ယက္ခဂုမ္ဘဏ်
ကြဴနူပေါဲရုဲမာဲ ကဝ်မယှေန်ပၞာန်တအ်တုဲဒှ်အာတုဲဂှ် လစွံစိုတ်အာဇြဳယာန် သာ်လဵုဒှ်ကၠုၚ်မာန်ရောဂှ် ပတိုန်ထ္ၜးဏာလညာတ်ရ။
တာလျိုၚ်ဥက္ကဌအာဇြဳယာန်ဂှ် သၞာံဏအ် ဒးအလန်ဍုၚ်ဖိလေတ်ဗာၚ်ရ။ လောန်ကၠုၚ်အခိၚ်ပေါဲရုဲမာဲဂှ် နကဵုညးစၞးအာဇြဳယာန် သွက်သ္ဂောံလ္ၚတ် စပ်ကဵုပေါဲရုဲမာဲတုဲ ဟွံဗလးဏာလဝ်ညးစၞးရ။ ဟွံသ္ပစၟတ်သမ္တီကဵု ပေါဲရုဲမာဲရောၚ်ဂှ်လေဝ် ဟီုဂးလဝ်နွံရ။ ၜိုန်ဂှ်လေဝ် ပ္ဍဲကဵုကောံဓရီုဝန်ဇၞော်ဍုၚ်သအာၚ် အာဇြဳယာန် ကၠောန်ဗဒှ် အလန်ကၠာအိုတ် ပ္ဍဲဍုၚ်ဖိလေတ်ဗာၚ်ဂှ် အာစာပရိုၚ်တအ်သၟာန် “သာ်လဵု စွံစိုတ် လ္တူအလဵုအသဳဍုၚ်ဗၟာတၟိရော” တုဲ “ပြဟ်ဟ်ဏအ် ပိုဲဟွံသ္ပစၟတ်သမ္တီဏီ” သှ်ဏာလဝ်ရ။
ရံၚ်ကဵုဂလာန်မသှ်ဏာဂှ်တုဲ အဓိပ္ပါဲဍေံ ဒှ်မံၚ်တၚ်သၟာန်မွဲရ။ “ပြဟ်ဟ်ဏအ် ပိုဲဟွံသ္ပစၟတ်သမ္တီဏီ” ဟီုသာ်ဏအ်မ္ဂး လဇုဲနူဏအ် ဂတနူဏအ် ကာလ ဒးသ္ပစၟတ်သမ္တီမ္ဂး သ္ပစၟတ်သမ္တီမာန်ရောၚ်ဂှ် ဂွံအဓိပ္ပါဲရ။ “ပြဟ်ဟ်ဏအ် ပိုဲဟွံသ္ပစၟတ်သမ္တီဏီ” လ္တူဂလာန်မဟီုဂးဏာဂှ် ညးခါတ်အကာဲ ပရေၚ်ဍုၚ်ကွာန်တအ် ဒှ်ကၠုၚ်ပဟေဠိရ။ ဍုၚ်ဗၟာလေဝ် နူကၠာဟွံဂွံဒက်ပတန် အလဵုအသဳတၟိဏီဏအ် သကိုပ်ပၞာန်မေန်အံၚ်လှာၚ်ဂှ် သ္ပသမ္မတဟာ ဟွံသ္ပဟာဂှ် ဟွံကၠးဏီရ။ မေန်အံၚ်လှာၚ်ဂှ် ဟိုတ်နူကလိလောန်ဒုဟ်ဒဏ်ဂၠိုၚ်ဒၟံၚ်တုဲ ယဝ်ညးတေံ သ္ပသမ္မတမ္ဂး ဍုၚ်အာဇြဳယာန်တအ်ကီု ဍုၚ်သအာၚ်ဂမၠိုၚ်ကီု သ္ဂောံသ္ပစၟတ်သမ္တီဂှ် ဝါတ်ဂါတ်ကၠုၚ်မာန်ရ။ သအာၚ်အာနူကဵု မေန်အံၚ်လှာၚ်တုဲ သမ္မတတိုန်ကၠုၚ်တၟိမ္ဂး ပရေၚ်ဆက်စၠောံ ကလုတ်ဍုၚ်သအာၚ်တအ် ပြေပြံၚ်ကၠုၚ်မာန်တုဲ ပရေၚ်သ္ပစၟတ်သမ္တီ ဒှ်ကၠုၚ်မာန်ရ။
