ပေဲါရုဲမာဲ သၞာံ (၂၀၂၅) ကမ္မယှေန်ပၞာန်တအ် ကၠောန်ဗဒှ်ဏံဂှ် အခိၚ်သှ်ေမုဟွံလအ်ရကီုလေဝ် ဂကောံကဵုပညာမာဲ သွက်ညးဍုၚ်ကွာန် ဒဵုကဵုလၟုဟ် ဟွံမွဲဏီရောၚ် ဂကောံမှာဇန်မန် မွဲဂကောံဂှ် ဟီုရ။

ဇၟာပ်ပေါဲရုဲမာဲဒှ်ကၠုၚ်မ္ဂး နကဵုသွာၚ်ညးဍုၚ်ကွာန် သွက်ဂွံစုတ်ကဵုမာဲ ဗွဲမပြေပြံၚ်မာန်ဂှ် ဂကောံကဵုပညာမာဲ ကေၚ်ချဳဒရာၚ်ကၠုၚ်နွံတအ်ဂှ် အလန်ပေါဲရုဲမာဲ သၞာံ (၂၀၂၅) ဏံ မုဂကောံလေဝ် ချဳဒရာၚ်ဟွံမွဲဏီရောၚ် သ္ဂးရ။

“ဒဵုကဵုလၟုဟ်ဂှ် သွက်ညးဍုၚ်ကွာန်တအ် ဂွံစုတ်ကဵုမာဲလေပ်၊ ဗီုပြၚ်လဵုဂွံစုတ်မာဲ ဗီုပြၚ်စုတ်တှ်ေ ဒှ်မာဲဒတန် ဒှ်မာဲပါဲ ဗီုပေါဲရုဲမာဲတုဲကၠုၚ်တေံတှ်ေ နကဵုသွာၚ်ညးဍုၚ်ကွာန်တအ် ဂကောံလ္ပာ်မှာဇန်တအ် အစဳဇန်ကဵုပညာမာဲ အကြာညးဍုၚ် ကွာန်တအ် ဂၠိုၚ်ကဵုဂကောံနွံကၠုၚ်မံၚ်၊ ပေါဲရုဲမာဲအလန်ဏံ မုဂကောံလဵုလေဝ် ချဳဒရာၚ်ဟွံမွဲဏီပုဟ်” သာ်ဝွံ ညးတာလျိုၚ် ဂကောံမှာဇန်မွဲဂကောံဂှ် ဟီုထ္ၜးရ။

ပေါဲရုဲမာဲ သၞာံ (၂၀၂၅) ကမ္မယှေန်ပၞာန်တအ်ကၠောန်လၟုဟ်ဂှ် လ္ပာ်ဂကောံပၠန်ဂတးဂမၠိုၚ်တအ် ဒစဵုဒစးလဝ်ဇၞော်ကဵုဇြဟတ်တုဲ ညးလုပ်ပြိုၚ်ပေါဲရုဲမာဲကီု ညးဘိုၚ်ပူဗိုၚ်တအ်ကီု သွက်ဂွံကေတ်အာအရေဝ်နွံမံၚ်ရောၚ် ပ္တိတ်လလောၚ်လဝ်ရ။

“ဂွံချဳဒရာၚ်ပေါဲရုဲမာဲ (၂၀၂၅) ဏံဂှ်တှ်ေ နကဵုညးဍုၚ်ကွာန်တအ် ကြေပ်ဂြတ်မံၚ် အကြာၜါလ္ပာ်တအ်နွံမံၚ်၊ မုပရောဟီုတှ်ေ ချဳဒရာၚ်လ္ပာ်ပလီု ကမၠောန်ပေါဲရုဲမာဲဍေံတှ်ေ ကမ္မယှေန်ပၞာန်တအ် သွက်ဂွံစောဲစုတ်ဒုဟ်၊ ဗီုဂှ်ကီု ယဝ်ရဘိုၚ်ချဳဒရာၚ် ပေါဲရုဲမာဲပၠန်တှ်ေ ရဲပၠန်ဂတးတအ် စောဲစပ်ဒုဟ်တုဲ ကေတ်အရေဝ် သီုၜါလ္ပာ်ဂှ် ဘပဠလဝ် ညးဍုၚ်ကွာန်တအ်နွံမံၚ်တှ်ေ ဂကောံချဳဒရာၚ်သွာၚ်ညးဍုၚ်ကွာန်တအ် မုလေဝ်ဟွံဂံၚ်ချပ်ချဳဒရာၚ်အိုတ်ပုဟ်” သာ်ဝွံ မၞိဟ်တာလျိုၚ်ဂကောံမှာဇန်မွဲဂကောံပၠန်ဂှ် ထပ်ဟီုရ။

ပေါဲရုဲမာဲ သၞာံ (၂၀၂၅) ဏံဂှ် နူကဵုကမ္မယှေန်ပေါဲရုဲမာဲတအ် သၠာဲလဝ်ဗီုပြၚ်ကဵုမာဲတုဲ ဖန်ဗဒှ်လဝ် နဲစုတ်ကဵုမာဲ နကဵုစက်ရ။ နဲစုတ်ကဵုမာဲ နကဵုစက်ဏံဂှ် ကမ္မယှေန်တအ် ဟွံပါ်တြးလဝ်ကဵု အကြာအလံၚ်အမာတ်၊ ပ္ဍဲအကြာညးဍုၚ်ကွာန်တအ်တုဲ နကဵုညးဍုၚ်ကွာန်ဓမ္မတာတအ် ဗီုလဵုဂွံစုတ်ကဵုမာဲဂှ်လေဝ် ဟွံကေၚ်ဆဵုလဝ်ရ။

နဲစုတ်ကဵုမာဲဂှ် ဟိုတ်နူညးဍုၚ်ကွာန်တအ် ဟွံဆဵုလဝ်နမတ်ဂှ်ကီု၊ ပေါဲရုဲမာဲ (၂၀၂၅) ဏံဂှ် ဒှ်အခိၚ်ပရေၚ်ဍုၚ်ကွာန်၊ ပရေၚ်ပၞာန် ထုဲထၞာန်မံၚ်ဂှ်ရ နကဵုညးဍုၚ်ကွာန်အဆံၚ်ဆံၚ်တအ် စိုတ်ဟွံလုပ်စတုဲ မၞိဟ်ဂွံအာတိတ်ကဵုမာဲဂှ် ဗွဲမအောန်ရဒှ်မာန်ရောၚ် ညးအခါတ်အကာဲဂမၠိုၚ် တၟော်လဝ်အိုတ်ဂှ် ဂွံတီကေတ်ရ။