ဌာန်သ္ဇိုၚ်ပရေၚ်ပညာ ပုပ္ဖဟံသာ မဖျေံသ္ဇိုၚ်လ္တူဍုၚ်ဇြပ်ဗုဝွံ ရန်တၟအ်ကဵု သ္ဂောံလွဳၜံၚ်အာ တမ်ရိုဟ်မၞိဟ်ဂကူမန် မၞုံကဵုပညာ မဍိုက်ပေၚ်ကဵု လမိၚ်လညာတ်တအ်ကီု သၟတ်ကွးဘာမန် ညးမ္ဒးဆိုအ်ဗဒၟံၚ်ကဵု ပရေၚ်ဝါတ်ကျာတ်လှုဲသြန် တိုန်ဘာဟွံမာန်တအ် ညံၚ်သ္ဂောံကတ် လ္ၚတ်အာ ပညာအဆံၚ်သၠုၚ်မာန်ကီုတုဲ ထံက်ပၚ်ကဵုအာ လာပ်ပညာ (Scholarship) ရောၚ် ဂွံတီကေတ်ရ။
နကဵုဌာန်သ္ဇိုၚ်ပရေၚ်ပညာ ပုပ္ဖဟံသာဝွံ တုဲကၠုၚ်ဂိတုဂျာန်နာဝါရဳ စၟတ်တ္ၚဲ (၂၇) ဂှ် ထပက်လဝ်စၟတ်တဲ လိက်ကသုက်တၚ်တုပ်စိုတ် ပရေၚ်ပညာ (MOU) ကုကဝ်လိက် ကေုာံ ဌာနဂမၠိုၚ် မၞုံသၟဝ်ကောပ်ကာဲ တက္ကသိုလ်မဟာစူဠာလံၚ်ကန် မပ္တံကဵု ကဝ်လိက်ဓမ္မဒူတ၊ ကဝ်လိက်သၚ် လာံပၚ်၊ ဌာနပရေၚ်ပွဳဗွိုၚ်မၞိဟ် ကေုာံ ဌာနအာဇြဳယာန်တအ်နွံရ။
သ္ဂောံဒှ်သတ်ကၟဝ်ဇဝ်ပ္ကဴ လိက်ကသုက်တၚ်တုပ်စိုတ် ပရေၚ်ပညာဝွံဟေၚ် ညးတာလျိုၚ် ကဝ်လိက်ဓမ္မဒူတ တက္ကသိုလ်မဟာစူဠာလံၚ်ကန်တအ် ကဵုလဝ်ဝတ္ထုဒါန် သွက်ဂွံ ထံက်ပၚ်ပညာ သွက်ကွးဘာတန်မဟာ (M.A) မွဲတၠ နကဵုဝတ္ထုဒါန် (၁) ကိုဋ်ၝာတ်၊ သွက်ကွးဘာတန်ဝိဇ္ဇာ (B.A) ကဝက်တရဴမွဲတၠ ခရိတ်ဘာသွက် (၂) သၞာံ နကဵုဝတ္ထုဒါန် (၂) ဠက်ၝာတ်နွံရ။
“ကဵုလာပ်ပညာဂှ်တှ်ေ သၚ်ကီု ထပိုဲကီု ခမဳကီု သဳလကီု ကွးဘာခရှ်တအ်ကီု ကၠုၚ်ဒုၚ်ဒါန်မာန်ဖအိုတ်ရ။ ဆဂး ပြဟ်ပြဟ်ဏံ ဟွံဂွံလလောၚ်တြးလဝ်ဏီ။ ၜိုတ်အတးလောန်မှ လလောၚ်းတြး ကဵုဗပေၚ်လိက် (Form)၊ ကဵုသွဟ် (Entrance) ဏောၚ်၊ ကော်အာ အေန်တာဗျူဏောၚ်။ လာပ်ဏံဂှ် ကွးဘာတိုန်တက္ကသိုလ်ဍုၚ်မ္ၚး လေဝ်ဂွံ၊ ကွးဘာတိုန်ကဝ်လိက်ကောန်ဂကူမန်တအ်လေဝ်ဂွံ၊ ကွးဘာတိုန်တက္ကသိုလ်ဍုၚ်ပိုဲတေံလေဝ် ဂွံမာန်ဖအိုတ်ရ” သာ်ဝွံ ပဓါန နာယက ဌာန်သ္ဇိုၚ်ပရေၚ်ပညာ ပုပ္ဖဟံသာ ကျာ်ဇၞော်အ္စာ ဒံက်တာပုပ္ဖဟံသာ ဟီုမြော်လဝ်ကဵု ဌာန်ပရိုၚ်ဗၠးၜးမန်ရ။
