တ္ၚဲအ္စာကဝိမန် မရနုက်ကဵု (၁၀) ဝါဏံဂှ် ကၠောန်ဗဒှ် ပ္ဍဲဍုၚ်ကၟာဝက်ရောၚ်တုဲ နူတနေံဏံ ဂိတုပုဟ် (၄) မံက်၊ ဒဳဇြေန်ဗာ (၂၂) ဂှ်  ဂကောံအ္စာကၞေဟ်မန် သ္ပကောံဓရီု (လၟေၚ် ၃) ပ္ဍဲဘာဗ္ဂောသၟဝ် ဍုၚ်မတ်မလီုတုဲ ဖျေံဏာပရေၚ်ကမၠောန်နွံရ။

ပ္ဍဲအသေအဟာန်တ္ၚဲအ္စာကဝိမန်ဂှ် ဇိုန်နှၚ်ကဵုလာဘ်လိက်ပတ်မန် သၞာံ (၂၀၂၅) ကီု၊ သီုကဵုကၠောန်ဗဒှ်အာ ဝိုၚ်သဳကၠဳ လိက်ပတ်မန် နကဵုက္ဍိုပ်လိက် “လိက်ပတ်မန် ကေုာံ ယေန်သၞာၚ်ဗှ်လိက်” နွံရောၚ် ညးတာလျိုၚ်ဂကောံအ္စာကၞေဟ်မန်မွဲတၠ ဟီုရ။

“တ္ၚဲအ္စာကဝိမန် မရနုက်ကဵု (၁၀) ဝါ သၞာံဏံဂှ် ကၠောန်ဗဒှ်အာ လတူဍုၚ်ကၟာဝက်၊ အစဳဇန်ဂှ်တှေ် ပ္ဍဲတ္ၚဲအ္စာကဝိမန်ဂှ် ဇိုန်နှၚ်ကဵု လာဘ်လိက်ပတ်မန် (၂၀၂၅) နွံ၊ သီုကဵုကၠောန်အာ ပေါဲသဳကၠဳလိက်ပတ်မန်နွံ၊ ပါဲနူဂှ်တှေ် နူကဵုသၟတ်ကွးဘာတအ် ကဏ္ဍလှေ်ယေန်သၞာၚ်၊ ကဏ္ဍလှေ်ကချိၚ်၊ ကဏ္ဍဝေၚ်ဇာတ် စပ်ကဵုလိက်ပတ်ချပ်လဝ်နွံ” သာ်ဝွံ ညးအုပ်ကာ ဂကောံအ္စာကၞေဟ်မန် ဝဏ္ဏမာန် ဟီုရ။

အစဳဇန်ဇိုန်နှၚ်ကဵုလာဘ်လိက်ပတ်မန် သၞာံ (၂၀၂၅) ဂှ် လိက်ကၞပ်တိတ်ပ္ဍဲဗွိုၚ် သၞာံ (၂၀၂၄-၂၀၂၅) သီုဖအိုတ်ဂှ် အ္စာကၞေဟ်ချူ ကဏ္ဍကဗျ၊ အ္စာကၞေဟ်ချူ ကဏ္ဍဝတ္ထု၊ အ္စာကၞေဟ်ချူ ကဏ္ဍလိက်ပရေၚ် ပိကဏ္ဍဂှ် နူဂကောံအ္စာကၞေဟ်တအ် ရုဲစှ်ဗ္ၜတ် ကဵုတၚ်ဂၞၚ်သွက်ဂွံရုဲစှ်တုဲ ဇိုန်နှၚ်ကဵုလာဘ်လိက်ပတ်မွဲကဏ္ဍရ။

“သွက်ပေါဲသဳကၠဳလိက်ပတ်ဂှ်တှေ် ကော်ဘိက်လဝ် အ္စာကၞေဟ်ဗွိုၚ်ဍုၚ်ကၟာဝက် သၚ် ဟွံသေၚ်တှေ် ခရှ် မွဲဇကု၊ ဗွိုၚ်ပ္ဍဲဂကောံအ္စာကၞေဟ်သၚ်မွဲဇကု၊ အ္စာကၞေဟ် ဗွိုၚ်နူဌာနပညာ ချူခၞံဒၟံၚ်လိက်ပြကိုဟ်အဘိဓာန်မွဲတၠ အ္စာကၞေဟ်ပိတၠဏံ သွက်ဂွံသဳကၠဳအာ နကဵုက္ဍိုပ်လိက် ‘လိက်ပတ်မန် ကေုာံ ယေန်သၞာၚ်ဗှ်လိက်’ ဖန်ဇန်လဝ်နွံ” သာ်ဝွံ ညးအုပ်ကာဂှ် ဆက်လဴထ္ၜးလဝ်ရ။

တ္ၚဲအ္စာကဝိမန်ဂှ် သ္ပအစာံကဵု ကျာ်ဇၞော်စွောံ (ဥတ္တရမ္ဘ) စချူခၞံပြကိုဟ်လောကသိဒ္ဓိ ပ္ဍဲသက္ကရာဇ်ဍုၚ် (၁၁၀၂)၊ ဂိတုမာ် (၃) မံက်ဂှ်တုဲ ကျာ်ဇၞော်အ္စာပါလိတ (ဘာဓာတ်ကျာ်၊ ဍုၚ်ကၟာဝက်)၊ ကျာ်ဇၞော်အ္စာသိၚ်္ဃ (ဘာက္ၜၚ်ထဝ်၊ ဍုၚ်မတ်မလီု)၊ ကျာ်ဇၞော်အ္စာပုပ္ဖ (ဘာမဟာဝေဠုဝန်၊ ဍုၚ်မတ်မလီု) တအ် ပ္ဍဲသက္ကရာဇ်ဍုၚ် (၁၃၄၇) ဂှ် ကၠောန်ကၠုၚ်လဝ် တ္ၚဲအ္စာကဝိမန် ပ္ဍဲဇြပ်မန် ဍုၚ်မတ်မလီု ပွိုၚ်ပိသၞာံအဆက်ဆက်ရ။

တုဲပၠန် စိုပ်သက္ကရာဇ်ဍုၚ် (၁၃၇၄) ဂှ် နကဵုဂကောံအ္စာကၞေဟ် ဒေသရေဝ်သၟဝ်ကျာကဵု ဂကောံလိက်ပတ်မန်ပွိုၚ်တိုက်၊ ဍုၚ်ပါ်လၟိုၚ်တံ ပံၚ်ကောံတုဲ ကၠောန်ဂွံအသေအဟာန် တ္ၚဲအ္စာကဝိမန် ပွိုၚ် (၃) သၞာံကီုတုဲ တ္ၚဲအ္စာကဝိမန်ဂှ် အဆက်ပိုတ်အာ မွဲချိုန်ခဏရ။

စိုပ်ကၠုၚ်သက္ကရာဇ်ဍုၚ် (၁၃၇၈) သၞာံ၊ သၞာံခရေတ် (၂၀၁၆) ဂှ် ဂကောံအ္စာကၞေဟ်မန်တံ စကၠောန်ကၠုၚ် တ္ၚဲအ္စာကဝိမန် လၟေၚ်သၞာံအဆက်ဆက်တုဲ သၞာံဏံမ္ဂး စိုပ်ကၠုၚ် မရနုက်ကဵု (၁၀) ဝါရ။