ဩန်ဂိတုအ္စာဘာကောန်ဂကူမန် ဒှ်မံၚ်ခက်ခုဲဇၞော်ကဵုဒြဟတ်ဂှ် ဟွံချပ်မွဲသာ်တုဲ ညးတာလျိုၚ်မဆေၚ်စပ်တအ် ချပ်သဳကၠဳဒၟံၚ် သွက်ဂွံဗပဵုကဵုဩန်ဂိတု ကုအ္စာဘာဗ္တောန်လိက်မန် ပ္ဍဲဘာတန်အလဵုအသဳဂှ် ဟွံဒးရးက္ဍၚ်ရောၚ် ဂကောံကေၚ်ကာ အ္စာဘာကောန်ဂကူမန် အဆံၚ်ပွိုၚ်ဍုၚ်မွဲတၠ ဟီုပါ်ပါဲရ။
“ညးတာလျိုၚ် ကေတ်လဝ်တာလျိုၚ် သွာၚ်ဗ္တောန်လိက်မန်ပ္ဍဲဘာတန်တအ် ကော်ဘိက်မံၚ်အ္စာ သွက်အခိၚ်ပံက်ဘာတေံ စပတိုန်မံၚ်တၞးလိက် form ယျ၊ ညးတအ်ဟီုလဝ်ဂှ်တှ်ေ အခိၚ်ပံက်ဘာတေံတှ်ေ သွက်အ္စာဘာဗ္တောန်လိက်မန် ပ္ဍဲဘာတန်အလဵုအသဳတအ် စဳဇန်မံၚ် သွက်ဂွံကဵုဗပဵုကဵုဩန်ဂိတု ညံၚ်ဂွံတုပ်ကဵု အ္စာဘာအလဵုအသဳကီု ညးတအ်ဟီုလဝ်ဗီုဂှ်၊ ပရိုၚ်ဏံပြးဗက်ဂှ် အကြာအ္စာဘာကောန်ဂကူပိုဲတအ် ပါ်ပါဲမံၚ်ပြးရ၊ ဠအ္စာဘာကောန်ဂကူဇကု ဩန်ဂိတုခက်ခုဲမံၚ်ဂှ် ဟွံချပ်မွဲသာ် ဠအ္စာဘာ ပ္ဍဲဘာအလဵုအသဳတှေ် ချပ်ကဵု ညံၚ်ကဵုဟွံဒးက္ဍၚ်” သာ်ဝွံ ကေၚ်ကာ ဂကောံအ္စာဘာ အဆံၚ်ပွိုၚ်ဍုၚ်ဂှ် ဟီုရ။
အ္စာဘာဗ္တောန်လိက်မန် ပ္ဍဲဘာတန်အလဵုအသဳဂမၠိုၚ်ဂှ် အ္စာဘာကေတ်မံၚ်တာလျိုၚ် ပွိုၚ်ကၠိုဟ်တ္ၚဲ အခိၚ်ပေၚ်ပေၚ် (Teaching Assistant-TA) မွဲသွာၚ်၊ အ္စာဘာ ကေတ်မံၚ်တာလျိုၚ် ဗ္တောန်လိက်မန် မွဲအခိၚ် (မန်မွဲဘာသာ) (Language Teacher-LT) မွဲသွာၚ် နွံရ။
အ္စာဘာဗ္တောန်လိက်မန် ပ္ဍဲဘာတန်အလဵုအသဳတအ်ဂှ် နူကဵုဌာနပရေၚ် ပညာအလဵုအသဳတအ် ကဵုမံၚ်ဩန်ထံက်ပၚ် နကဵုဗၞတ်ဗ္ၜတ် စလိၚ်တ္ၚဲဂှ်တုဲ ညံၚ်ဂွံဗပဵုကဵုဩန်ထံက်ပၚ် တုပ်ကဵု အ္စာဘာ ဗီုဘာအလဵုအသဳတအ်ကီု ညးတာလျိုၚ်မဆေၚ်စပ်တအ် ပတိုန်ထ္ၜးကၠုၚ်ထပ်ကဵုထပ်နွံကီုလေဝ် ဩန်ဗါတ်ဂျေက် သွက်ဩန်ဘဏ္ဍာ သွက်အ္စာဘာဗ္တောန်လိက် ကောန်ဍုၚ်အရၚ်တအ်ဂှ် ဟွံမွဲရောၚ် အလဵုအသဳအဆက်ဆက်တအ် ဟီုကလးကၠုၚ်လဝ်ရ။
