ဂကောံရီုဗၚ်မၞိဟ် အဆံၚ်တွဵုရး မၞုံပ္ဍဲတွဵုရးဍုၚ်မန်ဂမၠိုၚ်တံဝွံ အောန်အိုတ် သွက်ဂွံစွံ တမ်ရိုဟ်သြန် (၅၀၀) ကိုဋ် အပ္ဍဲစရၚ်ဗာန် (တိုက်သြန်) ဂှ်ရောၚ် ဒးဒုၚ်ကဵုသမ္တီတုဲ ဟိုတ်နူ လၟိဟ်သြန်ဏံရ ဂကောံရီုဗၚ်မၞိဟ်လ္ၚဵုတံ ဒးဆဵုဂဗမံၚ်ခက်ခုဲရောၚ် အတိုၚ်ညးတာလျိုၚ် ဂကောံတံ ဟီုလဴလဝ်ဂှ် ဂွံတီကေတ်ရ။
ဂကောံရီုဗၚ်မၞိဟ် ကလိဂွံလဝ်အခေါၚ် အဆံၚ်တွဵုရးကဵု ရးဒေသဇၞော်ဂမၠိုၚ်ဂှ်ဝွံ အပ္ဍဲစရၚ်ဗာန်ဂှ် သြန် (၅၀၀) ကိုဋ်ဒကေဝ်၊ သွက်အဆံၚ်ကၟိန်ဍုၚ်မ္ဂး (၁၀၀၀) ကိုဋ်ဒကေဝ် ကေုာံ သွက်ဂကောံကၟိန်ဍုၚ်နာနာ အလဵုအသဳဟွံသေၚ်တံဂှ် သြန် (၃၀၀၀) ကိုဋ်ဒကေဝ် ဒးစွံလဝ်ရောၚ် ပ္ဍဲပေဲါကောံဓရီု အခေါၚ်ဒက်ပ္တန်ဂကောံကၟိန်ဍုၚ် ကမ္မယှေန်ပၞာန် ဂိတုဂျာန္နဝါရဳတုဲကၠုၚ်တေံဂှ် စၟတ်ဏာလဝ်ရ။
ဂကောံရီုဗၚ်မၞိဟ်အဆံၚ်တွဵုရး (၁၃) ဂကောံ နူဒေသမန် အာယုက်အခေါၚ်အိုတ်မံၚ်ဂှ်ဝွံ စွံတမ်ရိုဟ်သြန် (၅၀၀) ကိုဋ်တုဲဟေၚ် ဆက်ရေၚ်တၠုၚ်ဗပဵုအာယုက်မာန်ရောၚ် ပ္ဍဲဂိတုဖေဖဝ်ဝါရဳသတ္တဟလက္ကရဴအိုတ်တုဲကၠုၚ်တေံ ဟီုကဵုကၠုၚ်သမ္တီနွံရဂှ် အတိုၚ်ညး တာလျိုၚ် နူဂကောံရီုဗၚ်မၞိဟ် တွဵုရးဍုၚ်မန်မွဲတၠ ဟီုလဴလဝ်ဂှ် ဂွံတီကေတ်ရ။
လ္တူသၠုၚ်ပ္တိုန်တမ်ရိုဟ်သြန် နူ (၁၀၀) ကိုဋ်ဒကေဝ် စဵုကဵု (၅၀၀) ဂှ်တုဲ ဂကောံလ္ၚဵုတံ ဒးဒေံါဇူလဝ်ယာယဳနွံရောၚ် ဂးရ။
“လၟုဟ်ဏံ အာယုက်အခေါၚ်ဂကောံအိုတ်မံၚ်ဏောၚ်တှေ် သွက်ဂွံဗပဵုအာယုက်ဂှ် ထ္ၜးလိက်အုပ်စုတ်လဝ်သြန် (၅၀၀) ကိုဋ် ပ္ဍဲဗာန်ဂှ်မာန်မှ ဗပဵုကဵုအာယုက်ရ။ ပိုဲတံဂှ် ဂကောံပရဟိတဟီုတှေ် လၟိဟ်သြန်ဂလိုၚ်ဂှ် အလဵုနွံရော။ ကၠောန်မံၚ်နစေတနာတုဲ ကမၠောန်ပိုန်ဒြပ် ဟွံသေၚ်ပုဟ်။ ကၠောန်မံၚ်ကမၠောန်ဏံဂှ် ၜိုတ် (၂၀) သၞာံ နွံကၠုၚ်ရ။ ဗီုစၟတ်ဏာလၟုဟ်ဏံဂှ် ဟွံကေၚ်ဆဵုပုဟ်။ ဗီုဏံရတှေ် ဠ ဒးဇူတှေ် ဒးဇူဏောၚ်” သာ်ဝွံ ညးတာလျိုၚ်ဂကောံရီုဗၚ်မၞိဟ် ပွိုၚ်ဍုၚ်ရေဝ်မွဲတၠ ဟီုရ။
