ဂိတုဖေဖဝ်ဝါရဳ စၟတ်တ္ၚဲ (၁၁) နူတနေံဏအ် အခိၚ်သဝ်တ္ၚဲ ၜိုတ် (၅) နာဍဳဂှ်ဝွံ ပ္ဍဲတွဵုရးသံၚ်ခလာ ဒေသခရိုၚ်ဟာတ်ယာဲဂှ် သၟတ်ရပ်လွဟ်အာယုက် (၁၈) သၞာံမွဲတၠ ဟိုတ်နူပန်ပှော်ဏာလွဟ် ပ္ဍဲကဵုဘာဗ္တောန်လိက် (Patong Prathan Khiriwat) ဂှ်တုဲ ဂအုပ်ဘာအ္စာၝောံသေံမွဲတၠကဵု ကွးဘာၜါတၠတၠ ဒးလဝ်ဘဲဝပ်လွဟ် ဗွဲမသကာတ်မြဟ်ရောၚ် ပရိုၚ်သေံဂမၠိုၚ် ပ္တိုန်ထ္ၜးလဝ်ရ။
အခိၚ်မလုပ်ပန်ဏာ ပ္ဍဲကဵုဘာဗ္တောန်လိက်ဂှ် ရပ်ထိၚ်ဘပဠ သ္ပလဝ်ဒၞန်ကုအ္စာ၊ အ္စာၝောံတအ်ကဵု ကွးဘာ (၃၀၀) တၠတုဲ မွဲအခိၚ်ဂှ် သီုကဵုပန်လဝ် ဂအုပ်ဘာအ္စာၝောံသေံ မွဲတၠဂှ်ကီုရောၚ် ဂွံတီကေတ်ရ။
ဟိုတ်နူက္တဵုဒှ်ပရေၚ်ပန်ပှော်တုဲ ညးတာလျိုၚ်ဗၠာဲသၟိၚ်သေံတအ် ကၠုၚ်စိုပ်လုပ်စၟဳစၟတ် ညးလုတ်လောန်လဝ်ဒုဟ်ဂှ်တုဲ ညးဒးလဝ်လွဟ် ဂအုပ်ဘာအ္စာၝောံမွဲတၠကဵု ကွးဘာၜါတၠဂှ် ပလံၚ်ပစိုပ်ဏာ ရုၚ်ဂဥုဲဟာတ်ယာဲ လွဳလွတ်မံၚ်နွံတုဲ ကွးဘာၜါတၠဂှ် ဒးလဝ်ဘဲဝပ် ပ္ဍဲပုၚ်မွဲတၠကဵု ဒးလဝ်ဘဲဝပ် ပ္ဍဲဇိုၚ်မွဲတၠရ။
ဆဂး ဂအုပ်ဘာအ္စာၝောံသေံ ဟိုတ်နူဒးလဝ်ဘဲဝပ်လွဟ် သကာတ်မြဟ်ဂှ် ပလံၚ်ဗစိုပ်ဏာရုၚ်ဂဥုဲ နကဵုကာတၟေၚ် ဗွဲမဂတာပ်အခိၚ်ကီုလေဝ် တ္ၚဲဏအ် အခိၚ်နူဂယးပြဟ် ၜိုတ် (၃) နာဍဳဂှ် လမျီုဒးအိုတ်အာကီုရ။
ညးလုပ်လောန်ဒုဟ်ဏအ်ဝွံ ဂွံအာယုက် (၁၈) သၞာံဓဝ်တုဲ ယၟုခမေဝ်နာန်ကေတ် ကေၚ်ဒှ်လဝ်ကွးဘာတြေံ ပ္ဍဲဘာ (ပတံၚ်ပရဓါန် ဍဳရဳဝါတ်)ဏအ်မွဲတၠတုဲ ဟိုတ်နူအ္စာဘာမွဲတၠ ကဵုဒုဟ်ဒဏ် ကုဒေံညးတေံဂှ်ရ ဟွံပေၚ်စိုတ်လ္တူအ္စာဘာဂှ် သ္ဂောံကလေၚ်ပၠန်ဂးတုဲ ပၠံၚ်ဏာလွဟ်ဇရေၚ်တဲဗၠာဲသၟိၚ်ကြပ်ဗ္ဒါဲဂှ်မွဲတၠ လုပ်ပန်ပှော်မံၚ် ပ္ဍဲကဵုဘာတန်ဗ္တောန်ဂှ်ရ။
သၟတ်ညးရပ်လွဟ် လုပ်လောန်လဝ်ဒုဟ်ဏအ်ဂှ် ယဲစိုတ်ညးတေံနွံမံၚ်တုဲ ဟိုတ်နူဟွံပေၚ်စိုတ်ကဵု အ္စာဘာလေဝ်ဒှ်ကၠုၚ်ဂှ်ရ ထိၚ်စိုတ်ဟွံမာန် ဗက်ပန်ပှော်မံၚ်ပ္ဍဲကဵုဘာဂှ် ကြာန်ကြာန်ရောၚ် ဂအုပ်ဘာမွဲတၠဂှ် ဂးလဝ်သာ်ဏအ်ရ။
ပြဟ်ဟ်ဏအ်ဝွံ သၟတ်ညးလုတ်လောန်ဒုဟ်မွဲတၠဂှ် ဗၠာဲသၟိၚ်သေံတအ် ရပ်ထိၚ်ဂွံလဝ်တုဲ အပ္ဍဲကဵုမစၟဳစၟတ်ဂှ် ပရူဒဒှ်သုၚ်စောဲလဝ် ဂဥုဲၜူမာဲဂှ်နွံဟၟဲ စၟဳစၟတ်အာတုဲ နကဵုဒုဟ်ဒဏ်အမှုရာဇဝတ်မွဲ ပံက်ဂဗုတ်ကေတ်မံၚ်အရေဝ်နွံရ။
