ပ္ဍဲကဵုတ္ၚဲသၟာဂူယာဝါဗ္ၚ ဂိတုမာတ် (၂) တ္ၚဲဏံဝွံ ကောန်ထံၚ် ညးဗြဴ/ညးတြုံ နူထံၚ်/အချုက်နာနာ လၟိဟ် (၁) ဠက်တၠပြၚ်တံဂှ် ကမ္မယှေန်ပၞာန်တံ ကဵုအခေါၚ်ဗၠးနူဒုဟ်ဒန်တုဲ အမှု (၉) လ္ၚီပြၚ်ဂှ်လေဝ် ရုပ်သီထောံကီုရောၚ် ကမ္မယှေန်ပၞာန်တံ လလောၚ်ပ္တိတ်လဝ်ရ။
အလုံမွဲကၟိန်ဍုၚ်ဝွံ ညးဒးဒုၚ်ဖျေံလဝ်ဒုဟ်ဒန် နကဵုၝောံပိုဒ်သၞောဝ်ဥပဒေ ဗ္တိုက်သရိုဟ်ပရေၚ်ပကီုပရာပ် (၅၀ – ည) ကဵု (၅၂ – က) (၇၃၃၅) တၠဂှ် ကဵုအခေါၚ်ဗၠးနူဒုဟ်ဒန်တုဲ ကောန်ထံၚ်တၞဟ်ဟ် ဒးဒုၚ်ဖျေံလဝ်ဒုဟ်ဒန် နကဵုအမှုနာနာ (၂၈၂၅) တၠဂှ်လေဝ် ကဵုအခေါၚ်ဗၠးနူဒုဟ်ဒန်ကီုရောၚ် လလောၚ်ပ္တိတ်လဝ်ရ။
ညးကဵုလဝ်အခေါၚ်ဗၠးနူဒုဟ်ဒန်ဂမၠိုၚ်ဏံဝွံ ယဝ်ထပ်လုတ်လောန်ဒုဟ်မွဲဝါပၠန်မ္ဂး သၟာၚ်နူဒုဟ်ဒန်တုဲဂှ်တုဲ ဒုဟ်ဒန်လၟုဟ်ဏံလေဝ် နကဵုတၚ်ဒုၚ်ဝန် ဒးဒုၚ်ဆက်ဖျေံ အာရောၚ်ဂှ် ကဵုလဝ်အခေါၚ်ဗၠးနူဒုဟ်ဒန်ရ။
တုဲပၠန် ကောန်ထံၚ် တြုံ/ဗြဴ နူဍုၚ်သၟာၚ် (၁၀) တၠဂှ်လေဝ် ကဵုအခေါၚ်ဗၠးနူဒုဟ်ဒန်တုဲ ကဵုဒန်ဗက်ဗ္ဒဴထောံနူဍုၚ်ရောၚ် ဓမံက်ထ္ၜးလဝ်ရ။
ၜိုန်ဂှ်ကီုလေဝ် စဵုကဵုအခိၚ်လၟုဟ်ဏံ စရၚ်ကောန်ထံၚ်ဗၠးဒုဟ်ဒန် နူအချုက်/ထံၚ်နာနာ တွဵုရးဍုၚ်မန်ဂှ် ဟွံဂွံတီကေတ်ဏီရ။
တ္ၚဲဏံ အတိုၚ်ၝောံပိုဒ်သၞောဝ်ဥပဒေ ဗ္တိုက်သရိုဟ်ပရေၚ်ပကီုပရာပ် (၅၀ – ည)၊ (၅၂ – က) ဂှ်မ္ဂး ညးဒးဒုၚ်စောဲလဝ်အမှုကဵု ညးဂြိပ်ပဲါဓလေတ် (၁၂၄၈၇) တၠ နကဵုအမှုသီုဖအိုတ် (၉၅၃၂) အမှုဂှ် ရုပ်သီထောံတုဲ နူအခေါၚ်ဗၠးနူဒုဟ်ဒန်အမှုဂှ်ကီု၊ ကောန်ထံၚ် ဒးဒုၚ်ဖျေံလဝ်ဒုဟ်ဒန်တၞဟ်တၞဟ်တံဂှ်လေဝ် နကဵုဒုဟ်ဒန် (၆) ဂအုံ (၁) ဂအုံဂှ် ကဵုအခေါၚ်ဗၠးနူဒုဟ်ဒန်ရောၚ် လလောၚ်ပ္တိတ်လဝ်ရ။
ဂိတုဂျာန္နဝါရဳ စၟတ်တ္ၚဲ (၄) တုဲကၠုၚ်တေံဂှ်ဝွံ နဒဒှ်အသေအဟာန်တ္ၚဲဗၠးၜး မရနုက်ကဵု (၇၈) ဝါဂှ် ကမ္မယှေန်ပၞာန် ကဵုလဝ်အခေါၚ်ဗၠးနူဒုဟ်ဒန် ကုကောန်ထံၚ် (၆၁၃၄) တၠတုဲ ကောန်ထံၚ် တြုံ/ဗြဴ နူဍုၚ်သၟာၚ် (၅၂) တၠတံဂှ် ဖအောန်ဖျေံဒုဟ် ကဵုအခေါၚ်ဗၠးနူဒုဟ် ဒန်တုဲ သီုကဵုဒန်ဗက်ဗ္ဒဴထောံနူဍုၚ်ကီုရ။
