နူအခိၚ်စလိုက်ဝှ် ဒဵုတ္ၚဲဏံ ၚုဟ်ထ္ၜိုတ်စှ်ေမံၚ်အဆက်ဆက်ကီုလေဝ် ရဲရာန်ကၠအ်ထ္ၜိုတ်ဂှ် နွံမံၚ်အတိုၚ်တြေံဖိုဟ်ရောၚ် ညးရေၚ်တၠုၚ်သွံရာန်ကၠအ်ထ္ၜိုတ် နူပွိုၚ်ဍုၚ်ဇြပ်ဗုမွဲတၠ ဟီုရ။

ရဲရာန်ကၠအ်ထ္ၜိုတ်ဂှ် ဗွဲမဂၠိုၚ်မ္ဂး ရဲညးအာကၠောန်စမံၚ် ပ္ဍဲဍုၚ်သၟာၚ်တအ် ပြၚ်ဖျဴနၚ်ဩန်တုဲ ဗက်ရာန်လဝ်ကၠအ်ထ္ၜိုတ်နွံဂၠိုၚ်ရ။

“ၚုဟ်ထ္ၜိုတ်ပရေံလေဝ် ရဲရာန်ကၠအ်ထ္ၜိုတ်ဂှ် နွံမံၚ်အတိုၚ်တြေံဖိုဟ်ရ၊ ပ္ဍဲကဵုရဲရာန်ကၠအ်ထ္ၜိုတ်တအ်ဗွဲမဂၠိုၚ်ဂှ်တှေ် ရဲ အာကၠောန်စမံၚ်ပ္ဍဲဍုၚ်သေံရ၊ ကၠောန်စဂွံတှ်ေ ပြၚ်ဖျဴနၚ်ဩန်တုဲ ကဵုမိမတအ် ရာန်လဝ်ကၠအ်ထ္ၜိုတ်နွံဂၠိုၚ်၊ ရဲနွံပ္ဍဲဍုၚ်တအ် ဂွံရာန်ဂှ်ဟွံမွဲ” သာ်ဝွံ နာဲမိုဝ်ကျဝ် ညးရေၚ်တၠုၚ်သွံရာန်ကၠအ်ထ္ၜိုတ် နူပွိုၚ်ဍုၚ်ဇြပ်ဗုဂှ် ဟီုရ။

ၚုဟ်ထ္ၜိုတ်ဂှ် ခြာပိပန်တ္ၚဲမ္ဂး အောန်စှေ်မံၚ် မွဲတဲ (၅၀) ဂၠိုၚ်ကဵုဝါတုဲ လၟုဟ်မ္ဂး ထ္ၜိုတ်အဆံၚ်သၠုၚ်အိုတ် RSS 1 (No.1) ဂှ် စှေ်အာ မွဲပံၚ် သၟဝ် (၃၀၀၀) ဒ္ကေဝ်တုဲ ထ္ၜိုတ်အဆံၚ်သဝ် USS 5 ဂှ် ၚုဟ်သှေ်မံၚ် အကြာ (၂၀၀၀) ပြၚ်ညိဓဝ်ရ။

ၜိုန်ဂှ်လေဝ် ကၠအ်ထ္ၜိုတ်တၞံမဆက်မတ် တဵုဂွံပွိုၚ် (၁) ကသီု၊ (၂) ကသီုဂှ် သွံမံၚ် အတိုၚ်တြေံဖိုဟ်တုဲ ပရေၚ်သွံရာန်လေဝ် မၞိဟ်ရာန်နွံမံၚ်အတိုၚ်တြေံဖိုဟ်ရောၚ် သ္ဂးရ။

“ကၠအ်ထ္ၜိုတ်ဂှ် ဒၞာဲဒးရး ၚုဟ်ဒးရးတှ်ေ သွံရာန်နွံမံၚ် အတိုၚ်ပကတိတြေံဖိုဟ်ရ၊ ၜိုန်ရၚုဟ်ထ္ၜိုတ်ပရေံလေဝ် ၚုဟ်ကၠအ်ထ္ၜိုတ်ဂှ် ဟွံစှ်ေအာပုဟ်၊ ယဝ်ရ ဒၞာဲခိုဟ် ဂကူခိုဟ် တဵုလွဳလဝ်တၞံကျေဝ်တှ်ေ ၚုဟ်ဂှ် ဘိုအ်ဂွံသဝ်စှ်ေအာဟွံမွဲပုဟ်၊ မန်ပိုဲတှ်ေ ပတှ်ကၠေအ်ရ၊ ကၠအ်ဂှ်ပၠန်လေဝ် ကၠအ်ထ္ၜိုတ်မှ ကၠအ်ထ္ၜိုတ်” ရဂှ် ညးရာန်လဝ်ကၠအ်ထ္ၜိုတ်ကဵုကောန် နွံဍုၚ်သေံ နာဲၚိုဲသဳ နူဍုၚ်ဇြပ်ဗု ဟီုရ။

ရဲအာကၠောန်စဍုၚ်သေံ ကေုာံ ဍုၚ်သၟာၚ်လ္ၚဵုတအ် ဗွဲမဂၠိုၚ်ဂှ် ကၠောန်ဂွံဩန်မ္ဂး ပြၚ်နၚ်တုဲ ရာန်ကၠအ်ထ္ၜိုတ်ဂၠိုၚ်ဂှ်ရ ၚုဟ်ကၠအ်ထ္ၜိုတ်ဂွံဗက်စှ်ေအာ ၚုဟ်ထ္ၜိုတ် ဒှ်ဟွံမာန်ရောၚ်ဂှ်လေဝ် ညးဆက်ဟီုရ။

ပ္ဍဲဍုၚ်မန်ဂှ် ကၠအ်ထ္ၜိုတ်နွံ (၅) ကိုဋ်ဨကပြၚ်တုဲ ပ္ဍဲဂှ်မ္ဂး ပွိုၚ်ဍုၚ်မုဟ်ဍုၚ်ကဵု ပွိုၚ်ဍုၚ်ဇြပ်ဗုသၟးဂှ် (၅) လက်ဨကပြၚ်နွံရ။ တော်ကဵုအလုံမွဲကၟိန်ဍုၚ်ဗၟာမ္ဂး ကၠအ်ထ္ၜိုတ်ပ္ဍဲဍုၚ်မန် နွံ (၃၇.၆ %) ဂှ် လၟိဟ်ဂၠိုၚ်အိုတ်တုဲ လက္ကရဴဏံ နူတၞံမအရိုၚ်ဂှ် ပြံၚ်တဵုကၠုၚ်တၞံမဆက်မတ် ဂကူခိုဟ်ခိုဟ်ဂၠိုၚ်ကၠုၚ်ဂှ်ရ ထ္ၜိုတ်တိတ်ပဵုကၠုၚ်မံၚ် လၟေၚ်လၟေၚ်သၞာံရောၚ် ဂွံတီကေတ်ရ။