က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော်မေန်အံၚ်လှာၚ်ဝွံ ဂိတုမာတ် (၂) နူတနေံဏံ ဇိုန်နှၚ်တဆိပ်ကြာ “ဝဏ္ဏကျဝ်ထေန်” ကုနာဲလျးတၟး ဂကောံအလဵုအသဳတွဵုရးဍုၚ်မန်ရဂှ် ကဵုသမ္တီ လလောၚ်ပ္တိတ်လဝ်ရ။
ဗွဲကြဴနူသီအဝဵုတုဲဂှ်မ္ဂး ပ္ဍဲဂိတုဖေဖဝ်ဝါရဳ (၂၁) ဂှ် ကမ္မယှေန်ပၞာန်တံ ခါန်ကၞက်ပ္တိုန် ညးအုပ်ကာနာနာ (၁) ဗော်ညဳသၟဟ်မန် နာဲလျးတၟး နဒဒှ်ကောန်ဂကောံကံၚ်ဇြဳ မစဳရေၚ်ပရေၚ်အုပ်ဓုပ်တုဲ အခိၚ်လၟုဟ်ဏံလေဝ် ယိုက်ဂၠေၚ်မံၚ်တာလျိုၚ် နဒဒှ်ဝန်ဇၞော် ပရေၚ်ပိုန်ဒြပ် တွဵုရးဍုၚ်မန်ရ။
နာဲလျးတၟးဝွံ ပ္ဍဲပေဲါရုဲမာဲ သၞာံ (၂၀၂၅ – ၂၀၂၆) ဏံ လုပ်ပြိုၚ်ပ္ကာန် နသၞောတ်သ္ပစၞး သၞောတ်ဗ္ၜတ် (သၞောတ် – PR) ဒၞာဲစၠတ်ထဝ်တွဵုရးတုဲ ဒှ်ညးစၞးကလိဂွံလဝ်ဇၞး မွဲတၠကီုရ။
က္ဍိုပ်သ္ကိုပ်ပၞာန်ဝွံ မွဲကရောံဇိုန်နှၚ်တဆိပ်ကြာ “ဝဏ္ဏကျဝ်ထေန်” ကုနာဲလျးတၟးဂှ်မ္ဂး ဝန်ဇၞော်ကေၚ်ကာပယျဵု ကေုာံ ဂီုကၠီု သ္ကိုပ်ဗိုလ်ဇၞော်ကျဝ်ဇြဲမျေအ်၊ ဝန်ဇၞော်သယံဇာတ ဒံက်တာအံၚ်မျာတ်ကျဝ်ဇြုၚ်၊ ဝန်ဇၞော်ဆက်စၠောံဂၠံၚ်ဍာန် ဥူတေန်သာန်နာၚ်၊ ဝန်ဇၞော်ကေၚ်ကာကောန်ဍုၚ်အရၚ် ဥူခေန်မာၚ်ဥူကဵု ဂအုပ်သၞောဝ်ဥပဒေ ဥူမျေအ်အံၚ်ကီု သီုဖအိုတ် (၁၂၈) တၠ ပါလုပ်မံၚ်ဂှ် ဂွံဆဵုကေတ်ရ။
အတိုၚ်လလောၚ်ပ္တိတ်လဝ်ဂှ်မ္ဂး က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ်ဝွံ သ္ကိုပ်ရး ဌာန်ဂအုပ်ပၞာန်ရးအဂၞဲ မဖျေံသဇိုၚ်ဍုၚ်မတ်မလီု သ္ကိုပ်ပၞာန်ကျဝ်ဠေန်မာၚ်ဂှ်လေဝ် ဇိုန်နှၚ်လဝ်ကဵုတဆိပ်ကြာ “ဇြေယျကျဝ်ထေန်” ကီုရောၚ် ဂွံတီကေတ်ရ။
တဆိပ်ကြာ “ဝဏ္ဏကျဝ်ထေန်” ဝွံ ညးကၠောန်သ္ပရေၚ်တၠုၚ် သွက်ညးဍုၚ်ကွာန်ဂမၠိုၚ် သ္ဂောံခိုဟ်တိုန်မာန်ဂှ် ဇိုန်နှၚ်ကဵုတုဲ လ္ပာ်ပရေၚ်ပၞာန်မ္ဂးလေဝ် ညးယိုက်ဂၠေၚ်ဝန်ခိုဟ်ခိုဟ်တံ ဂှ် ဇိုန်နှၚ်ကဵုတဆိပ်ကြာ “ဇြေယျကျဝ်ထေန်” ကီုရ။
