ကြဴနူပေါဲရုဲမာဲတုဲဒှ်အာတုဲ လ္ပာ်ကမ္မယှေန်ပၞာန်တအ် စလလောင်တြးကၠုင် တ္ရဲကၠောန်ဗဒှ် ကောံဓရီုကၠတ်ထဝ်အဆံင်င်ရ။

ကောံဓရီု ကၠတ်ထဝ်ညးဍုင်ကွာန်ဂှ် ပ္ဍဲဂိတုမာတ် စၟတ်တ္ရဲ (၁၆)၊ ကောံဓရီု ကၠတ်ထဝ်ကောန်ဂကူဂှ် ဂိတုမာတ် စၟတ်တ္ရဲ (၁၈) ကေုာံ ကောံဓရီု ကၠတ်ထဝ်တွဵုရး/ရးဒေသဇၞော်တအ်ဂှ် ဂိတုမာတ် စၟတ်တ္ရဲ (၂၀) စကၠောန်ဗဒှ်အာရောင် ဂိတုဖေဖဝ်ဝါရဳ စၟတ်တ္ရဲ (၂၃) ဂှ် ကမ္မယှေန်ပၞာန် လလောင်တြးလဝ်ရ။

သွက်ကောံဓရီုကၠတ်ထဝ်ညးဍုင်ကွာန်ဂှ် ညးမကေင်ဒှ်လဝ်ဥက္ကဌ ကၠတ်ထဝ်ညးဍုင်ကွာန် နူသၞာံ ၂၀၁၅ ဥုတဳဃောန်မျာတ် ကော်ဘိက်တုဲ သွက်ကောံဓရီုကၠတ်ထဝ်ကောန်ဂကူကဵု ကၠတ်ထဝ်တွဵုရး/ရးဒေသဇၞော်တအ်ဂှ် ညးက္ဍိုပ်ပရေင်အုပ်ဓုပ်ကမ္မယှေန်ပၞာန် အံင်ဠေန်ဒိုဲ ကော်ဘိက်လဝ်ရ။

တုဲပၠန် နူကဵုကောံဓရီုကၠတ်ထဝ်တအ်ဂှ်ဝွံ မ္ဒးကၠောန်ၜိုတ်ရေင်တၠုင်အာ စပ်ကဵုလၟေင်ကမၠောန် ပရေင်ရုဲစှ်သမ္မတ ကေုာံ ပရေင်ပံက်အလဵုအသဳတၟိအဆံင်င်ဂမၠိုင်ရောင်။

ကၠာအတးဏအ်မ္ဂး သွက်ဂွံရုဲစှ်အာ သမ္မတ၊ သ္ကိုပ်ဝန်ဇၞော်၊ ညးဂအုပ်က္ဍိုက်ပ်ဒပ်ပၞာန် တၟိတအ်နွံဏောင် အခိင်ဆဵုဂဗလဝ်ကဵု ဝန်ဇၞော်ဍုင်သ္အာင်သေံ ပ္ဍဲဂိတုဖေဖဝ်ဝါရဳ စၟတ်တ္ရဲ (၁၈) ဂှ် ညးမဒှ်ဝန်ဇၞော်ဍုင်သ္အာင်ကမ္မယှေန်ပၞာန် ဟီုပ္တိတ်လဝ်ရ။

ပေါဲရုဲမာဲကမ္မယှေန်ပၞာန်ဂှ် ကၠောန်ဗဒှ်လဝ် စနူဂိတုဒဳဇြေမ်ဗါ စၟတ်တ္ရဲ (၂၈) သၞာံ ၂၀၂၅ စဵုကဵုဂိတုဂျာန္နဝါရဳ စၟတ်တ္ရဲ (၂၅) သၞာံ ၂၀၂၆ ဗၞတ် (၃) သ္ကုတ်တုဲ ဗော်လစှ်ေဒပ်ပၞာန်ဗၟာ USDP ဂွံဇၞးလဝ်အမာတ်ဂၠိုင်အိုတ်ရ။