုက်သရိုဟ်တၟေၚ် (Scam Center Strike Force) တုဲဗက်မွဲၜါတ္ၚဲဂှ် က္ဍိုပ်သ္ကိုပ်ပၞာန်မေန်အံၚ်လှာၚ် ကဵုပၟိၚ်ကုဒပ်ပၞာန်ဗၟာတုဲ စဗမံက်ကၠုၚ်ရုပ်ရဴ ပရေၚ်ဗတိုက်ပလီု ကမၠောန်လီဠာန်ဩန်အန်လာၚ်ဂှ်မံက်ကၠုၚ်ရ။

ရံၚ်ကေတ်ဒဒှ်ဗီုဒပ်ပၞာန်ဗၟာတအ် ဂစာန်ပလီုပလာ်မံၚ် စမြိုၚ်ဌာန်ဒတန် ကမၠောန်လီဠာန်ဩန်အန်လာၚ် ပ္ဍဲဍုၚ်တၟိယှိုဲကုက္ကိုဝ်ဂှ်မ္ဂး မၞိဟ်အခါတ်အကာဲဂမၠိုၚ်တအ် ဖျေံတၟော်ဂှ် အသိၚ်ဇြဟတ်ဓရိုဟ် အမေရိကာန်တအ် ပတိတ်ကၠုၚ်ရမျှာၚ် ပံက်ကၠုၚ်ဒပ်သွက်ဂွံဗတိုက်သရိုဟ်တၟေၚ် (Scam Center Strike Force) တုဲဗက်ဂှ် ကမၠောန်ဗတိုက်ပလီုဏံ ဒပ်ပၞာန်ဗၟာတအ် ဒးကၠောန်ထ္ၜးကၠုၚ်ရ။

အမေရိကာန်တအ် သွက်ဂွံဗတိုက်သရိုဟ် ကေတ်အရေဝ် ရပ်စပ်အာပိုတ်ပိုတ်နွံရောၚ်တုဲ ဂှ် မွဲအခိၚ်ဓဝ် နဝ်ဝေမ်ဗာ (၁၄) ဂှ် ကြုက်၊ ဗၟာ၊ သေံ၊ ကာမ်ဗောဒဳယာ၊ လော၊ ဗဳယေက်နာန် (၆) ဍုၚ်တအ်လေဝ် ပံၚ်တောဲဗတိုက်သရိုဟ်အာ ပရေၚ်ဂကောံ ဂိုဏ်လီဠာန်ဩန်အန်လာၚ်ဂှ်ကီုရောၚ် စပချဳကၠုၚ်ဍုတ်တုဲ ပတိတ်ကၠုၚ်ပရိုၚ်ရ။

တုဲပၠန် နဝ်ဝေမ်ဗာ (၁၆) ဂှ် က္ဍိုပ်က္ဍိုပ်တၠအဝဵုပၞာန်မေန်အံၚ်လှာၚ် ကလေၚ်နူဘာအၚ်တုဲ “ဂကောံဂိုဏ်လီဠာန်ဩန်အန်လာၚ်ဂှ် ဗတိုက်သရိုဟ်အာ ဒဵုတမ်ရိုဟ်ပိုတ်ရောၚ်” ဂှ် ညးတေံဟီုဏာ အဃောနွံပ္ဍဲမတ်မလီုပၠန်ရ။

က္ဍိုပ်သ္ကိုပ်တၠအဝဵုပၞာန် မေန်အံၚ်လှာၚ် အာဘာအၚ် လုပ်မတ်မလီုဂှ် တရဴဓမ္မတာ ဟွံသေၚ်ရောၚ် ဟီုစဂွံရ။ အခိၚ်အမေရိကာန် လလောၚ်ပတိတ်ပရိုၚ် သွက်ဂွံဗတိုက်သရိုဟ်ရပ်စပ်အာ ကိစ္စဂကောံဂိုဏ်လီဠာန်ဩန်အန်လာၚ်ဏံဂှ် ဍုၚ်ဇိုၚ်ဝုတ်ဒိုဟ် သီု (၆) ဍုၚ်တအ် ဒှ်ကၠုၚ်ဂဝိၚ် လတူအမေရိကာန် ကဵုကၠုၚ်ရမျှာၚ်ဂှ်တုဲ ဗလးလဝ်မတ်အတိုၚ်တြေံတုဲကၠုၚ်တေံဟွံဂွံ၊ သွက်ဒးရပ်စပ်ကေတ် အာအရေဝ် ပိုတ်ပိုတ်ရောၚ် တုပ်စိုတ်ညးသ္ကအ်အိုတ်တုဲ ဂွံမွဲၜါတ္ၚဲဂှ် ဒးဂစာန်ပလီုကၠုၚ် စမြိုၚ်ဌာန်ဒတန်လီဠာန်ဩန်အန်လာၚ်တအ် မံက်ဒှ်ကၠုၚ်ရ။