ပၞောဝ်ကဵုဍုၚ်အာဇြဳယာန်ဂမၠိုၚ်ဂှ် ဍုၚ်ဖိလေတ်ဗာၚ်၊ ဍုၚ်အေန်ဒိုဝ်နဳယှာ၊ ဍုၚ်သေံ၊ ဍုၚ်မလေယှာ ပန်ဍုၚ်ဏအ်ဟေၚ် စိုတ်ဇၞော်ဒၟံၚ် သွက်သ္ဂောံပလေဝ်ဍုၚ်ဗၟာရ။ အခိၚ်အေန်ဒိုဝ်နဳယှာ ဒှ်ဥက္ကဌတေံ အေန်ဒိုဝ်နဳယှာဂှ် ကော်ဆဵုဂဗကဵု ဂကောံပၠန်ဂတး သဳကၠဳကၠုၚ်လဝ်နွံတုဲ ကြဴနူဂှ် သီုကၠုၚ်ဆဵုလဝ်ကဵု မေန်အံၚ်လှာၚ်ရ။ အခိၚ်ဆဵုဂဗကဵု မေန်အံၚ်လှာၚ်ဂှ် ဒဒှ်ရ အာဇြဳယာန်ဟွံသ္ပစၟတ်သမ္တီ ပေါဲရုဲမာဲဂှ် ဟီုလဝ်ကဵု မေန်အံၚ်လှာၚ်ပိုတ်တ်နွံရ။ လောန်ကၠုၚ်ခြာဟွံလအ်ဏအ်လေဝ် ကဝ်မယှေန်ပၞာန်တအ် ထဍေၚ်ပတိတ်လဝ် ကလုတ်ဍုၚ်ဒဳမဝ်ဂှ် ဇီုကပိုက်ကဵု ဂကောံအာဇြဳယာန်တအ် သွက်သ္ဂောံသ္ပစၟတ်သမ္တီ အလဵုအသဳဍုၚ်ဗၟာတၟိရ။
စိုပ်အခိၚ် ဍုၚ်ဖိလေတ်ဗာၚ် ဒှ်ဥက္ကဌအာဇြဳယာန်ဂှ် ဖိလေတ်ဗာၚ် အာနေပျဳဒဝ်တုဲ အာဆဵုဂဗလဝ်ကဵု မေန်အံၚ်လှာၚ်ရ။ ကလေၚ်နူဆဵုဂဗကဵု မေန်အံၚ်လှာၚ်တုဲ ကော်ဆဵုဂဗကဵု ဂကောံပၠန်ဂတးတအ်နွံရ။ စပ်ကဵုပေါဲရုဲမာဲတုဲ ပေါဲရုဲမာဲကဝ်မယှေန်ပၞာန်တအ် မကၠောန်ဏာလဝ်ဂှ် ပရေၚ်တပ်တးဓဝ်ယာလေဝ်ဟွံမွဲ ပရေၚ်သၞောတ်ဒဳမဵုကရေဇြဳလေဝ် ဟွံစှေ်ဂှ် ဖိလေတ်ဗာၚ် ဟီုပတိုန်ထ္ၜးလဝ် ပ္ဍဲကောံဓရီုအာဇြဳယာန်ရ။ ဟိုတ်ဂှ်ရ ရံၚ်ကေတ်အကာဲအရာပြဟ်ဟ်ဏအ် အာဇြဳယာန် သ္ဂောံသ္ပစၟတ်သမ္တီကဵု အလဵုအသဳဍုၚ်ဗၟာတၟိဂှ် ဒှ်ဟွံမာန်ဏီရောၚ် သ္ဂးရ။
