စာ်စ္ဍးတိတ်နူဂၠံၚ်တရဴ NCA လိက်ကသုက်တုပ်စိုတ်ဒေံါပန်ပှော်အလုံဍုၚ်တုဲ ပါလုပ်ဆက်စပ်မံၚ်ကဵု ဒပ်ပံၚ်ကောံပၠန်ဂတးတၞဟ်တၞဟ် ကေုာံ KNU ဂှ်ရ က္ဍိုပ်သ္ကိုပ်ဂကောံ (၂) တၠဏံ တးပဲါထောံရဂှ် ညးတာလျိုၚ် ဒပ်ပၞာန် DKBA ဟီုကဵု IMNA ရ။

သ္ကိုပ်ဗိုလ်သဝ်ထိုအ်လွဳကဵု ဗိုလ်ဇၞော်သဝ်ကယေန်လေဝ် ညးတာလျိုၚ်နူတမ်ဒပ် စၟတ် (၉၁၅) သၟဝ်ဌာနကောပ်ကာဲပၞာန် DKBA စၟတ် (၁) ဂှ် တးပဲါထောံ နူဒပ်ပၞာန် DKBA ပေၚ်ပေၚ်ယျရောၚ် လလောၚ်ပ္တိတ်လဝ် ပ္ဍဲဂိတုမာတ် (၁၁) ဏံရ။

ညးတာလျိုၚ် အဆံၚ်သ္ကိုပ်ဗိုလ်ကဵု ဗိုလ်ဇၞော် (၂) တၠတံဂှ်ဝွံ မွဲကရောံကဵု ကောန်သဂံၚ်သၟဝ်တဲ (၅၀) တၠတံဂှ် ပံၚ်ကောံကဵု ဂကောံဒပ်ပၠန်ဂတးဂမၠိုၚ်တံဂှ်ရ သွက်သ္ဂောံတးပဲါထောံ နူကမ္မတဳရေၚ်တၠုၚ်ဗဟဵုဂှ် ဖျေံလဝ်သ္ဂုတ်သွာတ်ရောၚ် သ္ကိုပ်ဗိုလ်ဇၞော် DKBA သဝ်ဖာဗလက် ဟီုရ။

“နူကဵုဂကောံပိုဲဖျေံလဝ် အာမံၚ်အတိုၚ်ဂၠံၚ်တရဴ NCA ဂှ်တှေ် လ္တူပါလုပ်ဆေၚ်စပ်ကဵု ဂကောံပံၚ်ကောံဂှ်ရ ကမ္မတဳရေၚ်တၠုၚ်ဗဟဵုတံ ဂဇံကောံဓရီုတုဲ တးပဲါထောံရ။ ဆေၚ်စပ်ကဵု ဂကောံပံၚ်ကောံဂှ်တုဲ ဒးဟီုတှေ် လ္ပာ်ဏံကဵုအမိၚ်ဂှ်လေဝ် ဗီုကဵုဟွံဒုၚ်တဲမွဲသာ်၊ က္ဍိုပ်သ္ကိုပ်ဂကောံဂှ် ဟွံနွံမံၚ်သၟဝ်အမိၚ်ဒပ်မိရပုဟ်။ စွံလအ်လအ်တှေ် ဟွံပြေပြံၚ်ပုဟ်” သာ်ဝွံ ညးဟီုရ။

ပ္ဍဲကဵုဒၞာဲပေဲါဗ္တိုက်သ္ကာတ်မြဟ်ဒၟံၚ် အကြာဒပ်ပၞာန် မၞုံသ္ကုတ်သၠုၚ်ကျာဗြဝတဳကဵု ဒပ်ပၞာန်ဗၠးၜးကရေၚ် KNLA ဂှ်ဝွံ ညးတာလျိုၚ် (၂) တၠဏံ ပါလုပ်ဒၟံၚ် နဒဒှ်ဂကောံဒပ်ပၠတရဴမာန်ရောၚ် ဂးရ။

“ဂကောံဒပ်ပၠတရဴဟီုဂှ်တှေ် ဂကောံကြပ်ကြပ် နွံလ္ပာ်တေံဂှ်လေဝ် စန္ဒက်မာန်မံၚ်ဏောၚ်။ ဟိုတ်ဂှ်ရ ပါလေဝ် ပါအာမာန်ရ။ လွဟ်တံလေဝ် ပါအာကီုရ။ လ္တူဗဟဵုကေတ်အရေဝ် တးပဲါထောံဏံဂှ်တှေ် မုလေဝ်သက်ဟီုဟွံမွဲပုဟ်” သာ်ဝွံ ညးထပ်ဟီုရ။

ပ္ဍဲကဵုလိက်အမိၚ်လလောၚ်ပ္တိတ်လဝ်ဂှ်လေဝ် ညးက္ဍိုက်က္ဍိုပ်ပၞာန် အပ္ဍဲဂကောံ ကေုာံ ဒုညးက္ဍိုက်က္ဍိုပ်ပၞာန်ကီု သီုသ္ကိုပ်ကောပ်ကာဲ၊ သ္ကိုပ်ဗျူဟာကဵု ဌာနဆေၚ်စပ်သီုဖအိုတ်တံဂှ် တြးကဵုလဝ်သမ္တီကီု ဂွံဆဵုကေတ်ရ။

အကြာပဋိပက္ခရပ်လွဟ်ကဵု ပရေၚ်ဍုၚ်ကွာန်လၟုဟ်ဏံဂှ် ဂကောံ DKBA ဝွံ ဒတဴလိုၚ်ဒၟံၚ် အတိုၚ် NCA ကဵု ဒပ်ပၞာန်သီအဝဵုဂှ်ဖိုဟ်တုဲ ပ္ဍဲကဵုကမၠောန်ကျာဖျ အပ္ဍဲဒေသပယျဵုဂှ်လေဝ် ပံၚ်ကၠောန်ဒၟံၚ်ကဵု ကမ္မယှေန်ပၞာန်ဖိုဟ်ရောၚ် ဂွံတီကေတ်ရ။