အကြာဒပ်ပၞာန်ဗၟာတအ် ကဵု ဂကောံပၠန်ဂတးတအ် ကတဵုဒှ်ပေါဲဗတိုက်တုဲ ညးဍုင်ကွာန်အလုံကွာန်ကၠာင်ထဝ် ပ္ဍဲပွိုင်ဍုင်ဇြပ်ဗုတအ် နူတနေံတေံ ဒးဂြိပ်ပါဲဘဲပၞာန် အလုံမွဲကွာန်နွံရောင် ညးပါဲဒဴတိတ်နူကွာန်မွဲတၠ ဟီုလဴထ္ၜးရ။
နူတနေံ (ဒဳဇြေမ်ဗာ ၅) အခိင်သဝ်တ္ၚဲ ၜိုတ် ၅ နာဍဳပြင်ညိဂှ် ဒပ်ကရောင်ပၞာန်တအ်ထ္ပက်လုပ်ကၠုင် ဒေသဂကောံပၠန်ဂတးတအ် ချဳဒရာင် ဗဒါဲကွာန်ကၠာင်ထဝ် ပ္ဍဲပွိုင်ဍုင်ဇြပ်ဗုဂှ်တုဲ ဒှ်မံင်ပေါဲဗတိုက်သ္ကာတ်မြဟ်နွံရောင် သ္ဂးရ။
“ဒပ်ပၞာန်ဗၟာတအ်ထ္ပက်လုပ်ကၠုင်တုဲ ဒှ်မံင်ပေါဲဗတိုက်ဖိုဟ်၊ ဒှ်မံင်ဗၟံက်ကွာန် မၠံက်ဇၞော် မၠံက်ဇၞော်စဂှ် ဒတုံမံင်ဗ္ဒာဲကွာန် တုဲတှ်ေ ညးဍုင်ကွာန်တအ် မွဲဟွံဂံင်မံင် ဂြိပ်ပါဲအာ ဗီုညးကဵုညးအိုတ်ရ၊ ပ္ဍဲကွာန်တေံ မုမုဒး၊ မုမုလီုလာ်ဒးအာ ဟွံတီရ” ညးပါဲဒဴဘဲပၞာန်ဂှ် ဟီုရ။
အကြာပယျဵုပွိုင်ဍုင်ဇြပ်ဗု ကဵု ပွိုင်ဍုင်ရေဝ် ဒေသမွဲဒမြိပ်ဂှ် ဂကောံပၠန်ဂတးပံင်တောဲဂမၠိုင် ချဳဒရာင်ဖျေံလဝ်သဇိုင်တုဲ စၟဳစၟတ်မံင်ယာန်ကွဳစက် လတူဂၠံင်ဇၞော်ဂှ် နွံလၟေင်တ္ၚဲရ။
စတမ်နူတနေံတေံတုဲ ဒပ်ကရောင်ပၞာန်ဗၟာတအ် ထ္ပက်လုပ်ကၠုင်တိဍာ်ဒေသဂှ်ရ ဒှ်ပေါဲဗတိုက်ညးသ္ကအ်ရောင်။
“နူဗတမ်တေံလေဝ် ရမျှာင်အမၠံက်ဇၞော်ဗြုမံင် ဆက်ဆက်ဖိုဟ်၊ ညးဍုင်ကွာန်တအ်ဂှ် ပါဲဓလေတ်တိတ်အာနူကွာန် အိုတ်ရ၊ တ္ၚဲတၟးဏံလေဝ် ဗီုလဵုဒှ်ဂှ် ဟီုဟွံမာန်ဏီပုဟ်၊ ရံင်ကေတ်သီုၜါလ္ပာ်တှ်ေ အကာဲအရာဘိုအ်ဂွံခိုဟ်တိုန်ဟွံမွဲပုဟ်၊ လၟုဟ်ဂှ်တှ်ေ ကွာန်ကၠိမ်ဗ္ဒဝ်မွဲဂှ် ညးဍုင်ကွာန်တအ်ပါဲဓလေတ်တိတ်နူကွာန် အလုံမွဲကွာန်ရ၊ ကွာန်ဗဒါဲဗဒါဲဂှ်လေဝ် ညး တအ်မံင်ရံင်တ္ၚဲတၟးဏံ မုဆက်ဒှ်ပၠန်တှ်ေ မင်ဂြိပ်မံင်ဗီုညး ဗီုညးနွံ” ညးကွာန်နူကွာန်ဝါခမိတ် မွဲတၠ ဟီုထ္ၜးရ။
အကြာမွဲၜါတ္ၚဲဏံဂှ် ဒေသလ္ပာ်ကနေင်တၟအ် ပွိုင်ဍုင်ရေဝ်(သၟဝ်ကျာ)လေဝ် ဒပ်ကရောင်ပၞာန်တအ် ထ္ပက်လုပ်ကၠုင်မံင် ပ္ဍဲတိဍာ်ဂကောံပၠန်ဂတးတအ်ချဳဒရာင်ဂှ်တုဲ အေန်မင်မံင်ဂွန်ညးသ္ကအ် သွက်ဂွံဒှ်ပေါဲဗတိုက်ညးသ္ကအ်နွံရ။
အခိင်ကြပ်ကၠုင်ကဵုပေါဲရုဲမာဲဏံဂှ် ကမ္မယှေန်ပၞာန်ဗၟာတအ် သွက်ဂွံထိင်ဒဝ်အာပရေင်ဂီုကၠီု ဒေသဂၠံင်ဇၞော် စၟတ် ၈ ဇြပ်ဗု ရေဝ်ဂှ်တုဲ ကရောင်ပၞာန်ဗၟာတအ် ပလေဝ်ပလေတ်ဒၟံင်အစဳဇန်ထ္ပက်ပၞာန် နူဂိတုတုဲကၠုင်တေံရရောင်ဂှ်လေဝ် ဂွံတီ ကေတ်ရ။
