ၚုဟ်ထဝ်ဂှ် ထပက်တိုန်မံၚ်သိုက်သိုက်တုဲ ၚုဟ်တိကၠအ်ဂအာၚ်သ္ၚိကီု၊ ၚုဟ်ကွဳစက်ကာကီု ဗက်တိုန်အာၚုဟ်ထဝ် ဖအိုတ်ရောၚ် ရဲသွံရာန်တအ် ဟီုရ။
သွံရာန်ပရေၚ်ပိုန်ဒြပ်ကၟိန်ဍုၚ်ဗၟာဂှ် အဓိက ရံၚ်သ္ပသတိကဵု ၚုဟ်ထဝ် ကဵု ၚုဟ်သၠာဲဩန်ဒဝ်ဠာ တုဲ တန်တဴကဵု တိုန် စှ်ေ တုဲ တိကၠအ်ဂအာၚ်သ္ၚိကီု၊ ကွဳစက်ကာကီု ဗက်တိုန်အာကီုရောၚ် ညးရေၚ်တၠုၚ်ပရေၚ်သွံရာန်တိကၠအ်ဂအာၚ်သ္ၚိမွဲတၠ ဟီုထ္ၜးသာ်ဝွံရ။
“ရဲသွံရာန်တအ်ဂှ် အဓိက ဍေံတအ်မၚ်ရံၚ် သ္ပသတိကဵု ၚုဟ်ထဝ် ကဵု ၚုဟ်ဒဝ်ဠာ ရ၊ ၚုဟ်ဒဝ်ဠာ ၚုဟ်ထဝ် တိုန်တှ်ေ ကၠအ်ဂအာၚ်သ္ၚိကီု ကာကီု ဍေံဗက်တိုန်ရ၊ ၚုဟ်ဂှ် စှ်ေတှ်ေ ဍေံဗက်စှ်ေရ လၟုဟ်အဃောၚုဟ်ထဝ်တိုန်မံၚ်လၟုဟ်ဏံဂှ် တှ်ေ တိကၠအ်ဂအာၚ်သ္ၚိတအ်ဂှ် ကွဳစက်ကာတအ်ဂှ် ၚုဟ်တိုန်အာ အောန်ဂှ် ကဵု ၁၀၀ ကိုဋ် ဖအိုတ်” ညးရေၚ်တၠုၚ် သွံ ရာန်တိကၠအ်ဂအာၚ်သ္ၚိ လတူဍုၚ်မတ်မလီုမွဲတၠဂှ် ဟီုရ။
ၚုဟ်အနှေန်ထဝ်ဂှ် ထဝ် ၁၆ ၜဲလျိုၚ်မွဲဒ္ကေဝ်မ္ဂး ၉၀ ကိုဋ်ပြၚ် ပံက်ဒၟံၚ်တုဲ မွဲကရောံဂှ် ပရေၚ်ပိုန်ဒြပ်သၠာဲဂတးသွံရာန် တၞဟ်ဟ်တအ်လေဝ် မပ္တံကဵု ကၠအ်ဂအာၚ်သ္ၚိကီု၊ ကွဳစက်ကာကီု၊ ပရေၚ်ပိုန်ဒြပ်သွံရာန်နာနာသာ်ဂှ် တိုန်ဗက်အာ ၚုဟ် ထဝ်ဖအိုတ်ရ။
“ကၠအ်ဂအာၚ်သ္ၚိ နူတမ်တေံ ၚုဟ်နွံအကြာ ၈၀၀ ကိုဋ်ဂှ်တှ်ေ လၟုဟ်ဒှ် ဗဒါဲ ၁၀၀၀ ကိုဋ်၊ ဗီုဂှ်ကီု ကာမွဲဖ္ဍိုက် ၉၀၀ ကိုဋ် ဂှ်တှ်ေ ဒှ်အာ ၁၀၀၀ ကိုဋ်ပြၚ် ဗီုဂှ်ဖအိုတ်ရ ပရေၚ်ပိုန်ဒြပ်သွံရာန်ဂှ်တှ်ေ က္ဍၚ်တိုန်ဗက်အာၚုဟ်ထဝ် ဖအိုတ်ရ” ညးရေၚ် တၠုၚ် သွံရာန်ကွဳစက်ကာ လတူဍုၚ်မတ်မလီုမွဲတၠ ထပ်ဟီုရ။
ၚုဟ်ထဝ်ကီု ၚုဟ်တိကၠအ်ဂအာၚ်သ္ၚိကီု ၚုဟ်ကွဳစက်ကာကီု ၜိုန်ရ က္ဍၚ်တိုန်ဗက်အာမွဲကရောံကဵုၚုဟ်ထဝ်ဂှ်လေဝ် ပရေၚ်သွံရာန်ဂှ် ၜိုန်ရဟွံဒှ်အိုတ်အစောန်ကီုလေဝ် မၞိဟ်သွံရာန်နွံမံၚ် ဗီုအတိုၚ်တြေံဖိုဟ်ရရောၚ်ဂှ်လေဝ် ညးဆက်ဟီု ထ္ၜးရ။
ၚုဟ်အနှေန်ထဝ်ဂှ် လ္ပာ်ဂွံစှ်ေအာဟွံမွဲတုဲ တၠဓနပရေၚ်ပိုန်ဒြပ်ဇၞော်ဇၞော်တအ် လၟုဟ်ဂှ် ဂွံနၚ်ဩန်နူကေၚ်ကာ ကမၠောန်မ္ဂး စၞး ဒးပၠောပ်ပ္ဍဲတိုက်ဩန်(ဗေန်)ဂှ် ရာန်ဂိုၚ်စွံထဝ်ဂၠိုၚ်ဂှ်ရ ထဝ်ဂှ် ဒှ်ပရေၚ်ပိုန်ဒြပ်ခိုၚ်ခိုဟ်အိုတ်မွဲရောၚ် တၠဓ နဂမၠိုၚ်တအ် ပတှ်ေလဝ်ရောၚ် ဂွံတီကေတ်ရ။