ကိစ္စဗတိုက်သရိုဟ်ပလီု ဌာန်ဒတန်ကေမၠာန်လီဠာန်ဩန်အန်လာၚ် ပ္ဍဲယှိုဲကုက္ကိုဝ် ဏံ ဂွံဒှ်ကၠုၚ်ဗီုဏံဂှ် လက္ကရဴနူကဵု အမေရိကာန်တအ် ဟီုဗမံက်ကၠုၚ် သွက်ဂွံဗတိုက်ပလီုအာ ပိုတ်ပိုတ်တုဲ ဒက်ပ္တန်ဏာ ဒပ်ဗတိုက်တၟေၚ် (Scam Center Strike Force) လလောၚ်ပတိတ်ဂှ်တုဲ စဳဇန်ဗတိုက်ပလီုတ္ၚဲဏံမံက်ကၠုၚ်ရောၚ် ညးဂမၠိုၚ်စှေ်စိုတ်ရ။

ဒၞာဲဍုၚ်တၟိယှိုဲကုက္ကိုဝ် ကရပ်ဍုၚ်ဗြဝတဳဂှ် ဂကောံရပ်လွဟ်ကရေၚ်ဂမၠိုၚ်တအ် သွက်ဂွံဒက်ပ္တန် ပရေၚ်ဖေါအ်ဗြေဝ်ဂးတုဲ ဂွံလဝ်အခေါၚ်ဒက်ပ္တန်ဍုၚ်တၟိ လက်ထက်အလဵုအသဳ အေန်အေလ်ဒဳ ကြဴနူကဵု ဗော်သွးကောန်ဂကူကရေၚ် (ကေ အေန်ယူ) ဒိုအ်ပန်ပှော် ထပက်လဝ်စၟတ်တဲလိက်ကသုက် (အေန်သဳအေ) တေံရ။

ကြဴနူဂှ် ဂကောံရပ်လွဟ်ကရေၚ်တအ် သဳကၠဳပညဳပညပ်တုဲ ကိစ္စဗမံက်ရုပ်ရဴ ပရေၚ်ဖောအ်ဗြေဝ်ဒေသဂှ် ပအပ်သၠဲကဵုဏာ ကုဒပ်မၚ်ပယျဵု BGF တအ်ရ။

ဂိုဏ်လီဠာန်ဩန်အန်လာၚ်တအ် ကၠောန်မံၚ်ကမၠောန်လီဠာန်ဩန်အန်လာၚ် အလုံဂၠးတိမွဲ ပ္ဍဲဍုၚ်တၟိယှိုဲကုက္ကိုဝ်ဂှ် က္ဍိုပ်သ္ကိုပ်ဒပ်မၚ်ပယျဵုတအ် ပါဲလဝ်က္ဍိုပ်တုဲ ဟီုဂးလဝ်သာ်ဝွံနွံရ “ကမၠောန်လီဠာန်ဩန်အန်လာၚ်ဂှ် ပိုဲဟွံတီပုဟ်၊ ဆဵုလေဝ်ဟွံဆဵုပုဟ် ညးဂမၠိုၚ်ဟီုမှ ပိုဲဂွံတီကီု၊ မုဍေံတအ်ကၠောန်မံၚ်ပ္ဍဲဂှ်ဂှ် ပိုဲလေဝ်ဟွံအာကျောဝ် ဟွံအာရံၚ်တုဲတှေ် မုလေဝ်ပိုဲဟွံတီလဝ်ပုဟ်၊ ၜိုတ်ဆ ပိုဲစလိၚ်ဒၞာဲဓဝ်ရရောၚ်” ဂှ် သ္ကိုပ်ဗိုလ်ဇၞော် ဒပ်မၚ်ပယျဵု သဝ်ချေတ်တူ ဟီုကလးလဝ်ကဵု ဂကောံပရိုၚ်တုဲတုဲတေံ ညးမိၚ် အဲမိၚ်မံၚ်သီုဖအိုတ်ရ။