ၜိုန်ဒှ်သာ်ဂှ်ကီုလေဝ် ကဝ်မယှေန်ပၞာန်တအ် ဟွံယှအ်ဇဲလွဳ ဗလးညးစၞးတုဲ အာဆဵုဂဗ တက်ကျာကဵု ဍုၚ်သအာၚ်တအ် ဂၠိုၚ်ကၠုၚ်ဂှ် ဂွံဆဵုကေတ်ရ။ ရံၚ်ကေတ်မ္ဂး ဂိုတ်ဂစာန်ပတိတ်ဒၟံၚ် ဒြဟတ် ညံၚ်သ္ဂောံကလိဂွံ ပရေၚ်ထံက်ဂလာန် နူဍုၚ်သအာၚ်တအ် ကြဴနူဒက်အလဵုအသဳတၟိတုဲဂှ်ရ။ ဍုၚ်ကြုက်ဂှ် လးလဝ်ဂၠံၚ်တရဴ သွက်မေန်အံၚ်လှာၚ်တအ် သ္ဂောံကွာ်ဒ္ဂေတ်ဗက်အာ နွံဒၟံၚ်ပိတၚ်ရ။ မွဲဂှ် ညံၚ်ဂွံကၠောန်ဗဒှ်ကဵု ပေါဲရုဲမာဲ၊ ပေါဲရုဲမာဲတုဲ ညံၚ်ဂွံဒက်ပတန်ပတိုန် အလဵုအသဳတၟိ၊ ၜါဂှ် အလဵုအသဳတၟိမံက်တုဲ ညံၚ်သ္ဂောံကော်ဘိက် ဂကောံပၠန်ဂတးတအ် သဳကၠဳပရေၚ်ၜိုဟ်လလမ်၊ ပိဂှ် ညံၚ်သ္ဂောံဗလးကဵု ဒဝ်အံၚ်သာန်သုဂျဳ ကေုာံ ကောန်ထံၚ်သၟာပရေၚ်ဍုၚ်ကွာန်တအ် မဒှ်ရ။
ရံၚ်ကေတ်မူဝါဒ ဂၠံၚ်တရဴကြုက်လးလဝ်ဂှ်မ္ဂး လ္တူမေန်အံၚ်လှာၚ် သွက်သ္ဂောံဍိုက်အာက္ဍိုပ် ပရေၚ်ဍုၚ်အနာဂတ်ဂှ် ကြုက်ဟွံမွဲပၟိက်ရောၚ်ညာတ်ကေတ်ရ။ ယဝ်ခါရ မေန်အံၚ်လှာၚ် ဆက်က္ဍိုက်အာက္ဍိုပ် ပ္ဍဲအလဵုအသဳတၟိဂှ်မ္ဂး ပရေၚ်ဓဝ်ပတှေ် နူဍုၚ်သအာၚ် ကလိဂွံဟွံလောဲဂှ် ကြုက်တအ်ညာတ်လဝ်ရ။ ဟိုတ်ဂှ်ရ ပ္ဍဲကဵုအလဵုအသဳတၟိဏအ် မေန်အံၚ်လှာၚ်ဟွံသေၚ် ညးသအာၚ်မွဲ ညံၚ်သ္ဂောံက္ဍိုက်အာက္ဍိုပ်ဂှ် ဖန်ဇန်ဒၟံၚ်ရောၚ်ဂှ် ခယျကေတ်ရ။ ဗွဲကြဴဏအ် ကြုက်ဂှ် ကော်ဆဵုဂဗဒၟံၚ်ကဵု ဂကောံပၠန်ဂတး သ္ပပတမ်နူအေန်ယူဂျဳတအ် ဂွံတီကေတ်ရ။ ပ္ဍဲကဵုဆဵုဂဗဂှ် ဒဒှ်ရ ကြုက်တအ် ဓဝ်ပတှေ်ဟွံမွဲ လ္တူသကိုပ်ပၞာန်မေန်အံၚ်လှာၚ် သွက်ဂွံဆက်အာ ပရေၚ်ဍုၚ်ကွာန်တုဲ အနာဂတ်ဂတနူဏအ် ဂကောံပၠန်ဂတးတအ် သာ်လဵုသ္ဂောံဆက်ပံၚ်တောဲကဵု အလဵုအသဳတိုန်တၟိ သာ်လဵုသ္ဂောံကၠောန်သ္ပအာဂှ် ကဵုကၠုၚ်ကသပ်ကုဂကောံပၠန်ဂတးတအ်ဂှ် ဂွံမိၚ်ကေတ်ရ။
