ပ္ဍဲအရာပ်ဇြေဂျဵု၊ ဍုၚ်မတ်မလီု၊ တွဵုရးဍုၚ်မန်ဂှ်ဝွံ သ္ၚိဒၟံၚ်မၞုံသ္ကဲဆေၚ်မောဝ်ကထ “အာဟာရ” မွဲမ တူအာပၟတ်ဂှ်ရ မိနော် အပါဇၞော် အာယုက်ဇၞော် (၂) တၠ ဒးချိုတ်အာတုဲ ဒးအာဘဲဝပ် (၁) တၠရနွံဂှ် ဂွံတီကေတ် နူဂကောံပၠိုတ်ပၟတ်မတ်မလီုမွဲတဆံၚ်ရ။
ပ္ဍဲကဵုသ္ၚိဒၟံၚ် မိနော် အပါနော်ကဵု ကောန်ဝုတ်ညးတံ မံၚ်တန်တဴဒၟံၚ်ဂှ်ဝွံ နူကဵုထၟာဲဓာတ်ဍုန်ဍာ် က္တဴလောန်အာဂှ်ရ တ္ၚဲဏံ အခိၚ်နူဂယးပြဟ် (၂) နာဍဳကဝက်ဂှ် ပၟတ်စတူလဝ်ရ။
အခိၚ်သ္ၚိဒၟံၚ်တူမံၚ်ပၟတ်ဂှ်ဝွံ ဟိုတ်နူသၟုဟ်ယက်ဂှ်ရ မိနော် အပါနော် မၞုံဒၟံၚ်အပ္ဍဲခဒမ်သ္ၚိဒၟံၚ်ဂှ် အံက်ဇြဳဂျေန်ပိုတ်သ္ကုတ်အာတုဲ အခိၚ်ကၠာဟွံဂွံရီုဗၚ် ဇရေၚ်ဂကောံဟံၚ်ပြာ်ဏီဂှ် လမျီုအိုတ်အာရ။ ကောန်ဝုတ်ညးတံဝွံ နကဵုဘဲဝပ်တူပၟတ်ဂှ် ဒုၚ်လွဳလွတ်မံၚ် ပ္ဍဲရုၚ်ဂဥုဲမတ်မလီုရောၚ် ဌာနက္ဍိုက်က္ဍိုပ်ပၠိုတ်ပၟတ်တံ ဟီုရ။
“ဗီုဒှ်ဂှ်တှေ် ဟိုတ်နူသၟုဟ်ယက် ပၟတ်တူမံၚ်ဂှ်ရ အံက်ဇြဳဂျေန် ပိုတ်သ္ကုတ်အာရ။ ပ္ဍဲကဵုခဒမ်ဂှ် အံက်ဇြဳဂျေန်ပိုတ်တှေ် မိနော်ကဵု အပါနော်ဂှ် ဝိုတ်စိပ်အာရ။ ဒးချိုတ်အာ နကဵုဘဲဝပ်တူပၟတ်ရ။ ကောန်ဝုတ်ညးတံဂှ်တှေ် ဂြိပ်ဗၠးတိတ်ကၠုၚ်ရ။ ဒးအာဘဲဝပ်ကီု” သာ်ဝွံ ဟီုရ။
ဇွညးတူပၟတ်ချိုတ်အာ (၂) တၠဂှ်ဝွံ ဂကောံဟံၚ်ပြာ်မၞိဟ်ရာမညကာတၟေၚ်ကဵု ဂကောံရီုဗၚ်မၞိဟ်ဗိုလ်ဗိုလ်ဝေန်တံ ပလံၚ်ဏာ ဇရေၚ်ရုၚ်ပါ်စြေက် ပ္ဍဲရုၚ်ဂဥုဲဍုၚ်မတ်မလီုရ။ပ္ဍဲကဵုပရူဒဒှ်တူပၟတ်ဏံဂှ်ဝွံ နူဂကောံပၠိုတ်ပၟတ်ဇဳ ဖျေံသဇိုၚ်မတ်မလီုတံ ဘိုၚ်ရေၚ်တၠုၚ်ပၠိုတ်လဝ်တုဲ အခိၚ်နူဂယးပြဟ် (၃) နာဍဳကဝက်ဂှ် ပၟတ်ညိၚ်အာကီုလေဝ် သ္ၚိဒၟံၚ်ၜါထပ်၊ ကၟဳသောတ်၊ ဇမၠိၚ် (၂၀) ပေ၊ အနာံ (၃၅) ဂှ် တူအာပေၚ်ပေၚ်ရ။
ဌာနက္ဍိုက်က္ဍိုပ်ပၠိုတ်ပၟတ်မတ်မလီုတံလေဝ် ဟိုတ်နူသာသ္ပအ်တုဲ ပရူဒဒှ်တူပၟတ် ကတဵုဒှ်မံၚ် ပ္ဍဲဒေသမန်ဂှ် အပ္ဍဲကာလရာသဳက္ညၚ်ဏံ ညးဍုၚ်ကွာန်တံ စွံသတိကဵု ဘဲအန္တရာဲပၟတ်ဗွဲတၟေၚ်ညိဂှ် ဟီုဂးဖတိုက်ဖအောဝ်လဝ်ရ။
အပ္ဍဲသၞာံ (၂၀၂၆) ဏံ ပ္ဍဲတွဵုရးဍုၚ်မန်ဝွံ ပရူဒဒှ်တူပၟတ် ဟွံအောန်နူ (၇) ဝါ ကတဵုဒှ်ကၠုၚ်လဝ်ဂှ်မ္ဂး သ္ၚိဒၟံၚ် ဟွံအောန်နူ (၆၁) မ တူပၟတ်လီုလာ်ကၠုၚ်တုဲ ရုၚ်ဂဒဵုထ္ၜိုတ် (၃) ရုၚ် တူပၟတ်လီုလာ်အာလဝ်ကီုရောၚ် ဂွံတီကေတ် နူတၚ်နၚ်ဌာနက္ဍိုက်က္ဍိုပ်ပၠိုတ်ပၟတ် မဆေၚ်စပ်တံရ။
