လညာတ်သ္ရဳဂၠိပ်၊ ယက္ခဂုမ္ဘဏ်
ပေါဲရုဲမာဲပတောံဒဳမဵုကရေဇြဳဗော်ဇဳ
မုဟိုတ်ဂွံဒှ်ပေါဲရုဲမာဲပတောံရောမ္ဂး ဟိုတ်ဂှ်နွံတဴဗွဲမဂၠိုင်ရ။ ပၞောဝ်ကဵုဟိုတ်ဂမၠိုင်ဂှ် ကာလဏအ် ကြပ်အလုံမွဲဍုင် ဒှ်ဒၟံင်ပေါဲပၞာန်ရ။ နကဵုအလဵုညးမကၠောန်ဗဒှ်ကဵုပေါဲရုဲမာဲ ကဝ်မယှေန်ပၞာန်တအ် ထောံဗမ်နကဵုယာန်ကျာ ဂစိုတ်မံင်ညးဍုင်ကွာန်ဂှ် ကၠောန်အာပေါဲရုဲမာဲမ္ဂး ဂွံဒှ်ပေါဲရုဲမာဲတပ်တး ဓဝ်ယာဂှ် ဒှ်မာန်ဟွံသေင်ရ။ မွဲတင်ပၠန်ဂှ် ဗော်ပရေင်ဍုင်ကွာန်ဇၞော်ဇၞော် ဗီုကဵုဗော်အေန်အေလ်ဒဳတအ်ကီု ဗော်တၞဟ်ဟ်တအ်ကီု ရိုဟ်ပလီုကၠေံတုဲ ရပ်ထိင်ကၠေံက္ဍိုပ်သကိုပ် သၟာပရေင်ဍုင်ကွာန် ညးဍုင်ကွာန်ထံက်ဂလာန်တအ် ဟွံကဵုလုပ်ပေါဲရုဲမာဲရ။ ပွမကၠောန်ပေါဲရုဲမာဲသာ်ဏအ်ဂှ် ဒှ်အာပေါဲရုဲမာဲ မၞုံကဵုဗၞတ်ဗ္ၜတ်တုဲ ဟွံဒှ်ပေါဲရုဲမာဲ ဗၠးဗၠးၜးၜးမွဲရ။
မွဲတင်ပၠန်ဂှ် ထံက်ရံင်ကဵုသၞောဝ်ဥပဒေ စဵုဒၞာပေါဲရုဲမာဲ ကဝ်မယှေန်တအ် ပတိတ်လဝ်ဂှ်မ္ဂး အခေါင်သၟာပရိုင် (မဳဒဳယာ) တအ် ဗၠးဗၠးၜးၜး သွက်သ္ဂောံဗလးအာပရိုင်ကီု ဂွံထံက်ထ္ၜးအာ ဒၞာဲထေက်ကဵုသ္ဒးထံက်ထ္ၜးအာကီုဂှ် ဟွံမွဲရ။ ညးဍုင်ကွာန်တအ်လေဝ် အခေါင်ပါ်ပါဲ ထံက်ထ္ၜးတအ် ဒးဒုင်ကၟာတ်ဒၞာလဝ်ရ။ ညးထံက်ထ္ၜး ပါ်ပါဲလ္တူပေါဲရုဲမာဲတအ်ဂှ် နကဵုဥပဒေဏအ် လၟိဟ်မၞိဟ် (၂၀၀) တၠပြင် ဒးဒုင်ရပ်ဏာတုဲရ။ ဒုဟ်ဒဏ်တအ်ဂှ်လေဝ် ဒဏ်ထံင်နူကဵု(၃)သၞာံ စဵုကဵု(၅၀)စှော်သၞာံ ဒးမာန်ရ။ မွဲတင်ပၠန်ဂှ် တိဍာ်ဆန္ဒမာဲလေဝ် ကၠောန်ဏာအလုံဍုင်ဟွံသေင်ကီု ဍုင်ကွာန်လ္ၚဵု ၜိုန်မံင်ၜိုဟ်သြိုဟ်ဒၟံင်ကီုလေဝ် သ္ပကၠေံတိဍာ်လမ္စံက်တုဲ ဟွံကဵုအခေါင်ကဵုညးဍုင်ကွာန်တအ် စုတ်မာဲရ။ ထံက်ရံင်ကဵုတင်တအ်ဏအ်တုဲ ပေါဲရုဲမာဲဏအ် ဟွံတပ်တး ဟွံဗၠးၜးရ။ ပေါဲရုဲမာဲမၞုံကဵုလက်သဏ်သာ်ဏအ်ဂှ် ဒှ်လက်သဏ်ပေါဲရုဲမာဲပတောံရ။
ဒြဟတ်ခိုဟ်တိုန်မ္ဂး ပ္ဍဵုပ္ဍိုက်တုဲကေတ်မာန်
