ပ္ဍဲကဵုပေါဲရုဲမာဲ နူကဵုဒပ်ပၞာန်ဗၟာသီအဝဵုတအ် မက္ဍိုက်ပ်ကၠောန်ဗဒှ်အာ ပ္ဍဲသၞာံ ၂၀၂၅ ဏအ်ဂှ် ညးစၞးကၠတ်ထဝ်ဗၞတ်ၜိုတ် ၁၀ တၠ ဂွံဒုင်ရုဲစှ်မာန်ရောင် ညးစၞးအလံင်မာတ်မန်လ္ရဵု တော်ခယျကေတ်လဝ် နွံရ။

ပေါဲရုဲမာဲ ၂၀၂၅ ဏံဂှ် သွာင်ကၠတ်ထဝ်ညးဍုင်၊ သွာင်ကၠတ်ထဝ်ကောန်ဂကူ၊ သွာတ်ကၠတ်ထဝ်တွဵုရး သီုပိသွာင်ဂှ် ၃၈ ဒၞာဲ သွက်ဂွံလုပ်ဒုင်ရုဲနွံတုဲ ညးစၞးကၠတ်ထဝ် လၟိဟ်ဗၞတ်မုစိတၠ ဂွံဒုင်ရုဲစှ်မာန်ဂှ် ပ္ဍဲအကြာညးစှ်ေစိုတ်ကဵုပေါဲရုဲမာဲလ္ၚဵုတအ် ဟီုဂးခယျမံင်နွံရ။

“ရံင်ကဵုပေါဲရုဲမာဲတုဲတုဲတေံတှ်ေ ပ္ၚံက်ပေါဲရုဲမာဲ ၂၀၂၅ ဏံဂှ်တှ်ေ သွာင်ညးဂွံမာဲဂၠိုင် (ဇၞး – FPTP) ဂှ် ၜိုတ် ၅ ဒၞာဲ ဂွံဒုင်ရုဲမာန် ထေင်၊ သွာင်ပဳအာ ဗၞတ်ဗ္ၜတ်ဂှ် တော်ကဵုလၟေင်ဗော်ပရေင်ဍုင်ကွာန် လုပ်ပေါဲပြိုင်ပ္ဍဲတွဵုရးဍုင်မန်ဏံ ပြေင်ဖျေံတှ်ေ ဗော်ကျဖောအ်၊ ဗော်မန် သှ်ေဗော်တၞဟ်ဟ်တအ်ဂှ်တှ်ေ ဗၞတ်ဗ္ၜတ်ညးကဵုညး ဒေသညးကဵုညးရ လုပ်ပြိုင်မာန် ရံင်ကေတ်သာ်ဏံတှ်ေ ယဝ်ခါရ ညးဍုင်ကွာန်တအ် တိတ်ကဵုမာဲနွံၜိုတ်ဓမ္မတာတှ်ေ လၟိဟ်မမာဲမန်ဂှ် ဟွံအောန်ကွေံကွေံပုဟ် ထေင်ကေတ် သွာင်ပဳအာလေဝ် ၜိုတ် ၅ ဂွံဒၞာဲတှ်ေ သီုၜါသွာင်ဂှ် ဗၞတ်ၜိုတ် ၁၀ တၠ ဂွံဒုင်ရုဲမာန် တော်လဝ်နွံ” အလံင်ညး စၞးလုပ်ဒုင်ရုဲမာဲနူဗော်ညဳသၟဟ်မန်မွဲတၠ ဟီုဗြုလဝ်နွံရ။

ပေါဲရုဲမာဲကမ္မယှေန်ပၞာန်တအ် ကၠောန်ပလေဝ်ဒၟံင်တ္ၚဲဏံဂှ် အခိင်ပရေင်ဍုင်ကွာန်ရုသံင် ပေါဲပၞာန်လေဝ် ထတ်သ္ကာတ် က္တဵုဒှ်မံင်ဂှ်တုဲ ဂကောံပၠန်ဂတးဂမၠိုင်တအ်လေဝ် လလောင်ကဵုလဝ်သတိ ကုညးဍုင်ကွာန်တအ် ညံင်ဟွံကဵု ဒြဟတ်ကုပေါဲရုဲမာဲဂှ်လေဝ် နွံတဴရ။

