ရုၚ်ဂဥုဲပုဂ္ဂလိက လ္တူဍုၚ်လ္ၚဵု ထ္ၜးယဲဝေဒနာမွဲမွဲသာ်မ္ဂး ကဵုဇြဟတ်ဓရိုဟ်ပါ်ကရေက်တုဲ အာတ်မိက်ကေတ်ဩန်သၟးနွံဂၠိုၚ်ရောၚ် ညးတၠခန္ဓယဲဝေဒနာပါ်ကရေက်လဝ် နူဇြပ်ဗုမွဲတၠ ဟီုရ။
ညးတၠယဲဝေဒနာမွဲမွဲတၠ ထ္ၜးယဲကဵုဒှ်၊ လွဳစမ်ၜတ်ယဲမွဲမွဲသာ်ကဵုဒှ် ဒံက်တာသဝ်ဝန် ရုၚ်ဂဥုဲပုဂ္ဂကလ္ၚဵုဂှ် ကဵုဇြဟတ်ဓရိုဟ်ပါ်ကရေက်တုဲ အာတ်မိက်ဩန် နွံဂၠိုၚ်မံၚ်ရောၚ် ညးတၠခန္ဓယဲဝေဒနာဂှ် ဟီုရ။
“ဗွဲမဂၠိုၚ်တှ်ေ အာထ္ၜးယဲကဵုဒှ်၊ အာလွဳစမ်ၜတ်ယဲမွဲမွဲသာ်ကဵုဒှ် အာရုၚ်ဂဥုဲပုဂ္ဂလိက သၟးရဂၠိုၚ်၊ ဒံက်တာသဝ်ဝန် ပ္ဍဲရုၚ်ဂဥုဲ ပုဂ္ဂလိကတအ်ပၠန်ဂှ် မုဒှ်ညိ ကဵုပါ်ကရေက်တွဵု၊ ပါ်ကရေက်မှ ပြေပြံၚ်ရောၚ်၊ ပါ်ကရေက်မှ ဗၠးသက်သာရောၚ် ဟီုကဵုဇြဟတ်ဓ ရိုဟ်လ္ပာ်ကရေက်သၟးဂၠိုၚ်၊ ဟီုပါ်ကရေက်တုဲတှ်ေ အာတ်မိက်ဩန် ဂၠိုၚ်ဂၠိုၚ်၊ မၞိဟ်ယဲဂှ်လေဝ် ဟွံပါ်ကရေက်တှေ် ဖေက်ယဲဇကုဟွံဗၠး ဒှ်ဂဝိၚ်တုဲတှ်ေ အတိုၚ်ဒံက်တာ သဝ်ဝန်တအ်ဟီုဂှ် ဒးဒုၚ်တဲနွံဂၠိုၚ်” သာ်ဝွံ မိလုၚ်ကျေန် ညးပါ်ကရေက်လဝ် နကဵုယဲဂုဟ် နူပွိုၚ်ဍုၚ်ဇြပ်ဗုဂှ် ဟီုထ္ၜးရ။
ပ္ဍဲရုၚ်ဂဥုဲပုဂ္ဂလိကလ္တူဍုၚ်လ္ၚဵုဂှ် မၞိဟ်တၠဝေဒနာယဲတအ် အာထ္ၜးယဲမွဲမွဲသာ်မ္ဂး ဒံက်တာသဝ်ဝန်တအ် ကဵုကၠုၚ်ဇြဟတ်ဓရိုဟ်လ္ပာ်ကရေက်တုဲ ယဝ်ဟွံပါ်ကရေက်မ္ဂး သီုကဵုဟီုဘပဠ ညံၚ်ဂွံဒးပါ်ကရေက်ရောၚ်ဂှ်လေဝ် မၞိဟ်တၠခန္ဓယဲဝေဒနာဂှ် ဆက်ဟီုထ္ၜးရ။
“ယဝ်ဇကု ဟွံမိက်ကရေက်ပုဟ်ဟီုတှ်ေ ဍေံဘဇၞော်တိုန်ယဲဇကု ဟွံကရေက်တှ်ေ မုဒှ်၊ ယဲဏံ မံၚ်လအ်တှေ် မုဒှ် မုဒှ် ဗီုတေံ ဗီုဏံ ဗီုမၞိဟ်ယဲဂွံဒးကရေက်ဂှ် ယဲဒးပါ်ကရေက်ယျတှ်ေ အောန်အိုတ်ဂှ် ဒးမံၚ်တွဵုရ ပ္ဍဲရုၚ်ဂဥုဲဍေံ (၅) တ္ၚဲ၊ မွဲသတ္တဟ၊ ဇှ်တှ်ေ အိုတ်ရ အကြာ (၁၀) ကိုဋ် (၂၀) ကိုဋ်၊ ၜိုတ်ပိုဲသ္ပသမ္တီတှ်ေ ယဲတၟေၚ်ကၠုၚ်မွဲမွဲသာ်တှ်ေ ပါ်ကရေက်သၟးရဂၠိုၚ်” သာ်ဝွံ ညးဟီုရ။
ဒံက်တာသဝ်ဝန် ပ္ဍဲရုၚ်ဂဥုဲပုဂ္ဂလိကလ္တူဍုၚ်မတ်မလီုဂှ် မၞိဟ်ယဲဝေဒနာတအ် ကၠုၚ်ထ္ၜးယဲ၊ ကၠုၚ်စမ်ၜတ်ယဲမွဲမွဲသာ်မ္ဂး ကဵုကၠုၚ်ဇြဟတ်ဓရိုဟ်လ္ပာ်ဒးပါ်ကရေက်တွဵု ကတဵုဒှ်ဂၠိုၚ်ကၠုၚ်ဂှ်တုဲ မၞိဟ်တၠယဲဝေဒနာလ္ၚဵုတအ် ပါဲသရုၚ်ထောံ ရုၚ်ဂဥုဲပုဂ္ဂလိက လ္တူဍုၚ်မတ်မလီုတုဲ အာစမ်ၜတ်ယဲ ရုၚ်ဂဥုဲပုဂ္ဂလိကပ္ဍဲလ္ဂုၚ် နွံဂၠိုၚ်ကၠုၚ်ရ။
ရုၚ်ဂဥုဲပုဂ္ဂလိကတအ် ဒၟာနူကဵုဇြဟတ်ဓရိုဟ်ပါ်ကရေက်ဂၠိုၚ်ကီု၊ အာတ်မိက်ဩန် ပ္ဍဲမၞိဟ်ယဲ ဂၠိုၚ်တိုန်မံၚ်ဂှ်ကီု လက္ကရဴဏံ ညးဍုၚ်ကွာန်သာမညဗွဲမဂၠိုၚ်ဂှ် ပါဲသရုၚ်ကၠေံ ရုၚ်ဂဥုဲပုဂ္ဂလိကလ္တူဍုၚ်ဂှ်တုဲ အာထ္ၜးယဲ၊ အာလွဳယဲ၊ အာစမ်ၜတ်ယဲ ပ္ဍဲရုၚ်ဂဥုဲဇၞော်လေဝ် ဂၠိုၚ်တိုန်မံၚ်သေဲသေဲရောၚ် ဂွံတီကေတ်ရ။
