ပ္ဍဲကွာန်အံၚ်တာယာတြေံ၊ သ္ကုတ်ရေဝ်သၟဝ်ကျာ၊ တွဵုရးဍုၚ်မန်ဂှ် ပ္ဍဲဂိတုမာတ် စၟတ်တ္ၚဲ (၈) တုဲကၠုၚ်ဏံ အကြာကရောၚ်ပၞာန်ဒပ်ကမ္မယှေန်ပၞာန်ကဵု ဒပ်ပံၚ်ကောံပၠန်ဂတးတံ ကတဵုဒှ်အာပေဲါဗ္တိုက် စဵုကဵု (၃) ဝါနွံရောၚ် ညးဒေသတံ ဟီုကဵု IMNA ရ။
ကရောၚ်ပၞာန်ကမ္မယှေန်ပၞာန် ဇြဟတ်ၜိုတ် (၂၀၀) မၞုံပ္ဍဲကွာန်အံၚ်တာယာတြေံ၊ သ္ကုတ်ရေဝ်သၟဝ်ကျာဂှ် နူတနေံဏံ ဂိတုမာတ် (၉) အခိၚ်တ္ၚဲစေၚ် အကြာ (၁) နာဍဳဂှ် ဒှ်ပေဲါဗ္တိုက် ကုဒပ်ပံၚ်ကောံပၠန်ဂတးတံ ၜိုတ် (၂၀) မိနေတ်ရ။
တုဲပၠန် အခိၚ်တ္ၚဲသဝ် (၄) နာဍဳပြၚ်ဂှ်လေဝ် က္လေၚ်ဒှ်ပေဲါဗ္တိုက်ၜါလ္ပာ် ၜိုတ် (၁၅) မိနေတ်တုဲ အခိၚ်တ္ၚဲသဝ် အကြာ (၆) နာဍဳပြၚ်ပၠန်ဂှ် ထပ်ဒှ်ပေဲါဗ္တိုက်ၜါလ္ပာ် ၜိုတ် (၁၀) မိနေတ်ရဂှ် ညးတြုံဒေသမွဲတၠ ဟီုရ။
“မွဲတ္ၚဲဓဝ် ပ္ဍဲကွာန်အံၚ်တာယာတြေံဂှ် ဒှ်ပေဲါဗ္တိုက် (၃) ဝါတုဲ သီုပန်ကဵုလွဟ်ဇၞော်ရ။ လ္ပာ်ဒပ်ပၠန်ဂတးတံ ဒးအာပိတၠဂှ် ဂွံမိၚ်ကေတ်။ ဆဂး ချိုတ်အာဟာ၊ ဒးအာဝပ်ဟာဂှ် ဟွံတီပုဟ်” သာ်ဝွံ ညးတြုံဂှ် ဟီုရ။
အခိၚ်ကတဵုဒှ်မံၚ်ပေဲါဗ္တိုက်ဂှ်ဝွံ နူတမ်ဒပ်အမၠံက် (၃၁၇) ကမ္မယှေန်ပၞာန် ဖျေံသဇိုၚ်တၟံကၞေၚ်တံ ပန်ခ္ဍိုၚ်နၚ်လွဟ် ဟွံအောန်နူ (၇) ဝါရ။
ကရောၚ်ပၞာန်ကမ္မယှေန်ပၞာန်တံဝွံ စဵုကဵုနူတနေံဏံ ဟွံက္လေၚ်ဆုတ်တိတ်မွဲသာ် ဆက်ကေတ်လဝ်ဒၞာဲ ဗဒဲါပွဳဗွိုၚ်ကွာန်တုဲ ညးဒေသတံ ဒှ်ဂဝိၚ် ဂွိၚ်ဖေက်က္လေၚ်ဒှ်ပေဲါဗ္တိုက်ပၠန် ညးဗြဴမွဲတၠဂှ် ဟီုရ။
