မၞိဟ်ယဲဂှ် ဒှ်ကပေါတ်စမ်ၜတ် ဒံက်တာသဝ်ဝန်တအ်ရရောၚ် ဒံက်တာ မကေတ်မံၚ်တာလျိုၚ် ရုၚ်ဂဥုဲပုဂ္ဂလိက လတူဍုၚ်မတ်မလီု ဂွံလဝ်တဆိပ် ဒံက်တာ (Bachelor of Medicine, Bachelor of Surgery) M.B.B.S မွဲတၠဂှ် ဟီုရ။
“မၞိဟ်ယဲဂှ် ဒှ်ကပေါတ်စမ်ၜတ် သွက်ဒံက်တာသဝ်ဝန်တအ်ရောၚ်၊ စမ်ၜတ်အကာဲအရာယဲကီု၊ ပ္ဍဲကဵုပါ်ဓာတ်ကီု၊ ပါ်ကရေက်ကီုဂှ် လွဳစမ်ၜတ်ရံၚ်ဖအိုတ်ရ၊ လွဳဗီုဏံ ပါ်ကရေက်ဗီုဏံတှေ် မုဒှ်၊ ကဵုဂဥုဲဂကူဏံတှေ် မုဒှ် ဒးစမ်ၜတ်မံၚ်တွဵုဂှ်ရ၊ မၞိဟ်တအ်ဂှ် ဒှ်ကပေါတ်စမ်ၜတ်ယဲ ဟီုဂွံ” သာ်ဝွံ ဒံက်တာဂှ် ဟီုရ။
အခါလၟုဟ်ဝွံ ရုၚ်ဂဥုဲပုဂ္ဂလိကဂှ် မၞိဟ်တအ်အာလွဳစမ်ၜတ်ယဲဂၠိုၚ်ကၠုၚ်မံၚ်ဂှ်တုဲ ရုၚ်ဂဥုဲပုဂ္ဂလိကဂမၠိုၚ်တအ်ဂှ် သီုဒှ်ဒၟံၚ် ဌာန်ဗ္တောန်ကွတ်ဂဥုဲ ကေုာံ ဌာန်ဒတောဲကဝါ် သွက်အ္စာဂဥုဲတၟိတၟိတအ် ဂွံလ္ၚတ်စမ်ၜတ်မွဲဌာန်လေဝ် ဟီုမာန်ရ။
“ရုၚ်ဂဥုဲပုဂ္ဂလိဂမၠိုၚ်ဂှ် ပါဲနူကွဳစမ်ၜတ်ယဲတုဲတှေ် သီုကဵုဒှ်ဒၞာဲဒတောဲကဝါ် သွက်ဂွံလွဳၜံၚ် အ္စာဂဥုဲတၟိတအ်မွဲဏောၚ်၊ မၞိဟ်ယဲတအ် ကၠုၚ်လွဳယဲတှေ် ဒတောဲကဝါ် လဴသောၚ်ကလး နဇိုၚ်နတဲရောၚ်၊ ပ္ဍဲကဵုပါ်ကရေက်ပၠန်လေဝ် သီုဗ္တောန်အာ နလိက် သီုနဇိုၚ်နတဲလေဝ် ဒှ်ရောၚ်” သာ်ဝွံ ဒံက်တာဂှ် ဆက်ဟီုထ္ၜးရ။
ရုၚ်ဂဥုဲကၟိန်ဍုၚ်ဗၟာ၊ ဍုၚ်မန်ဝွံ ကြဴနူကဵု အလဵုအသဳသမ္မတဥူတိၚ်သိၚ် တိုန်ဒှ်သမ္မတ သၞာံ (၂၀၁၀) တေံတုဲ တၠဓနသေဌဳတအ် ပံၚ်တောဲကဵု ဒံက်တာသဝ်ဝန်လ္ၚဵုတအ်တုဲ ပံက်ပတန်ကၠုၚ်ဇၟာပ်ရး၊ ဇၟာပ်တွဵုရး နွံဗွဲမဂၠိုၚ်ဂၠၚ်ရ။
ဗွဲကြဴဏံ သၞာံ (၂၀၂၁) ဂှ် ဒပ်ပၞာန်သီအဝဵုတုဲ သၞာဲဒဴ သၟဝ်ဌာနဝန်ဇၞော် ပရေၚ်ထတ်ယုက် ဗွဲမဂၠိုၚ် ဒစဵုဒစး ကုကမ္မယှေန်ပၞာန် သ္ပသဳဒဳအေမ် CDM ဂၠိုၚ်တုဲ သၞာဴဒဴ ဒံက်တာသဝ်ဝန် သၟဝ်ဌာနဝန်ဇၞော် ပရေၚ်ထတ်ယုက်ဗွဲမဂၠိုၚ် ပံက်ပတန်ကၠုၚ် ဗဒမ်လွဳယဲ ပူဂဵုညးကဵုညး၊ ပတန်ကၠုၚ် ရုၚ်ဂဥုဲပုဂ္ဂလိက ညးကဵုညးနွံဂၠိုၚ်ကၠုၚ်ရ။
ဘဝဒၟံၚ်မၞိဟ်တအ်ဂှ် အဆံၚ်သၠုၚ်တိုန်ကီု၊ လညာတ်သမ္တီသၠုၚ်တိုန်ကီုတုဲ မၞိဟ်တအ်ဗွဲမဂၠိုၚ် အဝဲခန္ဓမံၚ်ခိုဟ်မံၚ်ဂှ်ကီု၊ ခန္ဓကာယယောၚ်ယာမွဲမွဲသာ်ကီု၊ ကတဵုဒှ်ဝေဒနာမွဲမွဲသာ်ကီု အာစမ်ၜတ် အာထ္ၜးယဲ အာလွဳယဲ ပ္ဍဲရုၚ်ဂဥုဲအဆံၚ်သၠုၚ် ရုၚ်ဂဥုဲပုဂ္ဂလိနွံဂၠိုၚ်ရ။
ဟိုတ်နူဂှ်တုဲ ပ္ဍဲရုၚ်ဂဥုဲပုဂ္ဂလိကလတူဍုၚ်ဂမၠိုၚ်ဂှ် မၞိဟ်ဂမၠိုၚ်တအ် အာထ္ၜးစမ်ၜတ် လွဳလွတ်ယဲဂၠိုၚ်ဂှ်ကီု၊ ဆဂှ်သၟးဟွံက ရုၚ်ဂဥုဲပုဂ္ဂလိကဗွဲမဂၠိုၚ်ဂှ် သီုကဵုဒှ်ဌာန်ဒၞာဲ ဒတောဲကဝါ် အ္စာဂဥုဲတၟိတၟိတအ်မွဲတုဲ မၞိဟ်ယဲတအ်ဂှ် ဒှ်ကပေါတ်စမ်ၜတ် သွက်အ္စာဂဥုဲ၊ သွက်ဂွံလွဳၜံၚ်ပ္တိတ်အ္စာဂဥုဲတအ်မွဲရောၚ် ဒံက်တာ (Bachelor of Medicine, Bachelor of Surgery) M.B.B.S ဂှ် ဟီုထ္ၜးလဝ်ဂှ် ဂွံတီကေတ်ရ။