ကဝ်မယှေန်ပၞာန်တအ်လေဝ် အတိုၚ်ဂၠံၚ်တရဴကြုက်လးလဝ်ဂှ်ရ အလဵုအသဳတၟိမွဲဂကောံ ဟွံမွဲကဵုမေန်အံၚ်လှာၚ် ညံၚ်သ္ဂောံထမံက်ရုပ်ရဴမာန်ဂှ် စကွာ်ဒၟံၚ်ဣရဂှ် ဂွံဆဵုကေတ်မံၚ် ဟဗုၚ်ဟဗုၚ်ဟပါဟပါရ။ ဟိုတ်ဂှ်ရ ကြုက်ဂှ် ကော်ဆဵုဂဗကဵု ဗော်ပရေၚ်ဍုၚ်ကွာန် မဇၞးလဝ်မာဲတအ်ဂှ်တုဲ သာ်လဵုသ္ဂောံဆက်ကွာ်အာတရဴ ပရေၚ်ဍုၚ်ကွာန်ဍုၚ်ဗၟာ အနာဂတ်ဂှ် ကြုက်ကဵုဒၟံၚ်လညာတ်တအ်ဂှ်လေဝ် ဂွံဆဵုကေတ်ဒၟံၚ်ရ။ ကဝ်မယှေန်ပၞာန်တအ်လေဝ် ဒက်အလဵုအသဳတၟိတုဲမ္ဂး ညံၚ်သ္ဂောံကလိဂွံ ပရေၚ်ထံက်ဂလာန်ဍုၚ်သအာၚ်တအ်ကီု ညံၚ်သ္ဂောံဂွံဒၞာဲညးစၞး ကုလသမဂ္ဂတအ်ဂှ် ဗလးညးစၞးတုဲ ဗက်အာဆဵုဂဗဒၟံၚ်ကဵု ညးတာလျိုၚ်ဍုၚ်သအာၚ်တအ်ဂှ် ဂွံဆဵုကေတ်ဒၟံၚ်ရ။
ဂကောံပၠန်ဂတး တမ်ကညၚ်တအ်လေဝ် ပရေၚ်ဆက်ဆောံကၠောံဍကဵု ဍုၚ်သအာၚ် ဟွံပရေံကွေံကွေံ ဟီုစဂွံရ။ ရံၚ်ကေတ်ကဵု ဍုၚ်ဒဳမဝ်တအ် သ္ပစၟတ်သမ္တီ ဒုၚ်တဲဂဗုတ် မစောဲစပ်လဝ်ကဵု ကဝ်မယှေန်ပၞာန်ဂှ်ကီု ဍုၚ်အာဇြဳယာန်ဂမၠိုၚ် ဟွံသ္ပစၟတ်သမ္တီ လ္တူအလဵုအသဳဍုၚ်ဗၟာ အနာဂတ်ဏအ်ကီုတုဲ ဂကောံပၠန်ဂတးတမ်ကညၚ် အေန်ယူဂျဳတအ် ယဝ်ဂိုတ်ဂစာန် သၠုၚ်ပတိုန်အသိၚ် ဍာပ်ဗက်ဍုၚ်အာဇြဳယာန်တအ်မာန်မ္ဂး အာဇြဳယာန်သွက်သ္ဂောံသ္ပစၟတ်သမ္တီ အလဵုအသဳဍုၚ်ဗၟာ အနာဂတ်ဂှ် ဒှ်ကၠုၚ်ဟွံမာန်ရောၚ်။
သရုပ်ကၠေံမ္ဂး အစောန်စရာဲ ပရေၚ်ဆက်စၠောံဍုၚ်သအာၚ် အေန်ယူဂျဳတအ်သၠုၚ်မ္ဂး အာဇြဳယာန် ဟွံဒှ်သ္ပစၟတ်သမ္တီကဵု အလဵုအသဳ ဍုၚ်ဗၟာတၟိတုဲ ယဝ်အစောန်စရာဲဟွံမွဲမ္ဂး အာဇြဳယာန် ကလေၚ်သ္ပအာစၟတ်သမ္တီ အလဵုအသဳဍုၚ်ဗၟာတၟိ မမံက်တိတ်ကၠုၚ် နူပေါဲရုဲမာဲကဝ်မယှေန်ပၞာန် တအ်ဂှ် ချိုတ်ပၠိုတ်ရောၚ်။