ကိစ္စကမၠောန်လီဠာန်ဩန်အန်လာၚ်ဏံ ကၠောန်ဒၟံၚ်လအ်ကဵုသၞာံ၊ မၞိဟ်နူဍုၚ်သအာၚ်တအ် ကၠုၚ်ဇက်ဂၠောဲကၠုၚ်မံၚ် လၟိဟ်ကဵုလ္ၚီ၊ သိုၚ်ပတန်လဝ်စမြိုၚ် ဗီုဍုၚ်တောတက်မွဲ တၟေၚ်ဂလိုၚ်ဂလိုၚ်ဏံဂှ် နကဵုဒပ်ပၞာန်ဗၟာတအ် က္ဍိုပ်သ္ကိုပ်ဒပ်ပၞာန်ဗၟာတအ် ပ္ဍဲယှိုဲကုက္ကိုဝ်ဂှ် မုကၠောန်သ္ပမံၚ် ဟွံတီဟီုဂှ် ယုတ္တိဟွံမွဲလးလးရ။

ညးမကေတ်လဝ်တာလျိုၚ်ဂီုကၠီု တၠတိ၊ တၠဍုၚ်၊ ဒပ်မၚ်ပယျဵုတအ်လေဝ် မုမုကၠောန်မံၚ် ပ္ဍဲစမြိုၚ်ဂှ် မုသ္ပမံၚ်ပ္ဍဲဂှ် ဟွံတီရောၚ်ဟီုဂှ် ဍုၚ်ဂၠးတိအလုံလိုက်ဂမၠိုၚ် ဟွံစှေ်စိုတ်ရ။ ဟိုတ်ဂှ်တုဲ လတူကမၠောန်လီဠာန်ဩန်အန်လာၚ် (ကျာဖျ) မံက်ပြာကတ်မံၚ်တ္ၚဲဏံဂှ် က္ဍိုပ်သ္ကိုပ်ဒပ်ပၞာန်ဗၟာ၊ က္ဍိုပ်သ္ကိုပ်ဒပ်မၚ်ပယျဵု၊ ကြုက်၊ သေံ တၞဟ်တၞဟ်တအ် ဗီုလဵုဆက်စပ်မံၚ်နွံဂှ် ညးဂမၠိုၚ်ဒှ်သၠေဟ်ပၟာတုဲ မၚ်ဗဵုကျောဝ်မံၚ် ဗွဲမစိုတ်လုပ်စအိုတ်ရ။

ကိစ္စဌာန်ဒတန်ကမၠောန်လီဠာန်ဩန်အန်လာၚ်(ကျာဖျ) ပ္ဍဲယှိုဲကုက္ကိုဝ်ဂှ် မြဟ်တမ္ညဝ်အာ အလုံလိုက်ဂၠးတိမွဲတုဲ အဓိကဍုၚ်သေံ၊ ဍုၚ်ကြုက် ဍုၚ်ဇိုၚ်ဝုတ်ဒိုဟ် မဆက်စပ်တအ် တာလျိုၚ်နွံဇၞော်ကၠုၚ်တုဲ အာဂတဏံ ဗီုလဵုညးမဆေၚ်စပ်တအ် ရပ်စပ်ကေတ်အာအရေဝ် ကုမၞိဟ်လဵု၊ မၞိဟ်လဵုတာလျိုၚ်နွံ၊ မၞိဟ်လဵုဒးဒုၚ်တာလျိုၚ်ဂှ် ဆက်မၚ်ဗဵုအာပၠန်မ္ဂး သွဟ်ကၠးကၠုၚ်မာန်ရောၚ်။