တိုက်ဩန်ဗေန်ဂမၠိုၚ်တအ် ဟွံပ္တိတ်ကဵုဩန်ဂၠိုၚ်ဂၠိုၚ်တုဲ တၠကမၠောန်ကၠောန်ပရေၚ်ပိုန်ဒြပ် ဇၞော်ဇၞော်တအ် ဒှ်မံၚ်ခက်ခုဲကဵု ကမၠောန်နွံရောၚ် တၠကမၠောန်ဆေၚ်ထဝ် ဍုၚ်မတ်မလီုမွဲတၠ ဟီုရ။
ပ္ဍဲကဵုတိုက်ဩန်ဗေန်ဂမၠိုၚ်ဂှ် ဩန်လ္ပာ်ပၠုပ်ဂှ်အောန်တုဲ လ္ပာ်ပ္တိတ်ဩန်ဂၠိုၚ်လောန်ဂှ်ရ မၞိဟ်ကၠုၚ်ပ္တိတ်ဩန်မွဲတၠမ္ဂး နကဵုတိုက်ဩန်ဗေန်တအ် ဒးပ္တိတ်ကဵုမံၚ် နကဵုဗၞတ်ဗ္ၜတ်ဂှ်တုဲ သွက်ပရေၚ်ပိုန်ဒြပ်တၠကမၠောန်ဇၞော်ဇၞော်တအ် ဒှ်မံၚ်ခက်ခုဲကဵု ကမၠောန်ရောၚ် သ္ဂးရ။
“ညးဍုၚ်ကွာန်ဓမ္မတာတှ်ေ ဂၠိုၚ်အိုတ်မှ (၃၀) ကိုဋ်ရ ဍေံကဵုပ္တိတ်၊ ယဝ်မၞိဟ်ပ္တိတ်ဂၠိုၚ်လောန်တှ်ေ အောန်နူဂှ်ဏီ၊ တၠကမၠောန်ဇၞော်ဇၞော်တအ်မှဂှ် ဗီုပိုဲဆေၚ်ထဝ်တှ်ေ ဍေံကဵုပ္တိတ် (၁၀၀) ကိုဋ်ရ၊ ကမၠောန်ဇၞော်အိုတ်မှ မွဲတ္ၚဲဂွံ (၁၀၀) ကိုဋ်ရ၊ ဗီုကဵုကမၠောန်ဇၞော်ဇၞော် ဒးဗ္ဂေတ်မံၚ်ဩန်ကဵု လ္ၚီကိုဋ်ဂှ် ဂွံပတိတ်ဩန် မွဲတ္ၚဲ (၁၀၀) ကိုဋ်ဓဝ်ရတှေ် ဩန်ဂွံဂေတ်ဂှ် ဒးဂၠာဲဩန် နူသွာၚ်တၞဟ် ဟလဵုပလေဝ် တော်ဟွံကိတ်” သာ်ဝွံ တၠဆေၚ်ထဝ်ဂှ် ဟီုရ။
ဟိုတ်နူပ္တိတ်ဩန် ပ္ဍဲတိုက်ဩန်ဗေန် ဂွံလၟိဟ်အောန်ဂှ်တုဲ တၠကမၠောန်ပရေၚ်ပိုန်ဒြပ် ဇၞော်ဇၞော်တအ်သၟးဟွံက တၠကမၠောန်ဆေၚ်ပြၚ်ပလံၚ်ဩန် မပ္တံကဵု Kpay,wavepay တအ်လေဝ် ဒှ်မံၚ်ခက်ခုဲရောၚ် ညးကၠောန်မံၚ်ကမၠောန်ပြၚ်ပလံၚ်ဩန် မိုဝ်ဗာၚ် Mobile မုဟ်ဍုၚ်မွဲတၠဂှ် ဟီုရ။
“ညးဍုၚ်ကွာန်တအ်တှေ် လၟုဟ်ပတှ်ေမံၚ် Kpay,wavepay သၟးရဂၠိုၚ်၊ ပ္တိတ်ဩန်ပ္ဍဲဗေန်တှ်ေ လဆောဝ်မွဲတ္ၚဲ ပ္တိတ်ဂွံ (၁၀) ကိုဋ်၊ ဂၠိုၚ်တှ်ေ ပ္တိတ်ဂွံ (၃၀) ကိုဋ် ဍေံချိၚ်ကဵု မၞိဟ်ပ္တိတ်အောန်ဂၠိုၚ်၊ တ္ၚဲဂှ် ယဝ်ရ မၞိဟ်ပ္တိတ်ဂၠိုၚ်တှ်ေ ဍေံယှအ်ဖျေံ၊ တ္ၚဲဂှ် ယဝ်ရ မၞိဟ်ပ္တိတ်အောန်ညိတှ်ေ ဍေံကဵုဂၠိုၚ်ညိ၊ ၜိုတ်ဩန်ဇကုနွံဂှ် ပ္တိတ်ဖအိုတ်မွဲတဲဓဝ် ဟွံဂွံပုဟ်၊ ဩန် (၅၀) ကိုဋ်ဂှ် လဆောဝ် ဒးပ္တိတ်မံၚ် (၄) လတုန် (၅) လတုန်ဒှ်မံၚ်” သာ်ဝွံ ညးဟီုရ။
တိုက်ဩန်ဗေန်ဗွဲမဂၠိုၚ်ဂှ် ဗွဲကြဴနူကဵု အလဵုအသဳပၞာန်သီအဝဵုတုဲ ဒဵုလၟုဟ်ဂှ် ဩန်လ္ပာ် ပၠုပ်တိုက်ဩန်ဗေန်ဂှ် လၟိဟ်လ္ပာ်အောန်တုဲ ဩန်လ္ပာ်ပ္တိတ်ဂှ်ဟေၚ် လၟိဟ်ဂၠိုၚ်ဂှ်ရ တၠကမၠောန်ဩန်တအ် လၟိဟ်ဂလိုၚ်မိက်ဂွံပ္တိတ်ဂှ် နူကဵုတိုက်ဩန်ဗေန်တအ် ပ္တိတ်ကဵုမံၚ် နကဵုဗၞတ်ဗ္ၜတ်ချိၚ်ဆဟေၚ်ရောၚ် ဂွံတီကေတ်ရ။