သွက်ဝတ္ထုဒါန်လာပ်ပညာဂှ် ညးတၠဒါန်နာနာတအ် ဆက်ထံက်ပၚ်ဒၟံၚ်နွံတုဲ တန်တဴကဵု ဗၞတ်ဗ္ၜတ်မဒါန်တုဲ သဘၚ်အတးလောန် ဂိတုမေသတ္တတပထမတေံမ္ဂး လလောၚ်တြးကော်ဘိက် သွက်ဂွံကဵုအာလာပ်ပညာ (Scholarship) ရောၚ် ဂးရ။
“လဂုဏ်တအ်ဂှ် ရန်တၟအ်လဝ် သွက်ညးဖအိုတ်ရ။ ဆဂးတှေ် တန်တဴကဵု မဒါန်ရ။ ရဲကဵုကတိပါၚ် သွက်ဝတ္ထုဒါန်လေဝ်နွံမံၚ်တှ်ေ လအ်ဂွံစိုပ်အတးလောန်တေံတှ်ေဂွံဒါန်ပညာမူစိရော။ တုဲတှ်ေ ဒဵုကဆံၚ်လဵု ကဆံၚ်စဵုကဵုဘာတုဲဟာ၊ ကဆံၚ်သွက်မွဲသၞာံဟာတှ်ေ လဂှ်တှ်ေ လဂုဏ်တအ် လလောၚ်တြးအာဏောၚ်” သာ်ဝွံ ကျာ်ဇၞော်အ္စာ ဒံက်တာပုပ္ဖဟံသာ ဆက်မြော်လဝ်ရ။
ပြဟ်ပြဟ်ဏံမ္ဂး သွက်သၟတ်ကွးဘာမန်တအ် သ္ဂောံကတ်လ္ၚတ်အာ လိက်ပတ်မန် ကေုာံ ပညာဂတာပ်ခေတ်ဂမၠိုၚ်ဂှ် နူဌာန်သ္ဇိုၚ်ပရေၚ်ပညာ ပုပ္ဖဟံသာ ကော်ဘိက်ဒၟံၚ် သွက်တန်ဗ္တောန်ပညာဒါန လိက်မန်ဥတုကညၚ်နွံဂှ်လေဝ် ဂွံတီကေတ်ရ။
ဌာန်သ္ဇိုၚ်ပုပ္ဖဟံသာဝွံ ရန်တၟအ်ကဵု သွက်ဂွံထံက်ပၚ် ပညာပရိယတ္တိကီု၊ ပညာဘာတက္ကသိုလ်ကီု၊ ပညာကောန်ဂကူမန်ကီု သွက်ဂွံဒက်ပ္တန် ဌာန်သၠုၚ်ပ္တိုန်ဍာ်ဒကေဝ်သၟတ်ကီု၊ သီုကဵုသွက်ဂွံရီုဗၚ်ထံက်ပၚ်ဘဲဒဏ် သဘာဝနာနာကီုရောၚ် ဂးတုဲ ပ္ဍဲသၞာံ (၂၀၂၁) ၊ ဂိတုမေ စၟတ်တ္ၚဲ (၁၈) ၊ ဂိတုပသာ် (၈) မံက်ဂှ် ပံက်ပ္တန်ကၠုၚ်လဝ် ပ္ဍဲဘာသိရိမၚ်ဂလပရိယတ္တိ ဍုၚ်ဇြပ်ဗုဂှ်ရောၚ် ဂွံတီကေတ်လဝ်ရ။