ပ္ဍဲဂကောံဒးဒုၚ်ကဵုလဝ်သမ္တီ (၁၃) ဂကောံတံဂှ်မ္ဂး နူပွိုၚ်ဍုၚ်မတ်မလီု (၈) ဂကောံ၊ ပွိုၚ်ဍုၚ်ကျာ်ထဝ် (၂) ဂကောံ၊ ပွိုၚ်ဍုၚ်ၜဳက္လေၚ် (၁) ဂကောံ၊ ရေဝ် (၁) ဂကောံကဵု နူပွိုၚ်ဍုၚ်ၜါသွာၚ် (၁) ဂကောံ ပါလုပ်ရ။
ဗွဲကြဴနူအာယုက်ဂကောံအိုတ်အာတုဲ ဟွံဆက်ဗပဵုအာယုက်မွဲသာ် ဆက်ကၠောန်သ္ပရေၚ်တၠုၚ်ကမၠောန်မ္ဂး ဒန်ထံၚ်စဵုကဵု (၃) သၞာံ ဒးဒုၚ်ဖျေံမာန်ရောၚ် ဓမံက်ထ္ၜးလဝ် ပ္ဍဲသၞောဝ်ဥပဒေတၟိဂှ်ရ။
ဂကောံရီုဗၚ်မၞိဟ်ဂမၠိုၚ်တံဝွံ ပ္ဍဲကမၠောန်ပရေၚ်ပလံၚ်ဗ္စိုပ် ညးဂိယဲ၊ ညးဒးဘဲချိုတ်ဂျိုၚ်ကဵု ကမၠောန်ဟံၚ်ပြာ် ဘဲအန္တရာဲသဘာဝဂမၠိုၚ်ဂှ် ကၠောန်သ္ပရီုဗၚ်ဒၟံၚ်အဓိကတုဲ ယဝ်ဂကောံရီုဗၚ်မၞိဟ်ဂမၠိုၚ် ဒေံါဇူအာမ္ဂး ညးဒေသတံ သွက်သ္ဂောံဂွံအရီုဗၚ်ကာတၟေၚ်ဂှ် သာတုဲခက်ခုဲကၠုၚ်မာန်ရောၚ် ညးဒေသတံ ဟီုရ။
“ဍေံတံ စၟဳစၟတ်မံၚ် (ဂကောံရီုဗၚ်မၞိဟ်) ယျဟာဂှ် ဟွံဂွံတီဏီပုဟ်။ ဆဂး ဂကောံရီုဗၚ်မၞိဟ်တံ ဒေံါဇူအာဏောၚ်ဟီုတှေ် သွက်ပိုဲတံ ကာလဒှ်ကၠုၚ် ကိစ္စကာတၟေၚ်တှေ် ဒးဆဵုဂဗခက်ခုဲဏောၚ်” သာ်ဝွံ ညးဗြဴဒေသ ပွိုၚ်ဍုၚ်ပံၚ်မွဲတၠ ဟီုရ။
အတိုၚ်တၚ်သ္ဂုတ်သွာတ်နူပေဲါကောံဓရီုကမ္မယှေန်ပၞာန် လလောၚ်ပ္တိတ်လဝ်လၟုဟ်ဏံမ္ဂး ဂကောံရီုဗၚ်မၞိဟ်ဂမၠိုၚ်တံဝွံ ပ္ဍဲဒေသကၠောန်သ္ပရေၚ်တၠုၚ်မံၚ်ကမၠောန်ဂှ် ပိဂိတုမွဲဝါ ဒးပ္တိုန်လိက်ဒုၚ်စဳရေၚ်ကဵု သ္ကိုပ်အုပ်ဓုပ်ပွိုၚ်ဍုၚ်ရောၚ်ဂှ်လေဝ် ကဵုလဝ်စၞောန်ရ။
ပ္ဍဲလိက်ဒုၚ်စဳရေၚ်ဂှ်ဝွံ Bank Statement ဂမၠိုၚ်ကဵု ဗီုရုပ်စၟတ်သမ္တီ လၟေၚ်ကမၠောန်ဂမၠိုၚ်ဂှ်ကီု ဒးစုတ်ပ္တိုန်ထ္ၜးတုဲ လိက်တၞးဆာဲဂှ်လေဝ် ဒးပလံၚ်ဗ္စိုပ်ပ္တိုန်ထ္ၜးကဵု ဂကောံကဵုအခေါၚ်ဒက်ပ္တန် ဂကောံ မဆေၚ်စပ်တံကဵု ဌာနအလဵုအသဳမဆက်စပ် ကေုာံ ဂကောံဂမၠိုၚ်တံရ။
ဂကောံရီုဗၚ်မၞိဟ်ဂမၠိုၚ်ကဵု သၞာဲဒဴစေတနာ ဟွံဂွံပ္တိုန်စရၚ်အခေါၚ်တံဂှ်ဝွံ နူကမ္မယှေန်ပၞာန်တံ သၟာၚ်နူဗက်ပလီုသီဒၟံၚ်တုဲ နကဵုဂကောံဂမၠိုၚ်တံ လ္ပယှုက်ထုဲကဵု ဗော်ပရေၚ်ဍုၚ်ကွာန်၊ ကိစ္စသြန်ဇွောဝ်လုပ် ကေုာံ လ္တူဖျေံစွံလဝ်စရၚ်ချိုတ်တ်ပၠိုတ်တ်တံဂှ် ကၠောန်သ္ပ ရေၚ်တၠုၚ်မံၚ် ဗွဲမတေၚ်ဂြတ်ရောၚ် ဂွံတီကေတ်ရ။
