ကၟိန်ဍုၚ်သေံလလောၚ်ပ္တိတ် ဒေံါဇူပရေၚ်ပလံၚ်ဗ္စိုပ် ကၠေၚ်စက်၊ ကၠေၚ်ဍေန် ဇရေၚ်ဍုၚ်သၟာၚ်တုဲဂှ်မ္ဂး ဟိုတ်နူပရိုၚ်ဟောလဟောလံၚ် ကၠေၚ်စက်ပိုတ်သ္ကုတ်မာန်ဂှ်ရ ဆေၚ်ကၠေၚ်စက် မၞုံအပ္ဍဲပွိုၚ်ဍုၚ်၊ တွဵုရးဍုၚ်မန်ဂှ်ဝွံ အခိုက်ရာန်ကၠေၚ်စက်ပြေၚ်ရေၚ် က္လေၚ်ဒှ်ကၠုၚ်တုဲ ဆေၚ်လ္ၚဵုတံ တၟာတ်လဝ်နွံရောၚ် ဂွံတီကေတ် နူညးဒေသလ္တူဍုၚ်တံရ။
အတိုၚ်ညးဒေသ ဍုၚ်မတ်မလီုမွဲတၠဟီုဂှ်မ္ဂး တ္ၚဲဏံ ပ္ဍဲကဵုဆေၚ်ဇၞော်သွံကၠေၚ်စက်ဂမၠိုၚ်ဂှ်ဝွံ ညးရာန်နကဵုဂါလန်၊ စေဝ်ဗူတံဂှ် ဟွံသွံကဵုမွဲသာ် ကွဳစက်မွဲဖ္ဍိုက် နူ (၃၀၀၀၀) စဵုကဵု (၅၀၀၀၀) ဒကေဝ်၊ ကွဳလိုန်ဓာတ်မွဲဖ္ဍိုက် ဗၞတ် (၅၀၀၀) ဒကေဝ်ဟေၚ် သွံကဵုမံၚ်တုဲ ညးပြေၚ်ရေၚ်ရာန်ဂမၠိုၚ်နွံမံၚ်ရောၚ် ဂးရ။
ဟိုတ်နူဒှ်ကေၚ်ကာဂၠးတိဂှ်ရ ညးစကာကၠေၚ်စက်ဂမၠိုၚ် ဒှ်ဓဝိၚ်ဂၠိုၚ်တုဲ ဂိတုမာတ် (၃) နူတနေံဏံဝွံ ပ္ဍဲဍုၚ်မတ်မလီု၊ ပံၚ်၊ မုဟ်ဍုၚ်ကဵု ဇြပ်ဗုဂှ် ညးပၠံၚ်ရာန်ဂၠိုၚ်ဂှ်ရ ဒးတၟာတ်လဝ် ဆေၚ်ရောၚ် ညးရာန်ကၠေၚ်တံ ဟီုရ။
“အာဗပေၚ်ကဵု ကွဳစက်တှေ် ဍေံတံ ဗပေၚ်ကဵုရ။ ဆဂး ရာန်ကဵုဂါလန်ဏောၚ်ဟီုတှေ် ဍေံတံ ဟွံသွံကဵုပုဟ်။ နူတနေံဏံ ရာန်ကဵုဂါလန် ဂွံမံၚ်ဏီရ။ ဆဂး တ္ၚဲဏံ ဟွံဂွံရပုဟ်။ ဆေၚ်လ္ၚဵုတံဂှ် တၟာတ်ထောံယျ။ ညးပြေၚ်ရေၚ်မၚ်မံၚ်တံလေဝ် ဂၠိုၚ်ရ” သာ်ဝွံ ညးဒေသဍုၚ်မတ်မလီုမွဲတၠ ဟီုရ။
ပ္ဍဲဆေၚ်ဇၞော်သွံကၠေၚ်စက် DENKO ဍုၚ်မတ်မလီုဂှ်ဝွံ တ္ၚဲဏံ အံက်တုၚ် (၉၂) မွဲလဳတာ (၂၆၆၀) ဒကေဝ်၊ (၉၅) မွဲလဳတာ (၂၇၃၀) ဒကေဝ်၊ ဒဳဇြာ မွဲလဳတာ (၃၀၇၅) ဒကေဝ်ကဵု ပရဳမဳယာန်ဒဳဇြာ မွဲလဳတာ (၃၀၅၀) ဒကေဝ် ၚုဟ်နွံမံၚ်ကီုလေဝ် နကဵုၚုဟ်မ္ၚးမ္ဂး ဗီုဒးစိုတ် သွံရာန်ဒၟံၚ်နွံရ။
အခိၚ်လၟုဟ်ဏံ ဆေၚ်ကၠေၚ် အပါဆာန်၊ သောန်မျာန်မာ၊ ရာဇြာမေန် ပ္ဍဲဍုၚ်မုဟ်ဍုၚ်ဂှ်ဝွံ သၟာၚ်နူသွံ နကဵုသၞောတ်ဗ္ၜတ်အခိၚ်တုဲ ၜိုတ်နွံပၟိက်ဂှ် ရာန်ကေတ်ဟွံဂွံရောၚ် ညးဒေသမုဟ်ဍုၚ်မွဲတၠ ဟီုရ။
“ပိုဲတံဂွိၚ်ဖေက် ကၠေၚ်စက်ပိုတ် ဗီုကၠာတေံပၠန်။ ရံၚ်အကာဲအရာလၟုဟ်ဏံတှေ်လေဝ် နူကဵုသေံဂှ် စဵုကဵုၜါအဒိုတ်ဂတဏံ ဟွံပြေပြံၚ်ဏီပုဟ်။ ဆက်တၟာတ်အာဏောၚ်ဟီုတှေ် ကၠေၚ်ပိုတ်သ္ကုတ်အာမာန်” သာ်ဝွံ ညးဟီုရ။
ကၠေၚ်စက်ဝွံ သွက်သ္ဂောံခနေံရပ်စပ် (ရပ်ကဵုစေဝ်ပၞောန်) ကဵု သ္ဂောံရုံဂပ်ဂှ်မ္ဂး စနူဂိတုမာတ် (၇) ဏံတုဲ ကွဳစက်ပူဂဵုဂမၠိုၚ်၊ ကွဳစက်စကာကမၠောန်ဂမၠိုၚ်ကဵု ကွဳစက်ပလံၚ်ဗ္စိုပ်ဂမၠိုၚ်တံ သွက်ဂွံစကာဒဳအာ ဗွဲမကိတ်ညဳကဵု စေဝ်ပၞောန်စၟတ်လဝ်ဂှ် နူဂကောံလလောၚ်ပရိုၚ် ကမ္မယှေန်ပၞာန်တံ လလောၚ်ပ္တိတ်လဝ်ရ။
ဟိုတ်နူပေဲါပၞာန်အကြာဂၠးတိ ကတဵုဒှ်မံၚ်ဂှ်ရ ကၟိန်ဍုၚ်သေံကီု သီုကၟိန်ဍုၚ်သၟာၚ်ဂမၠိုၚ် လလောၚ်ပ္တိတ် ဒေံါဇူပရေၚ်ပလံၚ်ဗ္စိုပ်ကၠေၚ်စက်တုဲဗက်ဂှ်မ္ဂး ပွမပၠံၚ်ရာန်ကၠေၚ်စက် ဗီုလၟုဟ်ဏံ ကတဵုဒှ်ကၠုၚ်တုဲ ဆေၚ်လ္ၚဵုတံ ကၠေၚ်ပိုတ်သ္ကုတ်နွံကၠုၚ်ရဂှ်လေဝ် ဂွံတီကေတ်ရ။
