အခိၚ်လၟုဟ်ဏံဝွံ ကြပ်ကၠုၚ်ကဵု ပေဲါသွဟ်လိက်တန်လုပ်တက္ကသဵုကီု၊ တန်မူလကဵု တန်လဒေါဝ် သွက်မံၚ်လိက်ကီုဂှ်ရ ပ္ဍဲကဵုကွာန်လ္ၚဵု၊ ပွိုၚ်ဍုၚ်ကျာ်မြဟ်ဂှ်ဝွံ သ္ၚိကၠောန်သ္ပကေၚ်ကာမ္ၚဵုကဵုဒါန် သ္ပကုသဵုတံ စကာသံၚ်ဗံက် sound box မ္ဂး နအလဵုဂကောံအုပ်ဓုပ် ကမ္မယှေန်ပၞာန်တံ အာစိုပ်ကေတ်အရေဝ်ရောၚ် ဂွံတီကေတ်ရ။

စပ္တံနူဂိတုဖေဖဝ်ဝါရဳ (၂၁) ဏံတုဲ စဵုကဵုပေဲါသွဟ်လိက်တန်လုပ်တက္ကသဵုတုဲဒှ် ဂိတုမာတ် (၁၇) တေံ သၞောတ်ဗ္ၜတ်လဝ် အခေါၚ်ပံက်သံၚ်ဗံက်ရောၚ် နူရုၚ်အုပ်ဓုပ်ပွိုၚ်ဍုၚ်တံ ဟီုစၞောန်လဝ်ကဵု သ္ကိုပ်အုပ်ဓုပ်ကွာန် / အရာပ်တံနွံဂှ် ဂွံတီကေတ်ရ။

ၜိုန်ဂှ်ကီုလေဝ် နူကဵုသ္ကိုပ်အုပ်ဓုပ်ကွာန် / အရာပ်တံ ဟွံကဵုသမ္တီကုညးဒေသတံမွဲသာ် ပ္ဍဲဂိတုဖေဖဝ်ဝါရဳ သတ္တဟတတိယဏံ ပ္ဍဲသ္ၚိဒၟံၚ်ဂကောံကွာန်ကြေဝ်ဏာ ကၠောန်သ္ပဒၟံၚ် ကေၚ်ကာမ္ၚဵုသ္ပထ္ပိုဲခၟဳဂှ် သ္ကိုပ်အုပ်ဓုပ် ၜိုတ် (၄) တၠတံ ကၠုၚ်စိုပ်အခိၚ်ဗ္တံ သီုရပ်လဝ်မြတုဲ သီပလှ်ဏာ သံၚ်ဗံက်ကဵု စက်ဂမၠိုၚ်ရဂှ် ညးတြုံဒေသကျာ်မြဟ်မွဲတၠ ဟီုရ။

“ဍေံတံ ဒစးဒုၚ် လဴလဝ်ကဵုဟၟဲပုဟ်။ ၜိုတ်အခိၚ်သဝ်တ္ၚဲဂှ် ရပ်လဝ်မြတုဲ လုပ်ကၠုၚ်ကွာန်ကဵုကွဳလိုန်ဓာတ်ရ။ ဍေံတံ ကဵုဒေံါရ။ ဟွံကဵုကၠောန်သ္ပရပုဟ်။ ဂကောံကွာန်ကြေဝ်ဏာဏံသီုဖအိုတ် ဒးဒေံါထောံရ။ အရိုဟ်သၞာံ အခိၚ်ဏံတှ်ေ ပိုဲကၠောန်မံၚ် အလုံကွာန်ရ။ လၟုဟ်ဏံမှ ကဵုဒေံါဗီုဏံတှ်ေ ဟွံဂွံပုဟ်လေဝ်” သာ်ဝွံ ညးဒေသဂှ် ဆက်ဟီုလဝ်ရ။

ၜိုန်ဂှ်ကီုလေဝ် စဵုကဵုအခိၚ်လၟုဟ်ဏံ ကျာ်မြဟ်ကီု သီုကဵုပွိုၚ်ဍုၚ်ဗွဲမဂၠိုၚ် ပ္ဍဲတွဵုရးဍုၚ်မန်ဂှ်ဝွံ ပံက်လဝ်ဝိုၚ်ဝေၚ် မွဲကရောံကဵု ပေဲါသဘၚ်ဂမၠိုၚ်ဂှ် တ္ၚဲတၟာတ်ဟွံမွဲ ဆက်ကဵုအခေါၚ်ပံက် လဝ်နွံရောၚ် ညးဒေသဂမၠိုၚ်တံ ဟီုရ။