ဗော်ပရေင်ဍုင်ကွာန် မၞုံကဵုဒြဟတ်ကီု ပူဂဵုမၞုံကဵုဒြဟတ် ညးဍုင်ကွာန်ထံက်ဂလာန်တအ်ဂှ် ပ္ဍဵုပ္ဍိုက် တက်ပလီုဒၟံင်ရ။ ဒးထံက်ထ္ၜးမ္ဂး ဗီုကဵုဗော်မပါ်တိတ်ကၠုင် နူဗော်အေန်အေလ်ဒဳတအ်ဂှ်ကီု ဗော်တၞဟ်ဟ်တအ်ကီု ဒးဒုင်ရုပ်ပလီုကၠေံရ။ ပူဂဵုမၞုံကဵုဒြဟတ် ညးဍုင်ကွာန်တအ် ထံက်ဂလာန်တအ်ဂှ်လေဝ် ဂၠာဲဒုဟ်တုဲ ပလှ်ပတိတ်ကၠေံ နူအလံင်အမာတ်ရ။ ဒးထံက်ထ္ၜးမ္ဂး ဗီုကဵုက္ဍိုပ်သကိုပ်ဗော်ဗဳပိမ ဒံက်တာဒဝ်တိတ်တိတ်ဃာင်ဂှ် ဒှ်ညးဗြဴမၞုံကဵုဍာ်ဒကေဝ် ဂံင်ဟီု ဂံင်ကၠောန် ဂံင်ထံက်ထ္ၜး ပတဝ်ပၞးမာန်ကဵုက္ဍိုပ်သကိုပ် လ္ပာ်က္ဍိုပ်သကိုပ် ညးဗက်စလ္ပာ်ပၞာန်တအ်တုဲ ဒးဒုင်ပလှ်ပတိတ် နူအလံင်အမာတ်ရ။
က္ဍိုပ်သကိုပ်တၠအဝဵုပၞာန်တအ် ၜိုန်ကြမ်ကြဓဇန်ကြာန်ဒၟံင်ကီုလေဝ် ဒှ်တၠအဝဵုဖေက်ညးဗြဴရ။ မုဟိုတ်ဂွံဟီုသာ်ဏအ်ရောမ္ဂး ထံက်ရံင်ကဵုဒဒှ် ဒံက်တာဒဝ်တိတ်တိတ်ဃာင်ကီု ဒဝ်အံင်သာန်သုဂျဳကီု က္ဍိုပ်သကိုပ်တၠအဝဵုတအ် ၜိုတ်လဵုဖေက်ရောဂှ် ဂွံတီကေတ်မာန်ရ။ ဒဝ်အံင်သာန်သုဂျဳဂှ် ဒှ်ညးဗျုဗျုမွဲရ။ ရပ်ထိင်ကၠေံမၞိဟ်ဗြဴဗျုဗျုမွဲ စဵုကဵုဟွံဂံင်ထ္ၜးကဵုညးမွဲဆဵုရ။ ဟိုတ်ဂှ်ရ လၟုဟ်ကောန်ဒဝ်အံင်သာန်သုဂျဳ ဟီုဂးဒၟံင် “မိအဲ လမျီုဟွံမွဲရ။ ချိုတ်အာဣရ” ဣဂှ်လေဝ် ဟွံဂံင်ထ္ၜးရုပ် ဒဝ်အံင်သာန်သုဂျဳ ကဵုညးလောကတအ်တုဲ “ဒဝ်အံင်သာန်သုဂျဳဂှ် မံင်မိပ် ထတ်ယုက်မံင်ဖိုဟ်ရောင်” သ္ဂးရ။ ဒဒှ်ဍာံဂှ် သအာင်အာနူကဵုက္ဍိုပ်သကိုပ်ပၞာန်တအ်တုဲ ညးလဵုလေဝ် တီကေတ်ဟွံမာန်ရ။ မၞိဟ်ဗြဴဗျုဗျု မ္ဒးမံင်ဒၟံင်ပ္ဍဲထံင် အဝဲဒဝ်အံင်သာန်သုဂျဳတအ်ဂှ် ၜိုန်ဟွံချိုတ် လမျီုနွံဒၟံင်ကီုလေဝ် စိုတ်ဓာတ်ကီု ကာယကီု ဂွံထတ်မြက်ဒၟံင်ဂှ် ဒှ်မာန်ဟွံသေင်ရ
ပေါဲရုဲမာဲကဵုလညာတ်ဍုင်သအာင်
လညာတ်ဍုင်သအာင်တအ်လေဝ် လ္ၚတ်ကျောဝ်ရံင်မ္ဂး ဍုင်အလဵုအသဳတၠအဝဵုတအ် မအုပ်ဓုပ်လဝ်ဂှ်ဟေင် ထံက်မံင်ဂလာန်ရ။ ဍုင်အုပ်ဓုပ် နကဵုသၞောတ်ဒဳမဵုကရေဇြဳဂှ် ဍုင်လဵုလေဝ် ဟွံထံက်ဂလာန်ရ။ ဂကောံအာဇြဳယာန်တအ်လေဝ် “အခိင်ကာလ အကာဲအရာဒှ်ဒၟံင်လၟုဟ်ဂှ် ကၠောန်ပေါဲရုဲမာဲဟွံထေက်ဏီ” ပတိတ်လဝ် လိက်လလောင်တြးရ။ လ္တူကိစ္စဍုင်သအာင်တအ် ဟွံထံက်ဂလာန်ဂှ် “ပေါဲရုဲမာဲဍုင်ပိုဲဂှ် ဍုင်သအာင် ထံက်ဂလာန်ကီုဒှ် ဟွံထံက်ဂလာန်ကီုဒှ် ဟွံဆေင်ကဵုညးတအ်ရ။ ပေါဲရုဲမာဲဍုင်ပိုဲဂှ် ဆေင်ကဵုကောန်ဍုင်ပိုဲရ” ညးက္ဍိုက်ပ်လလောင်တြးပရိုင် ဗိုလ်ပၞာန်ဇြဝ်မေန်ထောန် သီုဟွံမွဲကဵုမုက်ဂွ ဟီုဂးကဵုအာစာပရိုင်တအ်ရ။
ပေါဲရုဲမာဲဏအ် သွက်တၠအဝဵုပၞာန်တအ်ဟေင်
မုဟိုတ်ဂွံဒှ်သွက်တၠအဝဵုတအ်ဟေင်ရောမ္ဂး ဗော်ညးဍုင်ကွာန်တအ်ထံက်ဂလာန်ဂၠိုင်ဂှ်လေဝ် ရုပ်ပလီုကၠေံရ။ ပူဂဵုညးဍုင်ကွာန်တအ် ထံက်ဂလာန်ဂၠိုင်တိုန်ဂှ်လေဝ် ပလှ်ပတိတ်ကၠေံ နူအလံင်ညးစၞးကၠတ်ထဝ်ရ။ ဗော်ပရေင်ဍုင်ကွာန် ဒြဟတ်ဍောတ်တ် ညံင်ရဴဗော်ပရေင်ဍုင်ကွာန် ကောန်ဍုင်အရင်တအ်ဂှ်ဟေင် ကဵုအခေါင်ကဵုပြိုင်ပေါဲရုဲမာဲရ။ မွဲသာ်ပၠန်ဂှ် ဒေသကောန်ဍုင်အရင် ပွိုင်ဍုင်လ္ၚဵု ၜိုန်ရပါလုပ်စရင် ကၠောန်ဗဒှ်ပေါဲရုဲမာဲကီုလေဝ် ကွာန်မထံက်ဂလာန်ကဵု ဗော်ပရေင်ဍုင်ကွာန် ကောန်ဍုင်အရင်တအ်ဂၠိုင်ဂှ် ပလှ်ပတိတ်ကၠေံ အလုံကွာန်မွဲ ဟွံကဵုပါလုပ် ပ္ဍဲစရင်စုတ်မာဲရ။
သ္ဒးထံက်ထ္ၜးမ္ဂး ဒေသမန် ပွိုင်ဍုင်ရေဝ်ဂှ် ဒှ်ပွိုင်ဍုင် ဗော်မန်တအ် ကလိဂွံမာဲပေင်င်ရ။ မွဲဒမြိပ်ဝင်ပေါဲရုဲမာဲလေဝ် ဗော်မန်တအ်ဇၞးကၠုင်ဒၟံင်လၟိုန်ရ။ က္ဍိုပ်သကိုပ်တၠအဝဵုပၞာန်တအ် တီဒၟံင်ဒဒှ်ဏအ်တုဲ အလုံပွိုင်ဍုင်ရေဝ်ဂှ် ဂွံအခေါင်စုတ်မာဲ ဆအယာံမာတ် လ္တူဍုင်ရေဝ်၊ လ္တူဍုင်လၟိုင်၊ လ္တူဍုင်ခေါဇာ၊ တ္ကအ်လ္ဂုတ် (၄) ကွာန်ဏအ်ဟေင် အလံင်အမာတ်ဗော်ညဳသၟဟ် မိမျေအ်တာန် ဟီုလဝ်လ္တူလပှ်ကျာရ။
သရုပ်ကၠေံမ္ဂး ပေါဲရုဲမာဲဏအ် ဒှ်ပေါဲရုဲမာဲပတောံ ဒဳမဵုကရေဇြဳဗော်ဇဳတုဲ ပရေင်တပ်တးလေဝ်ဟွံမွဲ၊ ပရေင်ဓဝ်ယာလေဝ်ဟွံမွဲ၊ အခေါင်ဟီုဂးပါ်ပါဲလေဝ်ဟွံမွဲ၊ အခေါင်သၟာပရိုင် ပတိတ်ပရိုင်ဓဝ်ဍာံတအ်လေဝ်ဟွံမွဲ၊ ကွာန်ဟွံထံက်ဂလာန်ကဵုညးတအ်ဂှ်လေဝ် ဟွံကဵုအခေါင် စုတ်မာဲဂှ်ရ ပေါဲရုဲမာဲတၠအဝဵုပၞာန်တအ် မကၠောန်လၟုဟ်ဂှ် ဒှ်သွက်တၠအဝဵုပၞာန်တအ်ဟေင်ရောင်။
