ပ္ဍဲဍုၚ်မန် ဟိုတ်နူရာန်ကၠေၚ်ဝါတ်တုဲ ကွဳစက်ပရဟိတ ရီုဗၚ်ပရေၚ်မၞိဟ်လ္ၚဵု ဒးဒေါံဇူလဝ်နွံရောၚ် ဂကောံပရဟိတ ရေၚ်တၠုၚ်ရီုဗၚ်ပရေၚ်မၞိဟ်ဍုၚ်မန်မွဲတၠ ဟီုထ္ၜးရ။

“မွဲကာလရာန်ကၠေၚ်ဝါတ်ဏံ ကိစ္စပလံၚ်မၞိဟ်ဂိယဲဂှ်တှေ် အကြာဗွိုၚ်ဇကုကဵုဇကု ဒုၚ်ပလံၚ်ပြေပြံၚ်ကီုလေဝ် ယဝ်ဒးအာဒုၚ်ပလံၚ်ညးဂိယဲ သ္ၚောဲညိ တိတ်အာနူဗွိုၚ်ဒေသဇကုတှေ် အာဟွံပြေပြံၚ်ရ၊ ဟိုတ်နူဂှ်ရ ကိစ္စပလံၚ်မၞိဟ်ဂိယဲ သ္ၚောဲ သ္ၚောဲတှ်ေ ပြဟ်ပြဟ်ဏံ ဒးဒေါံဇူလဝ်ကၠာ၊ ဠကေတ်ကၠေၚ်ပြေပြံၚ်ပၠန်မှ ဆက်ပလံၚ်အာ မၞိဟ်ဂိယဲအတိုၚ်တြေံတေံပၠန်” သာ်ဝွံ နာဲမိုဝ်ထောန် ဂကောံပရဟိတ ရေၚ်တၠုၚ်ရီုဗၚ်ပရေၚ်မၞိဟ်ဍုၚ်မန် ဟီုရ။

ပ္ဍဲဒေသဍုၚ်မန်ဂှ် စတမ်နူဂိတုနဝ်ဝေမ်ဗာမံက်ဏံ တၠဆေၚ်သွံကၠေၚ်စက်ဂမၠိုၚ်တအ် ကၠေၚ်ပိုတ်သ္ဂးတုဲ သွံကဵုဒၟံၚ်ကၠေၚ်စက် ကုညးဍုၚ်ကွာန်တအ် နကဵုဗၞတ်ဗ္ၜတ်ရ။

ထ္ၜးဟိုတ်ကဵုကၠေၚ်ပိုတ်သ္ဂးတုဲ ဆေၚ်သွံကၠေၚ်လ္ၚဵုဂှ် ကွဳစက်ကာမ္ဂး သွံကဵုဗၞတ်ဗ္ၜတ်ကာ၊ ကွဳလိုန်ဓာတ်မ္ဂး သွံကဵုဗၞတ်ကွဳလိုန်ဓာတ်နွံတုဲ ဆေၚ်သွံကၠေၚ်လ္ၚဵုမ္ဂး ကွဳစက်ကာကီု ကွဳလိုန်ဓာတ်ကီု သွံကဵုဖာနူဂယးမွဲလစုတ်တုဲ ဖာသဝ်တ္ၚဲဂှ် ဟွံကၟာတ်ဆေၚ်မွဲသာ် ဒေါံဇူထောံ ပရေၚ်သွံကၠေၚ်ရ။

ဒၟာနူရာန်ကၠေၚ်ဒှ်ခက်ခုဲဂှ်တုဲ ကွဳစက်ဂကောံပရဟိတ ရေၚ်တၠုၚ်ရီုဗၚ်ပရေၚ်မၞိဟ်ဂမၠိုၚ် ပါဲနူကွာန် / အရာပ်ဇကုတုဲ ဒးအာဇက်ပလံၚ်မၞိဟ်ဂိယဲဒှ်ဒဒိုက် ဒေသတၞဟ်ဟ်ဂှ် ဒးဒေါံဇူလဝ်ရ။

“ဂကောံပရဟိတပိုဲတှ်ေ မၞိဟ်ဂိယဲ မၞိဟ်ဒှ်ဒဒိုက် နူဒေသတၞဟ်တၞဟ်တအ်လေဝ် ကေတ်နၚ်အဆက် ကၠုၚ်အာတ်ရီုဗၚ်စိုပ်တှေ် ပိုဲကဵုမံၚ်အရီုအဗၚ် ပလံၚ်ကဵုနွံမံၚ်၊ မွဲဟူရာန်ကၠေၚ်ဝါတ်ဏံတုဲတှ်ေ ဂွံအာဇက်ပလံၚ်မၞိဟ်ဂိယဲကီု မၞိဟ်ဒှ်ဒဒိုက် နူဒေသတၞဟ်တၞဟ်တအ်ဂှ်တှ်ေ ဍေံဒှ်ခက်ခုဲညိ၊ ဒးဒေါံဇူလဝ်မွဲအံၚ်ကၠာ” သာ်ဝွံ နာဲမိုဝ်ထောန်ဂှ် ဆက်ဟီုရ။

ပ္ဍဲဍုၚ်မန် ဒၟာနူရာန်ကၠေၚ်ဝါတ်ဂှ်တုဲ ကၠေၚ်အဆံၚ်သဝ်ဂှ် သွံသ္ပထောံ ကၠေၚ်အဆံၚ်သၠုၚ်တုဲ ကေတ်ၚုဟ်ကၠေၚ် အဆံၚ်သၠုၚ်ဂှ်ကီု၊ ထ္ၜးဟိုတ်ကဵု ကေတ်ကၠေၚ်ဝါတ်ဂှ်တုဲ သၠုၚ်ပတိုန်ၚုဟ်ကၠေၚ်ကီု ကတဵုဒှ်ကၠုၚ်ရ။

ကိစ္စရာန်ကၠေၚ်ဝါတ်ဏံဂှ် နကဵုညးဍုၚ်ကွာန်တအ် ကတဵုဒှ်ဒဒိုက်ဖအိုတ်တုဲ နကဵုမၞိဟ်တာလျိုၚ်အဆံၚ်လတူတအ် ညံၚ်ဂွံဘိုၚ်သောၚ်ကဵုဗွဲမပြဟ်ညိဂှ် ညးက္ဍိုက်ပ်ဂကောံပရဟိတ ရီုဗၚ်ပရေၚ်မၞိဟ် ပ္ဍဲဍုၚ်မန် ဗိုလ်ဗိုလ်ဝေန် ချူပတိုန်ထ္ၜးလဝ် လတူမုက်လိက်ညးနွံဂှ် ဂွံတီကေတ်ရ။