ဟိုတ်နူၚုဟ်ထဝ်ဂၠးတိသၠုၚ်တိုန်ဂှ်ရ အပ္ဍဲပွိုၚ်မွဲတ္ၚဲဓဝ်ဂှ်ဝွံ ၚုဟ်ထဝ်သၠုၚ်တိုန် (၃) ကိုဋ်ပြၚ်တုဲ ဂိတုမာတ် (၁) ၊ နူတနေံဏံ အခိၚ်သဝ်တ္ၚဲ လဂွံကဵုၚုဟ်ထဝ်မ္ၚးဂှ်မ္ဂး ထဝ် (၁၆) ၜဲ မွဲဒကေဝ်ဂှ် ၚုဟ်နွံမံၚ် စဵုကဵုမွဲကၠံစှ်ၜါကိုဋ်ရောၚ် ဂွံတီကေတ် နူဗွဝ်ဖျာထဝ်တံရ။
အခိၚ်လၟုဟ်ဏံဝွံ ၚုဟ်ထဝ်ဂၠးတိဂှ် မွဲအံၚ်သမ္ဂး နွံမံၚ်အကြာ (၅၂၈၀) ဒဝ်လာတုဲ အပ္ဍဲပွိုၚ်မွဲတ္ၚဲ မွဲအံၚ်သ ၚုဟ်တိုန်အာ ဗဒဲါ (၁၀၀) ဒဝ်လာရ။
မွဲကရောံကဵုၚုဟ်ထဝ်ဂၠးတိဂှ်ဝွံ ၚုဟ်ထဝ်အပ္ဍဲဍုၚ်လေဝ် သၠုၚ်တိုန်ဗက်ကီုဂှ်ရ နူတနေံဏံ ၚုဟ်ထဝ် (၁၆) ၜဲ မွဲဒကေဝ် နူကဵုမွဲကၠံဒ္စာံကိုဋ်မသုန်ဠက်ဂှ် အပ္ဍဲပွိုၚ်မွဲတ္ၚဲ ၚုဟ်သၠုၚ်တိုန်အာ စဵုကဵုပိကိုဋ်မသုန်ဠက်ရ။
ဟိုတ်နူပဋိပက္ခပၞာန် အကြာကၟိန်ဍုၚ်ဇြဟတ်ဇၞော်တံဂှ်ရ ၚုဟ်ထဝ်ဂၠးတိဟွံညိၚ်ဝတ်တုဲ ၚုဟ်တိုန်စှေ်ဂၠိုၚ်ကီု သီုၚုဟ်သြန်ဂၠးတိ်ကဵု ၚုဟ်ကၠေၚ်ဍေန်ဂမၠိုၚ်ဂှ်လေဝ် အကာဲအရာ လ္ပာ်တိုန်နွံမာန်ရောၚ် ညးလ္ၚတ်ဒၟံၚ်ဗွဝ်ဖျာဂမၠိုၚ်တံ သ္ၚဳဂၠိပ်လဝ်ရ။
ဆေၚ်ထဝ်အပ္ဍဲဍုၚ်ဂမၠိုၚ်ဂှ်ဝွံ အပ္ဍဲဂိတုဂျာန္နဝါရဳတုဲကၠုၚ်တေံ စနူၚုဟ်ထဝ်စိုပ်အာ လ္တူကၠံကိုဋ်ဂှ်ရ ဒေံါဇူလဝ် ပရေၚ်ရာန်ထဝ်ဒကောၚ်၊ ထဝ်ကလောံတုဲ နကဵုသၞောတ် ဒၠေံသြန်အန်လာၚ် ဒုၚ်တဲသွံရာန်ဂှ်လေဝ် ဟွံကၠောန်သ္ပရောၚ် ဂွံတီကေတ်ရ။
မွဲကရောံကဵုပရိုၚ်ပၞာန်ဂၠးတိဂှ်ဝွံ ပ္ဍဲကဵုတ္ၚဲဗွဝ်ဖျာတၟာတ်ဂှ် ၚုဟ်ထဝ်ဂၠးတိ တိုန်စှေ်မြက်ဒၟံၚ်တုဲ စနူတ္ၚဲဏံဗွဝ်ဖျာပံက်ဂှ်မ္ဂး အပ္ဍဲပွိုၚ်မွဲသတ္တဟ တန်တဴဒၟံၚ်ကဵု ပဋိပက္ခပၞာန် အကြာအဳရာန်ကဵု အေဿရေတုဲ ၚုဟ်ပြံၚ်လှာဲဆက်နွံမာန်ရဂှ်လေဝ် နူကဵုပွဳဗွိုၚ်ဗွဝ်ဖျာထဝ်တံ တော်တၟော်လဝ်ရ။
ဂိတုဂျာန္နဝါရဳ (၂၉) တုဲကၠုၚ်တေံဝွံ ၚုဟ်ထဝ်အပ္ဍဲဍုၚ် (၁၆) ၜဲ မွဲဒကေဝ်ဂှ် ၚုဟ်သၠုၚ်တိုန်လဝ် စဵုကဵုမွဲကၠံစှ်ဒ္စာံကိုဋ်နွံရဂှ်လေဝ် ဂွံတီကေတ်ရ။
ၜိုန်ဂှ်ကီုလေဝ် နူဂကောံတၠကမၠောန်ထဝ်ဍုၚ်လ္ဂုၚ်ဝွံ ၚုဟ်ထဝ် (၁၆) ၜဲ မွဲဒကေဝ်ဂှ် စၟတ်လဝ် တြဴစှော်ဒ္စိတ်ကိုဋ်ဖိုဟ်တုဲ ကိစ္စရာန်ဒေပ်ထဝ် ပရေၚ်ၚုဟ်ထဝ်ဟွံညိၚ် ဝတ်ဂှ်လေဝ် ကေတ်အာအရေဝ်ရောၚ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၅) တုဲကၠုၚ်ဏံ ကမ္မယှေန်ပၞာန်တံ လလောၚ်ပ္တိတ်လဝ်ရ။