“ဩန်ဂိတုအ္စာဘာကောန်ဂကူပိုဲဂှ် ဟွံတၟေၚ်တိုန်မွဲသာ် ဆက်အာအတိုၚ်ဏံရတှ်ေ အ္စာဘာတအ် အကာဲအရာဟွံခိုဟ်ပုဟ်၊ မိၚ်မံၚ်ပရိုၚ်ဂှ် ကၟာတ်ဘာဏံ အ္စာဘာတအ် ဘိုအ်ဂွံပတိုန်လိက် ဒေါံဇူနွံကၠးကၠး၊ ဘာလ္ၚဵုဂှ်တှ်ေ အ္စာနွံ (၄) တၠတှ်ေ ဘိုအ်ဂွံဇူ (၂) တၠ၊ ဘာလ္ၚဵုတှ်ေ ဘိုအ်ဂွံဇူ (၃) တၠ ဗီုဏံမိၚ်လဝ်နွံမံၚ်၊ ကဵုဩန်ထံက်ပၚ်အတိုၚ်ဏံရတှ်ေ ဗီုလဵုသ္ပမှလေဝ် ဂွံထိၚ်အ္စာဘာတြေံတအ် ဟွံလောဲပုဟ်၊ အဵုဒှ်မံၚ်အကာဲအရာဗီုဏံဂှ် ဟွံချပ်ကဵုမွဲသာ် အာချပ်မံၚ် အရၚ်ဂွံဗပဵုကဵုဩန်ဂိတု အ္စာဘာဗ္တောန်မံၚ်လိက် ပ္ဍဲဘာအလဵုအသဳတှ်ေ အ္စာဘာ ပ္ဍဲဘာကောန်ဂကူပိုဲတအ် အသိၚ်ဏံ ဖေက်တိတ်အိုတ်” သာ်ဝွံ အ္စာဘာဂကောံကေၚ်ကာ အဆံၚ်ပွိုၚ်ဍုၚ်ဂှ် ထပ်ဟီုရ။
ဩန်ဂိတုအ္စာဘာကောန်ဂကူမန်ဂှ် နူကဵုဌာနပရေၚ်ပညာ ပ္တိတ်ကဵုမံၚ်ကုအ္စာဘာမွဲတၠ မွဲဂိတု ဗၞတ် (၁) ကိုဋ်ဘာ်၊ (၁) ကိုဋ်ဘာ်ပြၚ်ညိနွံတုဲ တန်မူလ၊ တန်ဒေါဝ်၊ တန်သၠုၚ် ပါ်လဝ်အဆံၚ်ကဵုအဆံၚ် တၞဟ်ခြာနွံညိရ။
အ္စာဘာဗ္တောန်လိက်မန် ပ္ဍဲဘာတန်အလဵုအသဳဂမၠိုၚ်တအ်ဂှ် စတမ်နူ သၞာံ (၂၀၂၁) အံက်တိုဝ်ဗာတုဲကၠုၚ်တေံ အ္စာဘာကေတ်မံၚ်တာလျိုၚ် ပွိုၚ်ကၠိုဟ်တ္ၚဲ အခိၚ်ပေၚ်ပေၚ် (Teaching Assistant-TA) မွဲတၠ ကလိဂွံမံၚ်ဩန်ဂိတု မွဲဂိတု (၁၃၀၀၀၀) (မွဲကိုဋ်ပိလက်) ဒ္ကေဝ်တုဲ အ္စာဘာကေတ်မံၚ်တာလျိုၚ် ဗ္တောန်လိက်မန်မွဲအခိၚ် (မွဲဘာသာ) (Language Teacher-LT) မွဲတၠ ကလိဂွံမံၚ်ဩန်ဂိတု (၆၀၀၀၀) (တြဴလက်) ဒ္ကေဝ်ရ။
