ပ္ဍဲဒေသပယျဵု ဍုၚ်ကျာ်ပိဂှ် စနူဂိတုမာတ်လ္ပာ်မံက်ဝွံတုဲ ကပေါတ်စကာသွက်ပါၚ်ဖဴ မပ္တံကဵုသ္ၚု၊ ကၠေၚ်၊ ကသိုန်၊ မြေက်တအ် ၚုဟ်သၠုၚ်တိုန်ကၠုင်ဗၞတ်ညိညနွံရောင် ညးဒေသတအ် ဟီုရ။
သ္ၚုမောဝ်မွဲရိုက် နူကဵုၚုဟ်နွံဒၟံၚ် (၁၂၀၀) ၝာတ်ဂှ် ၚုဟ်သၠုၚ်တိုန်အာ (၁၅၀၀) ၝာတ်ကီု၊ ကသိုန်ဗ္ကေတ် (၁၆) ကဳလိုဝ်မွဲရိုက် နူကဵုၚုဟ်နွံဒၟံၚ် (၁၈၀) ၝာတ်ဂှ် ဒှ်အာ (၂၁၀) ၝာတ်ရောၚ် ဂးရ။
ကသိုန်ဗ္တာၚ် မွဲကဳလိုဝ် (၅၀) ၝာတ်ဂှ် ဒှ်အာ (၅၅) ၝာတ်တုဲ စၞဒကှ် မပ္တံကဵု မြေက်၊ ခရံက်၊ ကၠေၚ် တအ်လေဝ် ၚုဟ်ဂၠိုၚ်တိုန်အာ မွဲကဳလိုဝ် အကြာ (၅) ၝာတ်၊ (၁၀) ၝာတ်နွံရောၚ် တၠဆေၚ်ဖျာ လ္တူဍုၚ်ကျာ်ပိမွဲတၠ လဴထ္ၜးရ။
“ဟိုတ်ဍေံဂှ်တှ်ေ ကၠေၚ်က္ဍၚ်၊ ကၠေၚ်ဟွံမွဲ၊ ကေတ်ကၠေၚ်ဝါတ်တုဲ ဆေၚ်ဖျာသွံကၠေၚ်ဍောတ်တ် အကြာကွာန်ဂှ် တၟာတ်ကၠုၚ်သၟးဂၠိုၚ်တုဲ ရဲကၠောန်ကမၠောန်တံ ရဲသွံဖျာတံ ဒးလိင်ကွဳလိုန်ဓါတ်လာၚ်၊ ကွဳစက်လာၚ် ၚုဟ်က္ဍင်တုဲ ၚုဟ်ကပေါတ်ဖျာနာနာ သၠုၚ်တိုန်အာရောၚ်” သာ်ဝွံ ညးဟီုရ။
ဍုင်ကျာ်ပိဂှ် ဟိုတ်နူဒှ်ဍုင် မၞုံဒေသပယျဵုဗၟာ-သေံဂှ်ရ ညးဍုင်ကွာန်တအ်လေဝ် ဒးပဓါန်ဒၟံင်ကဵု ကပေါတ်ဗၞိက်နာနာ မတိတ်ကၠုင်နူလ္ပာ်ဍုင်သေံကဵု ဍုင်ဗၟာအိုတ်ရ။
ကပေါတ်ဇွောံမ စတံနူသ္ရု၊ ကၠေင်၊ ကသိုန်တအ်ဂှ်ဝွံ ညးမဒှ်တၠဓနတအ် ပၠုပ်နင်လဝ် နူလ္ပာ်တွဵုရးဍုင်မန်၊ ကရေင် ကေုာံ ရးဒေသတၞဟ်ဂၠိုင်တုဲ လုပ်ဍုင်ကျာ်ပိတုဲမ္ဂး ညးဍုင်ကွာန်မၞုံဒေသပယျဵုတအ် သွံရာန်တဴ နကဵုသြန်သေံ (ၝာတ်) အိုတ်ရ။
သာ်ဂှ်ကီု ဗၞိက်တိတ်နူဍုင်သေံ မပ္တံကဵုကပေါတ်သိုၚ်ခၞံသ္ၚိ၊ ကပေါတ်စက်နာနာ၊ သၠာကွဳစက်၊ သၠာကွဳလိုန်ဓါတ်၊ စၞစဒကှ်နာနာ ကေုာံ ဍာ်ဍာတ်တ်တအ်ဂှ် နူဍုင်ကျာ်ပိမွဲအဆံင် ပလံင်ပ္တိတ်ဏာဒၟံင်လ္ပာ်ဍုင်ဗၟာလေဝ်နွံ။
အကာဲအရာလၟုဟ်ဂှ် ဟိုတ်နူနွံကၠုင်ကဵုတင်ခက်ခုဲ ကၠေင်ပ္ဍေန်စက်ဂှ်ရ လၟိဟ်ကွဳစက်ဇက်ဖ္ဍိုက်ကပေါတ်ဗၞိက်တအ်လေဝ် အာကၠုင်လုပ်တိတ် အောန်စှ်ေကီုတုဲ ဂတဏအ် သာ်လဵုဆက်ဒှ်မာန် လဴဟွံဒးရောင် မၞိဟ်တြုံမၞုံတန်တဴဒၟံင်ဍုင်ကျာ်ပိမွဲတၠ ဟီုဂးကၠုင်ရ။
“ကိစ္စဏံ ဒးဟီုတှ်ေ တန်တဴဒၟံၚ်ကဵု အလဵုအသဳအုပ်ဓုပ်ဍုၚ်ပိုဲတၟာဂလိုၚ်ရ၊ ဗီုအကာဲအရာက္တဵုဒှ်ဒၟံၚ်လၟုဟ်ဏံဂှ် ရံၚ်ကဵုအလဵုအသဳဍုၚ်ဇိုၚ်ဝုတ်ဒိုဟ်ဂှ်တှ်ေ သွက်ကောန်ဍုၚ်ညးဍုၚ်ကွာန်ဍေံတံ ပရေၚ်ဂီုကၠီု၊ ပရေၚ်ခက်ခုဲနာနာ နူအလဵုအသဳဍေံတံ ထိၚ်ဒဝ်ဖန်ဇန်ပြုပြၚ် ကေတ်လျိုၚ်နာနာဖအိုတ်တုဲ တၟော်ရံၚ်ကဵုဍုၚ်ပိုဲတှ်ေ တၞဟ်ခြာဒၟံၚ် ဍာ်ကဵုကၠေၚ်ရောၚ်” သာ်ဝွံ ညးဟီုရ။
ဗွဲကြဴနူအမေရိကာန်-အေဿရေ ပံင်တုဲ လုပ်ပန်ဗ္တိုက်အဳရာန် စနူဂိတုမာတ်မံက်ဂှ် ဍုင်ဗၟာကီု သီုအလုံဂၠးတိမွဲ င္ရုဟ်ကၠေင်ပ္ဍေန်စက် သၠုင်တိုန်ရ။ မွဲကရောံဂှ်ဝွံ င္ရုဟ်ကပေါတ်ဗၞိက်နာနာ စနူကပေါတ်သွက်လုပ်ပါင်ဖဴတအ်လေဝ် င္ရုဟ်က္ဍင်ဗက်တိုန်ကီုရ။