ဝိုၚ်ဝေၚ်လံၚ်သြန် ရမျာၚ်ကညာန်၊ ဒှ်မံၚ်ပလာပ်ပထုဲကဵု ညးဒေသတံ ဇၟာပ်တ္ၚဲဂှ် ဟွံကေတ်အရေဝ်မွဲသာ် ပွမဒၞာတာမံၚ် ပေဲါသဘၚ်ဘာသာကဵု အခိုက်ကၞာယေန်သၞာၚ်ဏံ ဂှ် ဒှ်ဟွံထေက်ရောၚ် ညးဒေသပံၚ်မွဲတၠ ဟီုရ။

“သွက်ဂွံပံက်သံၚ်ဗံက်ဂှ်တှေ် ဒးကေတ်ပါမေတ်ကဵု သ္ကိုပ်အုပ်ဓုပ်ကွာန်တံရ။ ပေဲါဟီုတှ်ေ ဒးကေတ်ပါမေတ်ကဵု သ္ကိုပ်အုပ်ဓုပ်ပွိုၚ်ဍုၚ်ရ။ နူတနိဏံ အာကေတ်ဂှ် ဟွံကဵုရပုဟ်။ ဗဒေံါထောံ သီုဖအိုတ်ရ။ ဆဂး ဝိုၚ်ဝေၚ်္ၚေၚ်လံၚ်သြန်တံဂှ်တှေ် ဍေံတံ ဟွံဗဒေံါပုဟ်။ လၟုဟ်လေဝ် ပံက်လဝ်တုဲ မၞိဟ်ဝေၚ်စေဝ်မံၚ်ဟဂှ်ရ။ ဍေံတံ သြန်လုပ်မံၚ်နူဂှ်တှ်ေ ဟွံဂံၚ်ဗဒေံါပုဟ်” သာ်ဝွံ ညးဟီုရ။

နူကဵုဝိုၚ်ဝေၚ်္ၚေၚ်လံၚ်သြန်ဂှ်ဝွံ မွဲဂိတုမ္ဂး ကလိဂွံမံၚ်သြန် လၟိဟ်ကဵုကၠံကိုဋ်ဂှ်ရ ညးတၠကမၠောန်ကဵု ဂကောံအုပ်ဓုပ်အရာပ် / ကွာန်တံ ကဵုလဝ်အခေါၚ်ပံက် ဗဗွဲဓဝ်ရောၚ် ဂးရ။

အပ္ဍဲကာလသွဟ်လိက်တန်လုပ်တက္ကသဵုဏံ အလုံကၟိန်ဍုၚ်ဗၟာ ကွးဘာသွဟ်လိက်တံ သ္ဂောံစွံအာရီုမာန်ဂှ်မ္ဂး သွက်သ္ဂောံဖအောန်ဖျေံ ပေဲါသဘၚ်၊ ပေဲါဇာတ်၊ သံၚ်ဗံက်ကဵု စက်သၠဲရမျာၚ်ဂှ် ဇၟာပ်သၞာံ သၞောတ်ဗ္ၜတ်ဒၟံၚ်နွံရ။

ၜိုန်ဂှ်ကီုလေဝ် အပ္ဍဲကာလပေဲါသွဟ်လိက်ဏံ ဟိုတ်နူဒပ်ကမ္မယှေန်ပၞာန်ကဵု ဒပ်ပၠန်ဂတးအပ္ဍဲဒေသတံ ဒှ်ပေဲါဗ္တိုက်ပန်ပှော်မံၚ်ညးသ္ကံတုဲ ပ္ဍဲကဵုကွာန် “ကျုံပိုၚ်” ၊ တွဵုရးကရေၚ်ဂှ်ဝွံ ကွးဘာတန်မူလကဵု တန်လဒေါဝ်ဂမၠိုၚ်တံ ဟွံဂီုကၠီုမွဲသာ် ဒးလုပ်သွဟ်မံၚ်လိက်ရောၚ် ဟီုဂးဒၟံၚ်ဂှ် ဂွံတီကေတ်ရ။