သၟာဂူဗ္ၚ အပ္ဍဲပွိုၚ်ဍုၚ်ပံၚ်၊ တွဵုရးဍုၚ်မန်တံဝွံ နကဵုစက်ဇြောတ်ဍာ်စကာကမၠောန်ဂှ် ဒးပြေၚ်ရေၚ်ရာန်မံၚ်ကၠေၚ်ရောၚ် ဂွံတီကေတ် နူသၟာဂူဗ္ၚတံရ။
နကဵုသၟာဂူဗ္ၚတံဝွံ ကာလရာန်ကၠေၚ်စက်မ္ဂး ဖ္ဍိုက်နၚ်စက်ဇြောတ်ဍာ်ဟေၚ် ကဵုအခေါၚ်ရာန်ရောၚ်ဂှ် သ္ကိုပ်အုပ်ဓုပ်ကွာန်/အရာပ်တံကဵု ဆေၚ်သွံကၠေၚ်စက်တံ ကဵုလဝ်သမ္တီရောၚ် ဂးရ။
စက်မွဲမမ္ဂး နကဵုသၞောတ်ပါ်အရၚ် သွက်ၚုဟ်ကၠေၚ် မွဲဠက်ဒကေဝ်ဟေၚ်ဂွံတုဲ မွဲအဒိုတ် သွံကဵုမွဲအလန်ရဂှ် ညးတဵုဂူသတ် အပ္ဍဲပွိုၚ်ဍုၚ်ပံၚ်မွဲတၠ ဟီုရ။
“ကၠေၚ်ဓာတ်ဂှ်တှေ် နကဵုလိက်ထံက်ဂလာန်ကီု နကဵုစေဝ်ကီုဂှ် ဟွံသွံကဵု ညးကၠောန်ဂူတံပုဟ်။ ကေတ်နၚ်စက်မှ သွံကဵုဏောၚ်။ ဆဂး လၟိဟ်ပမာဏသွံကဵုဂှ် အောန်ရ။ ကဵုဍာ်တှေ် ၜိုတ်မွဲနာဍဳဟေၚ် ဂွံရ။ အရိုဟ်တ္ၚဲသွံကဵုတှေ် ကိစ္စဟၟဲပုဟ်။ လၟုဟ်ဂှ် မွဲအဒိုတ်မှ မွဲအလန်၊ ကၠေၚ်ဓာတ်ဂှ် ၜိုတ်နွံပၟိက်ဟွံဂွံတှေ် ကဵုဍာ်ရုံရုံဂပ်ဂပ် ဟွံမာန်ပုဟ်။ တၞံတံဂှ်လေဝ် ကှ်အိုတ်ရ” သာ်ဝွံ ညးဟီုရ။
ကၠေၚ်စက်ဝွံ ၜိုတ်နွံပၟိက်ရာန်ကေတ်ဟွံဂွံတုဲ ပၠောပ်တြးကဵုဍာ် ဗွဲမရုံဂပ်ဟွံမာန်ဂှ်ရ တၞံသတ်၊ တၞံဒူရေန် ကေုာံ တၞံသတ်ဆုသတ်ဒုန်တၞဟ်တၞဟ်တံ မကှ်ဖ္ဍဟ်လီုလာ်အာနွံတုဲ တၞံလ္ၚဵုတံ သွက်သ္ဂောံက္လေၚ်ဂျိုၚ်ပၠန်ဂှ် အကာဲအရာဝါတ်ဂါတ်မံၚ်ရောၚ် သၟာတဵုဂူတံ ဟီုရ။
အခိၚ်လၟုဟ်ဏံ ဟိုတ်နူကၠေၚ်စက်ပိုတ်သ္ကုတ်တုဲ ပ္ဍဲကဵုဆေၚ်သွံကၠေၚ်စက် မၞုံအပ္ဍဲပွိုၚ်ဍုၚ်ပံၚ်ဂမၠိုၚ်ဂှ်ဝွံ မွဲအဒိုတ်မ္ဂး သွံကဵုဒၟံၚ် (၂) တ္ၚဲဟေၚ် ဂွံတီကေတ်ရ။
ညးတဵုသြောံက္ညၚ်ဂမၠိုၚ်တံဝွံ နကဵုလိက်ထံက်ဂလာန် သ္ကိုပ်အုပ်ဓုပ်ပွိုၚ်ဍုၚ်ဂှ် မွဲဨကမ္ဂး ဂွံအခေါၚ်ရာန်ကၠေၚ်ဓာတ် (၃) ဂါလန်ကီုလေဝ် အတိုၚ်လၟိဟ်ပမာဏစၟတ်လဝ်ဂှ် ဆေၚ်သွံကၠေၚ်တံ ဟွံသွံကဵုမွဲသာ် သွံကဵုဒၟံၚ် (၁) ဂါလန် (ပိဂအုံမွဲဂအုံ) ဟေၚ်ရဂှ် ညးတဵုသြောံတံ ဟီုရ။
“ညးတဵုသြောံတံဂှ် ကဵုရာန်ကေတ် နကဵုလိက်ထံက်ဂလာန်ရ။ ပ္ဍဲကဵုပိုဲဂှ် ဝါနွံ (၁၀) ဨကရ။ ဨ ဍေံတံ ဒးကဵုပိုဲ (၃၀) ဂါလန်ဂှ် လၟုဟ် ကဵု (၅) ဂါလန်ဟေၚ်ရ။ ရတ်သီဟွံဂတာပ်ရပုဟ်၊ လၟုဟ် ဗြဲလေဝ် ဂူရဏောၚ်။ ရမျာၚ်လ္ၚဴဂှ် ဂွံမိၚ်မံၚ်ယျ။ ဂွံမိၚ်ကေတ်ရမျာၚ်ဂှ်ဗက် ဍောၚ်ဟွံပြေရပုဟ်။ မုမှ ကၠောန်ဟွံဂွံတှေ်” သာ်ဝွံ ညးဗြဴတဵုသြောံ အပ္ဍဲပွိုၚ်ဍုၚ်ပံၚ်မွဲတၠဂှ် ဟီုရ။
ညးတဵုသြောံက္ညၚ်ဂမၠိုၚ်တံ ဟိုတ်နူရာန်ကၠေၚ်စက်ဟွံဂွံတုဲ ရတ်သီသြောံ ဗွဲမတာပ်အခိၚ်ဟွံမာန်ဂှ်ရ ဗြဲဂူစှေ်မ္ဂး သြောံဍာ်ဒကေဝ်စှေ်တုဲ အကာဲအရာ ဒးဆောံလေၚ်ဂၠိုၚ်နွံမာန်ရ။
နကဵုသၟာဂူဗ္ၚတံဝွံ သၟာၚ်နူစရိတ်တဵုလွဳ အိုတ်ဂၠိုၚ်တိုန်ကၠုၚ်ဂှ်မ္ဂး လၟိဟ်သြောံ၊ သတ်ဆုသတ်ဒုန်တိတ်ဂှ်လေဝ် အောန်စှေ်ကၠုၚ်မာန်ဂှ်ရ သြန်လုပ်အောန်တုဲ သွက်ပရေၚ်စသုၚ်မံၚ်စံၚ်ဂှ် ဒှ်ကၠုၚ်ခက်ခုဲမာန်ရောၚ် ဟီုဂးဒၟံၚ်ရ။