“ဒးဟီုတှေ် အကာဲအရာဂှ် ဟွံညိၚ်ဝတ်ဏီပုဟ်။ ဂွိၚ်ဖေက် က္လေၚ်ဒှ်ပေဲါဗ္တိုက်ရ။ ဖေက်ဒးလွဟ်ဇၞော်ရ။ ကရောၚ်ပၞာန်ကမ္မယှေန်ပၞာန်တံလေဝ် နွံမံၚ်ဖိုဟ်ဟီုတှေ် ညးဒေသတံ ဟွံဂံၚ်အာကၠုၚ်ပုဟ်။ လွဟ်ဇၞော်ဂှ်လေဝ် ပန်ဏောၚ်ဟီုတှေ်” သာ်ဝွံ ညးဗြဴဂှ် ဟီုရ။
ပ္ဍဲဂိတုမာတ် စၟတ်တ္ၚဲ (၅) တုဲကၠုၚ်ဏံ နူဒပ်ပံၚ်ကောံမဟာမိတ်ပၠန်ဂတးကဵု ဒပ်ပံၚ်ကောံကောဒေံဒရုၚ် (မန် – တၞၚ်သဳ) တံ ဗ္တိုက်ထောံဖျေံဗမ် (၆) မကဵု ကရောၚ်ပၞာန်ကမ္မယှေန်ပၞာန် ဒေံါဇူမံၚ် ဗဒဲါကွာန်ကၞေၚ်ကၟအ် သ္ကုတ်ရေဝ်သၟဝ်ကျာဂှ်ရ။
သ္ကုတ်ဂၠံၚ်ရေဝ် – ဇြပ်ဗုဂှ်ဝွံ စပ္တံနူဂိတုဖေဖဝ်ဝါရဳ သတ္တဟလက္ကရဴအိုတ်ဂှ်တုဲ သၟာၚ်နူဂကောံစၟဳစၟတ်ကမ္မယှေန်ပၞာန်တံ စၟဳစၟတ်တေၚ်ဂြတ်ဂှ်မ္ဂး အပ္ဍဲကွာန်သ္ကုတ်ရေဝ်သၟဝ်ကျာကဵု ဗဒဲါပွဳဗွိုၚ်ကွာန်တံဂှ်လေဝ် ဂေတ်ကၚ်တုဲ ပတေၚ်လဝ်ဂီုကၠီုရောၚ် ညးဒေသတံ ဟီုရ။
ဗွဲကြဴနူကၠောန်ဗဒှ်ပေဲါရုဲမာဲတုဲ အပ္ဍဲဂိတုဖေဖဝ်ဝါရဳမံက်ဂှ်ရ သွက်သ္ဂောံထိၚ်ဒဝ် ဂၠံၚ်ဇၞော်စၟတ် (၈) မာန်ဂှ်မ္ဂး နူဂကောံကမ္မယှေန်ပၞာန်တံ ထ္ပက်မံၚ်ကရောၚ်ပၞာန် ဗွဲမသကာတ်မြဟ် အကြာပယျဵုရေဝ်-ဇြပ်ဗုကဵု သ္ကုတ်ရေဝ်သၟဝ်ကျာဂှ်တုဲ ကတဵုဒှ်ပေဲါဗ္တိုက်ကဵု ဒပ်ပံၚ်ကောံမဟာမိတ်ပၠန်ဂတးတံ မွဲနှေံမွဲနှေံရ။
ဟိုတ်ဂှ်ရ နကဵုညးဍုၚ်ကွာန်ဒေသတံဝွံ အဃောကမ္မယှေန်ပၞာန်တံ ထ္ပက်မံၚ်ကရောၚ်ပၞာန် အကြာပယျဵုရေဝ်-ဇြပ်ဗုကဵု သ္ကုတ်ရေဝ်သၟဝ်ကျာဂှ်မ္ဂး အခိၚ်ဟွံရုဲ ဒှ်ကၠုၚ်ပေဲါဗ္တိုက်မာန်ဂှ်ရ မံၚ်စံၚ်အာကၠုၚ်စွံသတိညိဂှ် နူဂကောံဒပ်ပၠန်ဂတးတံ ဟီုဂးဖတိုက်ဖအောဝ်လဝ်ရ။
