သွဟ်ပေါဲရုဲမာဲသကုတ် (၁) ဏံ တိတ်ကၠုၚ်ဂှ် ကောန်ဗော်ညဳသၟဟ်မန်ဗွဲမဂၠိုၚ် စိုတ်ဓာတ်စှ်ေမံၚ်နွံရောၚ် ကောန်ဗော်တအ်ဟီုဂှ် ဂွံတီကေတ်ရ။
ပေါဲရုဲမာဲ (၂၀၂၅) လၟုဟ်ဂှ် ညးဍုၚ်ကွာန်ဂမၠိုၚ်တအ် ကြေပ်မံၚ်အကြာၜါလ္ပာ်တုဲ မၞိဟ်တအ်တိတ်ကဵုမာဲအောန်ကီုဂှ်ရ သွဟ်ပေါဲရုဲမာဲ သကုတ် (၁) ဏံ တိတ်ကၠုၚ်ဂှ် ကောန်ဗော်ညဳသၟဟ်မန်တအ် စိုတ်ဓာတ်စှ်ေမံၚ် သ္ဂးရ။
“ပေါဲရုဲမာဲ (၂၀၂၅) အလန်ဏံဂှ် ဒှ်မံၚ်သကုတ်ဒေသ ဇြဟတ်ဗော်ညဳသၟဟ်မန် ဍိုန်လျဂှ် တီမံၚ်ရ၊ ဆဂးတှေ် ဗီုကဵုပွိုၚ်ဍုၚ်တ္ကအ်ခၟိုၚ်ကဵု ပွိုၚ်ဍုၚ်ကျာ်မြဟ်၊ ဠတုဲတှ်ေ ပွိုၚ်ဍုၚ်ပံၚ် စၟဳစလဝ်နွံမံၚ်၊ သွဟ်တိတ်ကၠုၚ်ဂှ် ခၟိုၚ်မွဲဓဝ်ရ ဇၞး၊ သှ်ေ ပံၚ်တအ် ကျာ်မြဟ်တအ်ဂှ် မွဲလေဝ် ဟွံဇၞးဂးဟဂှ်၊ ကောန်ဗော်ဗွဲမဂၠိုၚ်တအ် ဂစာန်လဝ်ဂှ် စိုတ်ဓာတ်စှ်ေမံၚ်အိုတ်” သာ်ဝွံ ကောန်ဗော်ညဳသၟဟ်မန် ပွိုၚ်ဍုၚ်မတ်မလီုမွဲတၠဂှ် ဟီုရ။
ပေါဲရုဲမာဲသကုတ် (၁) တုဲကၠုၚ်ဏံဂှ် ဒှ်ဒၟံၚ်ဒေသလၟိဟ်မန် အောန်ဂၠိုၚ်တုဲ ညးစၞးအလံၚ်အမာတ်မန်တအ် ဂွံဒုၚ်ရုဲဇၞး အောန်ရောၚ်ဂှ်လေဝ် တော်လဝ်နွံ၊ ဆဂး ဒဵုပွိုၚ်ဍုၚ်လ္ၚဵု မွဲတၠဟွံဂွံဒုၚ်ရုဲစှ်ဂှ် စိုတ်ဟွံမိပ်ရောၚ် ကောန်ဗော်ဗော်ညဳသၟဟ်မန် တၞဟ်မွဲတၠဂှ် ဟီုဗီုဏံပၠန်ရ။
“ဗီုကဵုပွိုၚ်ဍုၚ်မတ်မလီု၊ ကျာ်ထဝ်၊ သဓီုဂှ် အခါရ မန်ဇကု ဇၞးဟွံမာန်ဂှ် တော်လဝ်ရ၊ ဆဂး ဗီုကဵုပွိၚ်ဍုၚ်ကျာ်မြဟ်ကဵု ပံၚ် ဂှ် မွဲတၠ ဟွံသေၚ် ၜါတၠ ဂွံဒုၚ်ရုဲမာန် ထေၚ်လဝ်ဟဂှ်၊ ဠ သွဟ်တိတ်ကၠုၚ်ဂှ် ဗီုထေၚ်လဝ် ဟွံဒှ်ကၠုၚ်၊ စိုတ်ဟွံခိုဟ်ရ” သာ်ဝွံ ကောန်ဗော်ညဳသၟဟ်မန် ပွိုၚ်ဍုၚ်ပံၚ်မွဲတၠ ဟီုရ။
ပ္ဍဲတွဵုရးဍုၚ်မန်ဂှ် လစှေ်နူဗော်ကျဖောအ် (ဒြဟတ်ပၞာန်ဗၟာ) တုဲ ဗော်ညဳသၟဟ်မန်ဂှ် ဒှ်ဗော်ဒြဟတ်ဇၞော် ပ္ဍဲတွဵုရးမွဲကီုလေဝ် ပေါဲရုဲမာဲအလန်ဏံဂှ် လ္ပာ်ဒပ်ပၞာန်ဗၟာကီု၊ လ္ပာ်ဂကောံပၠန်ဂတးတအ်ကီု ဘပဠကရေပ်ဂရတ်လဝ်ညးဍုၚ်ကွာန်တအ် နွံ သီုၜါလ္ပာ်ဂှ်တုဲ ညးဍုၚ်ကွာန်တအ် မံၚ်ထောံဟွံတိတ်ကဵုမာဲနွံဂၠိုၚ်ရ။
တုဲပၠန် ပွိုၚ်ဍုၚ်ကၠောန်ပေါဲရုဲမာဲဂှ်ပၠန်လေဝ် ဗီုကဵုပွိုၚ်ဍုၚ်ကျာ်မြဟ်ဂှ် ဆဗွိုၚ်လတူဍုၚ်ဟေၚ် ကၠောန်ပေါဲရုဲမာဲတုဲ ဒေသကွာန်ရးဂှ် ထ္ၜးဟိုတ်ကဵု ပရေၚ်ဂီုကၠီုအောန်တုဲ ဟွံကၠောန်ကဵုပေါဲရုဲမာဲဂှ်ရ ညးဍုၚ်ကွာန်မန် ဒြဟတ်ထံက်ဂလာန်ကဵု ဗော်ညဳသၟဟ်မန် ဟွံဂွံအခေါၚ်ကဵုမာဲဂှ်ရ ညးစၞးဗော်ညဳသၟဟ်မန် ကျအာရောၚ် ညးအခါတ်အကာဲ ပေါဲရုဲမာ လတူဍုၚ်မတ်မလီုမွဲတၠဂှ် ဟီုရ။
သွဟ်ပေါဲရုဲမာဲ (၂၀၂၅) သကုတ် (၁) တုဲကၠုၚ်ဏံဂှ် ပါဲနူပွိုၚ်ဍုၚ်တ္ကအ်ခၟိုၚ် ဂွံဒုၚ်ရုဲစှ်ဏာ သွာၚ်ကၠတ်ထဝ်ညးဍုၚ်ကဵု ကၠတ်ထဝ်ကောန်ဂကူၜါတၠဂှ်တုဲ ပွိုၚ်ဍုၚ်မတ်မလီု၊ ပွိုၚ်ဍုၚ်ကျာ်မြဟ်၊ ပွိုၚ်ဍုၚ်ပံၚ်၊ ပွိုၚ်ဍုၚ်သဓီုဂှ် ညးစၞးဗော်ညဳသၟဟ်မန်မွဲတၠလေဝ် ဟွံဂွံဒုၚ်ရုဲစှ်တုဲ ကျအာ ဗော်ကျဖောအ်ဖအိုတ်ရောၚ် ဂွံတီကေတ်ရ။
