စရၚ်မၞိဟ်ဂွံအခေါၚ်ကဵုမာဲဂှ် တုဲကၠုၚ်အလန်ပထမတေံလေဝ် မၞိဟ်ကၠုၚ်ရံၚ်အောန်တုဲ ကာတ်ဗာန်အလန်ဒုတိယဏံလေဝ် မၞိဟ်ဂွံကၠုၚ်ရံၚ်ဂှ် ဟွံမွဲပၠန်ရောၚ် ဂကောံ ကမ္မယှေန်ဍုၚ်မန်မွဲတၠဂှ် ဟီုရ။

“စရာဲမၞိဟ်ဂွံကၠုၚ်ကဵုမာဲဂှ် ကာတ်ဗာန်လေဝ် ၜိုတ်ဆဂွံကာတ်ဗာန်ရ၊ အလန်ကၠာတေံလေဝ် မၞိဟ်ဂွံကၠုၚ်ရံၚ်ဂှ် အောန်ကွေံကွေံ၊ တ္ၚဲဏံ ကာတ်အလန်ဒုတိယ သွက်ပေါဲရုဲမာဲ သကုတ် (၂) ပၠန်လေဝ် မၞိဟ်ဂွံကၠုၚ်ရံၚ်ဂှ် ဟွံမွဲပၠန်ရ” သာ်ဝွံ ညးဟီုရ။

သွက်ပေါဲရုဲမာဲသကုတ် (၂) ဂှ် စတမ်နူဂိတုနဝ်ဝေမ်ဗာ (၂၁) ဒဵုစိုပ် ဒဳဇြေမ်ဗာ (၄) တေံ ပွိုၚ် (၁၄) တ္ၚဲ ကာတ်ဗာန်အာစရၚ်မၞိဟ်ကဵုမာဲ ပ္ဍဲရုၚ်ကမ္မယှေန်တအ်ရောၚ် နူတနေံဏံ (နဝ်ဝေမ်ဗာ ၂၀) ဂှ် လလောၚ်ပ္တိတ်လဝ်ရ။

ပေါဲရုဲမာဲ (၂၀၂၅) ဂှ် ကမ္မယှေန်ပၞာန်တအ် ကၠောန်ဗဒှ်အာ (၃) သကုတ်နွံတုဲ သၞာံ ပေါဲရုဲမာဲ (၂၀၂၅၊ ၂၀၂၆) ဏံဂှ် ညးဍုၚ်ကွာန်တအ်ဗွဲမဂၠိုၚ် စိုတ်ဟွံလုပ်စတုဲ စရၚ်မၞိဟ်ကဵုမာဲကာတ်ဗာန်လဝ်ဂှ်လေဝ် မၞိဟ်ကၠုၚ်ရံၚ်ကျောဝ်ဟွံမွဲရောၚ် ဂကောံကမ္မယှေန်အဆံၚ်ဆံၚ်ၚ်တအ်ဟီုရ။

“စရၚ်ဂှ် စၞောန်စှေ်တှေ် ဒးကာတ်ဂှ် ဒးကာတ်ရ၊ ကာတ်လေဝ် ပါဲနူဗော်ကျဖောအ်ကဵု မၞိဟ်ထံက်ဂလာန်ကဵု ဍေံတုဲတှေ် ညးဍုၚ်ကွာန်တအ် မွဲလေဝ်စိုတ်ဟွံလုပ်စပုဟ်၊ ဂွံတက်ဗီု ဒးပတိုန်ဒုၚ်စဳရေၚ်ညိဂှ် ဒးဗက်ကော်ကေတ်မၞိဟ်အကြာအရာပ်ဏီ” သာ်ဝွံ ဂကောံကမ္မယှေန်အရာပ် လတူဍုၚ်မုဟ်ဍုၚ်မွဲတၠ ဟီုရ။

သွက်ပေါဲရုဲမာဲ သကုတ် (၁) ဂှ် ကၠောန်ဗဒှ် ပ္ဍဲဂိတုဒဳဇြေမ်ဗာ (၂၈) တေံတုဲ တုဲကၠုၚ်သေပ်တေမ်ဗာ (၃၀) ဒဵုကဵုအံက်တိုဝ်ဗာ (၂၀) ပွိုၚ် (၂၁) တ္ၚဲ ကာတ်ဗာန်ကၠုၚ်လဝ်စရၚ်မၞိဟ်ကဵုမာဲ ပ္ဍဲရုၚ်ကမ္မယှေန်နွံရ။

ပေါဲရုဲမာဲ သၞာံ (၂၀၂၅) သကုတ် (၁) ဂှ် သွက်ဂွံကၠောန်ဗဒှ်အာ ပ္ဍဲဂိတုဒဳဇြေမ်ဗာ (၂၈) တုဲ ပ္ဍဲတွဵုရးဍုၚ်မန်ဂှ်မ္ဂး ပွိုၚ်ဍုၚ်ကျာ်ထဝ်၊ သဓီု၊ တ္ကအ်ခၟိုၚ်၊ ပွိုၚ်ဍုၚ်ကျာ်မြဟ်ကဵု ပွိုၚ်ဍုၚ်မတ်မလီု (၅) ပွိုၚ်ဍုၚ်ဂှ် သွက်ဂွံကၠာန်အာနွံတုဲ သကုတ် (၂) ဂှ်ဝွံ ကၠောန်ဗဒှ် ပ္ဍဲသၞာံ (၂၀၂၆) ဂိတုဂျာန်နဝါရဳ (၁၁) ပ္ဍဲပွိုၚ်ဍုၚ်ၜဳကလေၚ်၊ ပံၚ်၊ မုဟ်ဍုၚ်၊ ဇြပ်ဗု၊ ပွိုၚ်ဍုၚ်ရေဝ်ဂှ်ရောၚ် ဂွံတီကေတ်ရ။