မွဲလ္ပာ်ပၠန်ဂှ် ပေါဲရုဲမာဲအလန်ဏအ်ဝွံ ဟိုတ်နူပရေင်ဂီုကၠီုဟွံခိုဟ်ဂှ်ရ ကၠောန်အလုံဍုင်ဟွံဂွံသၟးဟွံက စပ်ကဵုသၞောတ် ပေါဲရုဲမာဲ ကေုာံ ဗီုပြင်ကဵုမာဲဂှ်လေဝ် ညးဍုင်ကွာန်ဂမၠိုင် ကၠိုဟ်ကၠးအောန်တုဲ အလဵုညးဍုင်ကွာန်တအ် စိုတ်ဟွံလုပ်စကဵု ပေါဲရုဲမာဲအိုတ်ရ။

“လ္ပာ်ရဲရုဲမာဲတအ်တှ်ေ ညးတအ်တော်တွဵုရလ္ပာ်ညးတအ် ဇၞး၊ နကဵုပိုဲညးဍုင်ကွာန်ဏံတှ်ေ မၞိဟ်ဂၠိုင်ဂၠိုင်ဂွံအာရုင်မာဲတုဲ ဂွံစုတ်မာဲဂှ် ဇြိုင်မံင်စိုတ်နွံဂၠိုင်၊ ရဲဟွံမိက်အာရုင်မာဲဂှ်တှ်ေ ဒြဟတ်မမာဲဗော်မန်တအ်သၟးရဂၠိုင်၊ ညးတအ်ဒးဖေက်ဂွိင် မံင်ဂှ်မွဲသာ် ဠ တုဲတှ်ေ ဟွံအာစုတ်မာဲလေဝ် အတိုင်ဆန္ဒဇကုဇကုရဏောင် ဍေံတအ်(ပၞာန်ဗၟာ)တအ်လလောင်လဝ်တုဲမံင်ရတှ်ေ ခယျမံင်ပ္ဍဲစိုတ်ပိုဲတှ်ေ မၞိဟ်ဂွံအာစုတ်မာဲ လၟိဟ်အောန်ဏောင်၊ လၟိဟ်မၞိဟ်စုတ်မာဲအောန်တှ်ေ အလံင်အ မာတ်မန် ဂွံဒုင်ရုဲဂှ်လေဝ် ဖေက်ဂွံလၟိဟ်ဟွံဂၠိုင်” ကောန်ဗော်ညဳသၟဟ်မန် အဆံင်ကွာန် ပွိုင်ဍုင်မုဟ်ဍုင်မွဲတၠ ဟီုရ။

ပေါဲရုဲမာဲ ၂၀၂၅ ကမ္မယှေန်ပၞာန်တအ်ဂှ် ဒဳဇြေမ်ဗာ ၂၈ ဏံ ကၠောန်အာသကုတ်ပထမတုဲ သကုတ်ဒုတိယဂှ် သၞာံ ၂၀၂၆ ဂိတုဂျာန်နဝါရဳ ၁၁ ဂှ်သွက်ဂွံကၠောန်အာနွံရ။ သကုတ်တတိယဂှ် အလန်ဒုတိယဏံ တုဲဂွံပွိုင်ၜါသတ္တာဟတုဲ သွက်ဂွံ ဆက်ကၠောန်အာပၠန်ရောင် ကမ္မယှေန်ပေါဲရုဲမာဲကမ္မယှေန်ပၞာန်တအ် ဟီုလလောင်လဝ်ရ။

ပ္ၚံက်ပေါဲရုဲမာဲမွဲဒမြိပ်မ္ဂး ကာလပေါဲရုဲမာဲ ၂၀၁၀ ဂှ် နူကဵုညးစၞးဗော်ဒဳမဵုကရေဇြဳအလုံရးမန် ဂွံဒုင်ရုဲ ၁၆ ဒၞာဲ၊ ပေါဲရုဲမာဲ ၂၀၁၅ ဂှ် ညးစၞးဗော်ကောန်ဂကူမန် ၃ ဒၞာဲ ကဵု ညးစၞးဗော်ဒဳမဵုကရေဇြဳအလုံရးမန် ၁ ဒၞာဲ ပံင် ၄ ဒၞာဲ၊ ပေါဲရုဲမာဲ ၂၀၂၀ နူကဵုညးစၞး ဗော်ညဳသၟဟ်မန် ဂှ် ၁၂ ဒၞာဲ ဂွံဒုင်ရုဲစှ်လဝ်နွံ ဂွံတီကေတ်ရ။