နူကဵုညးဍုၚ်ကွာန်တအ် မုချူ မုဟီုဂး လတူသဵုယှေဝ်မဳဒဳယာ Social media ဂှ် နကဵုကမ္မယှေန်ပၞာန်တအ် မၚ်ရံၚ်မံၚ် ပွိုၚ် (၂၄) နာဍဳနွံတုဲ ပွမချူဟီုဂး လတူလပှ်ကျာဂှ် ဒးစွံသတိထေက်ရောၚ် တၠကွတ်အ္စာကဵုမံၚ်တန်ဗ္တောန် ကွတ်အာၚ်တဳ (Information Technology- IT) လတူဍုၚ်မတ်မလီုမွဲတၠ ဟီုကဵုသတိရ။
ဟိုတ်နူ ချူ ဟီုဂး ဒးလတူသဵုယှေဝ်မဳဒဳယာ Social media တေက်ဒး ပရေၚ်ဍုၚ်ကွာန်ကမ္မယှေန်ပၞာန်တုဲ မၞိဟ်ဒးဒုၚ်ရပ်ဏာ နွံဟွံအောန်ရတုဲ အခိၚ်ကြပ်ကဵုပေါဲရုဲမာဲဏံခ္ဍၚ် ဒးစွံသတိ ချူ ဟီုဂး ခ္ဍၚ်ရောၚ် တၠကွတ်အ္စာတန်ဗ္တောန်ဂှ် ဟီုကဵုသတိ ကု ညးမတိုန်ဒၟံၚ်တန်ဗ္တောန်ဂမၠိုၚ်တအ်ရ။
“ခေတ်သဵုယှေဝ်မဳဒဳယာ Social media ဏံတှ်ေ မုဒှ်ညိ ချူပတိုန်၊ မုဒှ်ညိ ဟီုပတိုန်လတူလပှ်ကျာ ချူဒး ဟီုဒး တေက်ဒးကဵုပရေၚ်ဍုၚ်ကွာန်ညိ ဍေံဒှ်သံသယတှ်ေ ဍေံရပ်ဏာရ၊ ဍေံရပ်ဏာ ဍေံစၟဳစၟတ်တှ်ေ ဒးဒုၚ်စောဲစပ် ဒုဟ်ဒဏ်မွဲမွဲသာ်တွဵုရ၊ အောန်အိုတ် ဒးဒဏ်ဩန် ဒးဒုၚ်ဝန်ဂတိပါၚ်၊ သၠုၚ်နူဂှ်တှ်ေ ဒဏ်ထံၚ်ရ၊ ဒှ်မာန်တှ်ေ မံၚ်ပ္ဍဲဍုၚ်တှ်ေ ဆေၚ်စပ်ကဵု ပရေၚ်ဍုၚ်ကွာန်တှ်ေ မုလ္ပချူ မုလ္ပဟီုဂး ခိုဟ်အိုတ်ရ” သာ်ဝွံ ညးကဵုသတိရ။
အခိၚ်ကာလပေါဲရုဲမာဲဏံဂှ် ပ္ဍဲဗလးတိဏံကီု လတူလပှ်ကျာ သဵုယှေဝ်မဳဒဳယာ Social media ကီု နကဵုညးဍုၚ်ကွာန်တအ် မုချူ မုဟီုဂးဂှ် နူကဵုဌာနမၚ်ရံၚ်စၟဳစၟတ်လတူလပှ်ကျာ ကမ္မယှေန်ပၞာန်တအ် မၚ်ရံၚ်စၟဳစၟတ်မံၚ်ပွိုၚ် (၂၄) နာဍဳတုဲ ဟိုတ်နူဏံတုဲ မၞိဟ်ဆက်စပ်ကဵု ရဲပၠန်ဂတးတအ်ကီု၊ ရဲပူဗိုၚ်ထံက်ပၚ်ဂကောံပၠန်ဂတးတအ်ကီု ဒးဒုၚ်ရပ်ဏာ ဗွဲမဂၠိုၚ်ဂၠၚ်ရ။
“ရဲနွံပ္ဍဲဍုၚ်တှ်ေ ဟွံဂံၚ်ချူ ဟွံဂံၚ်ဟီုကွေံကွေံရ၊ ဒးလဝ်လေဝ် ဟွံသာရ၊ ဗွဲမဂၠိုၚ်တှ်ေ ရဲနွံမ္ၚးဍုၚ် ဍုၚ်သၟာၚ်တအ်ရ ချူစဂၠိုၚ် ဟီုစဂၠိုၚ်၊ ဆဂး ဇှ်မှဂှ် ဒးစွံသတိဂှ်ရ ဇကုဟီုလဝ် ထ္ၜးလဝ်မုက်မတ်ရုပ်ဏောၚ်တှ်ေ အခိၚ်ဟွံရုဲဂှ် ဍေံရပ်စပ်ကေတ်အရေဝ်ဂွံမံၚ်၊ ပတှ်ေစဟွံဂွံပုဟ်၊ ဒှ်မာန်တှ်ေ ဇကုမၞိဟ်ဗီုလဵုတုဲတှ်ေ မံၚ်သောၚ်မံၚ်ကဵုပ္ဍဲဍုၚ်ရတှ်ေ ဗီုဒးစိုတ်ချူ ဗီုဒးစိုတ်ဟီု ဂွံ၊ ယဝ်ရ လုပ်လုပ်တိတ်တိတ်ဒှ်ဏောၚ် ချူ ဟီုမံၚ် ဗီုဒးစိုတ်ဂှ်လေဝ် ဒးချိၚ်” ရောၚ်ဂှ် သၟတ်တိုန်ကတ်လ္ၚတ်လဝ် ကွတ်ပညာအာၚ် တဳ (Information Technology- IT) မွဲတၠ ဟီုရ။
အခိၚ်ပရေၚ်ဍုၚ်ကွာန် ပရေၚ်ပၞာန်ကတဵုဒှ်ဒၟံၚ်တ္ၚဲဏံဂှ် သွက်ဂွံမၚ်ရံၚ်ညးဍုၚ်ကွာန်တအ် ဂကောံဒစဵုဒစးတအ် မုချဳဒရာၚ်ကၠောန်ၜိုတ်ဂှ်တုဲ လတူဍုၚ်ဗွဲမဂၠိုၚ် ဇၟာပ်ဂၠံၚ်ပန်သွာၚ် ဂၠံၚ်အဓိကဂှ် ကမ္မယှေန်ပၞာန်တအ် ဗ္ဂပ်လဝ် သဳသဳတဳဝဳ CCTV နွံတုဲ မၚ်ရံၚ်ဒၟံၚ် (၂၄) နာဍဳနွံရောၚ် ဂွံတီကေတ်ရ။
