တိဝါဗ္ၚဆက်စၠောံ အကြာဍုၚ်ကွာန်တအ်ဂှ် နူကဵုဌာနတိတအ် ၜိုန်ရကၟာတ်တာဒၞာလဝ် ညံၚ်ဟွံဂွံပလီု ပတိတ်လဝ်ပၟိၚ်တေၚ်တေၚ်နွံကီုလေဝ် ဇၟာပ်ပွိုၚ်ဍုၚ်ဂှ် ပလီုတိဝါတုဲ တက်သွံထောံဂအာၚ်သ္ၚိ ကြပ်အိုတ်မံၚ်ယျရောၚ် သၞာဲဒဴဌာနၜတ်တိ စလဝ်ပေန်ဇြေန် (တာလျိုၚ်ပြေ) မွဲတၠ ဟီုထ္ၜးရ။

“တိဝါဗ္ၚဂှ် နူလက်ထက်အလဵုအသဳ အေန်အေလ်ဒဳတေံလေဝ် ညံၚ်ဟွံဂွံပလီုဂှ် တာဒၞာပတိတ်လဝ်စၞောန်တုဲတုဲမံၚ်ရ၊ လၟုဟ် လက်ထက်တၠအဝဵုပၞာန်လၟုဟ်ဏံလေဝ် စၞောန်ပၟိၚ်ဂှ် အတိုၚ်ဂှ် တာဒၞာလဝ်တေၚ်တေၚ်ဖိုဟ်ရ၊ ဆဂး ဌာနအဆံၚ်သၟဝ်ဏံ ပံၚ်ကဵု ရဲကၠောန်စအဆံၚ်သၟဝ်ဏံတုဲတှေ် တိဝါဆက်စၠောံ အကြာကွာန်မွဲကဵုမွဲဂှ် ပလီုထောံတုဲ တက်သွံစဂအာၚ်သ္ၚိ ကြပ်အိုတ်အာဣရ” သာ်ဝွံ သၞာဲဒဴဌာနၜတ်တိ စလဝ်ပေန်ဇြေန်ဂှ် ဟီုရ။

တိဝါဗ္ၚ ဆက်စၠောံလဝ် အကြာကွာန်မွဲကဵုမွဲ မ္ၚးဍုၚ်၊ မ္ၚးကွာန်ဗွဲမဂၠိုၚ်ဂှ်ဝွံ မွဲဨကဂှ် ဒၞာဲခိုဟ်မ္ဂး ကဵုလက်ကိုဋ်နွံတုဲ ဒၞာဲဓမ္မတာဂှ်မ္ဂး ကဵုလ္ၚီကိုဋ် အကာဲအရာ ဒေသညးကဵုညး နွံမံၚ်ရ။

တက်သွံဂအာၚ်မ္ဂး နကဵုအယျဲဂအာၚ် (၄၀) ပေ၊ (၆၀) ပေဂှ် တန်တဴကဵုဒၞာဲတုဲ မွဲဂအာၚ် အောန်အိုတ် (၂၀၀) ကိုဋ်၊ (၅၀၀) ကိုဋ်၊ ဒဵုကဵု (၁၀၀၀) ကိုဋ်လေဝ် သွံရာန်မံၚ်နွံရ။

“ခေတ်ဏံ ရဲတၠဩန် ပံက်သွံဂအာၚ်တအ် လောဲအိုတ်ရ၊ ပံၚ်ကဵုဌာနၜတ်တိ၊ ပံၚ်ကဵု သ္ကိုပ်အုပ်ဓုပ်ဍုၚ် သ္ကိုပ်အုပ်ဓုပ်ကွာန်၊ တိဝါတာဒၞာလဝ်လေဝ် ဗ္စဩန်တုဲ ပံက်ဂအာၚ်ဂွံ၊ လတူတေံ ၜိုတ်လဵုဒၞာဒၞာ သၟဝ်ဏံကဵု သၟဝ်ဏံ ပရအ်စညးသ္ကအ်ဒးတှေ် ကၠောန်ဂွံရ၊ ရံၚ်ကေတ်ရ ဝါမ္ၚးကွာန်စဂှ် ဇၟာပ်ပ်ကွာန်ရ ပံက်သွံထောံဂအာၚ် ကြပ်အိုတ်ဟီုဂွံ” သာ်ဝွံ ညးဆက်ဟီုရ။

တိကၠအ်ဂအာၚ်သ္ၚိဂှ် ၜိုန်ရသွံရာန်ခိုဟ်မွဲကီုလေဝ် မၞိဟ်ရာန်သိုၚ်သ္ၚိဂှ် နွံအောန်တုဲ မၞိဟ်ထိၚ်ရာန်လဝ် သွက်ဂွံသၠာဲဂတး သွံရာန်ပရေၚ်ပိုန်ဒြပ်ကဵု ဂအာၚ်သ္ၚိဂၠိုၚ်ဂှ်ရ ဂအာၚ်သ္ၚိဂှ် ၚုဟ်က္ဍၚ်တိုန်မံၚ်ရောၚ် ရဲရေၚ်တၠုၚ် သွံရာန်ဂအာၚ်သ္ၚိလ္ၚဵု ဟီုရ။

လၟုဟ်မ္ဂး ကမၠောန်ပံက်သွံဂအာၚ်သ္ၚိဂှ် ဒှ်မံၚ်ပရေၚ်ပိုန်ဒြပ်ဇၞော်ဇၞော်မွဲတုဲ တိဝါဗ္ၚ ဆက်စပ်ကဵု မ္ၚးဍုၚ်၊ မ္ၚးကွာန်တအ်ဂှ် ညောန်ကြပ်ကဵုအိုတ်အာကွေံကွေံယျရောၚ် ဂွံတီကေတ်ရ။