လတူပေါဲရုဲမာဲ သၞာံ (၂၀၂၅) ကမ္မယှေန်ပၞာန်တအ်က္ဍိုက်ပ်တုဲ ကၠောန်ဗဒှ်ဂှ် နကဵုဗော်ဍုၚ်မန်တၟိ မုဟွံပတိတ်ရမျှာၚ်လစွံစိုတ်မွဲသာ်ရောၚ် ညးကြပ်ကဵု ကမ္မတဳကေၚ်ကာဗဟဵုမွဲတၠ ဟီုရ။
ပေါဲရုမာဲ ကမ္မယှေန်ပၞာန်တအ် သွက်ဂွံကၠောန်ပ္ဍဲသၞာံ (၂၀၂၅)၊ ဂိတုဒဳဇြေန်ဗာကဵု သၞာံ (၂၀၂၆) မံက်တေံဂှ် နကဵုဗော်ဍုၚ်မန်တၟိ ထံက်ဂလာန် ဒစဵုဒစး မုဟွံပတိတ်ရမျှာၚ် လစွံစိုတ်မွဲသာ်ရောၚ် သ္ဂးရ။
“လတူပေါဲရုဲမာဲ (၂၀၂၅) ကမ္မယှေန်ပၞာန်တအ်ကၠောန်ဂှ် နကဵုဗော်ဍုၚ်မန်တၟိ မုလေဝ်ညးဟွံပတိတ်ရမျှာၚ်လစွံစိုတ်မွဲသာ်ပုဟ်၊ ခိုဟ်ကီု ပရေံကီု ဒစဵုဒစးကီု ထံက်ဂလာန်ကီု မုလေဝ်ညးဟွံပတိတ်လစွံစိုတ်ပုဟ်၊ ညးမံၚ်ကၞပ်သ္ၚိတ်ထောံ အတိုၚ်ဏံရ” သာ်ဝွံ ညးကြပ်ကဵု ကမ္မတဳရေၚ်တၠုၚ်ကေၚ်ကာဗဟဵု ဗော်ဍုၚ်မန်တၟိဂှ် ဟီုရ။
လတူပ္ၚံက်ပရေၚ်ဍုၚ်ကွာန် မွဲမွဲပ္ၚံက်မ္ဂး သွက်ညးဍုၚ်ကွာန်တအ် ဂွံသ္ပသဇိုၚ်တုဲ ခိုဟ်ကီု ပရေံကီု နကဵုဗော်ဍုၚ်မန်တၟိ နကဵုလိက်ကီု နကဵုဂလာန်ကီု ပ္တိတ်ကၠုၚ်မံၚ်ရမျှာၚ်လစွံစိုတ်နွံ ကၠုၚ်လၟိုန်ရ။
ဆဂးဂှ် ပ္ဍဲကဵုပေါဲရုဲမာဲ သၞာံ (၂၀၂၅) ကမ္မယှေန်ပၞာန်တအ် က္ဍိုက်ပ်ကၠောန်ဏံဂှ် ဟွံပါ်ပါဲ၊ ဟွံကဵုဇြဟတ်မွဲသာ် ဒၟံၚ်ထောံအဒေါဝ်ရောၚ် ညးကြပ်ကဵု ကမ္မတဳရေၚ်တၠုၚ်ကေၚ်ကာ ဗဟဵုဂှ် ဆက်ဟီုရ။
“မုဟိုတ်ညးဟွံပတိတ်ရမျှာၚ်လစွံစိုတ်ဂှ် ညးဟွံဟီုကလးပုဟ်၊ ကာလညးဆဵုဂဗကဵု ပေါဲကောံဓရီုမွဲမွဲသာ်ကီု၊ ကာလဆဵုဂဗကဵု ဂကောံမှာဇန်နာနာတအ်ကီုတှေ် လတူပေါဲရုဲမာဲ (၂၀၂၅) ဏံ နကဵုဗော်ဍုၚ်မန်တၟိ မုလေဝ်ဟွံပတိတ်ရမျှာၚ် လစွံစိုတ်မွဲသာ်ရောၚ်ဂှ် ညးတအ်ဟီုကလးလဝ်နွံ” သာ်ဝွံ ညးဟီုရ။
အပ္ဍဲကဵုဗွိုၚ်ဂကူမန်မ္ဂး ဗော်ဍုၚ်မန်တၟိဂှ် ဒှ်ဗော်ရပ်လွဟ်ပၠန်ဂတး ဩဇာသၠုၚ်အိုတ်တုဲ လတူပေါဲရုဲမာဲ သၞာံ (၂၀၂၅) ကမ္မယှေန်ပၞာန်တအ်ကၠောန်လၟုဟ်ဂှ် နကဵုဗော်ဍုၚ်မန်တၟိ သာ်လဵုပတိတ်ရမျှာၚ်လစွံစိုတ်ရောဂှ်လေဝ် မၚ်စၟဳကလၚ်မံၚ်နွံရ။
လတူပေါဲရုဲမာဲ သၞာံ (၂၀၂၅) ကမ္မယှေန်ပၞာန်တအ်က္ဍိုက်ပ်ကၠောန်လၟုဟ်ဂှ် ဒှ်ဂၠံၚ်သွက်ဂွံဆက်အာယုက် တၠအဝဵုပၞာန်တအ် ဂွံဆက်အုပ်ဓုပ်အာ သၟဝ်ဂၠံၚ်တရဴ အဝဵုပၞာန်ပေၚ်ပေၚ်တုဲ ဂကောံပၠန်ဂတးဂမၠိုၚ် ဒစဵုဒစးလဝ်ရ။
နကဵုဗော်ဍုၚ်မန်တၟိဝွံ အလန်ပေါဲရုဲမာဲ သၞာံ (၂၀၁၀) ဂှ် ဒစဵုဒစးလဝ်၊ ပေါဲရုဲမာဲ (၂၀၁၅) ဂှ် ဆဝ်ဗ္ၚုဟ်လဝ်ညံၚ်ဂွံစုတ်မာဲကဵု ညးစၞးမန်၊ ပေါဲရုဲမာဲ (၂၀၂၀) ပၠန်ဂှ် ဆဝ်ဗ္ၚုဟ်လဝ် ညံၚ်ဂွံစုတ်မာဲကဵု ညးစၞးဗော်ညဳသၟဟ်မန် သာ်ဝွံ ပတိတ်ကၠုၚ်ရမျှာၚ်လစွံစိုတ်နွံကၠုၚ် အဆက်ဆက်ရောၚ် ဂွံတီကေတ်ရ။
