နူတနေံဏအ် စနူဂိတုမာတ် စၟတ်တ္ၚဲ (၈) ပ္ဍဲသၚ်္ခဠၜုရဳ (ဝၚ်္က) နွံကြပ်ကဵုပယျဵုသေံဗၟာ ဒေသကျာ်ပိဂှ်ဝွံ ဟိုတ်နူညးဒေသတအ် ပၠံၚ်ရာန်ကေတ်မံၚ်ကၠေၚ်စက် ပ္ဍဲကဵုဒၞါဲဆေၚ်သွံတအ်ဂှ်ရ ညးတာလျိုၚ်ဗၠာဲသၟိၚ်သေံ မၞုံသၚ်္ခဠၜုရဳတအ် သၞောတ်ဗ္ၜတ်ကဵုသွံတြးကၠုၚ် ကၠေၚ်စက်အိုတ်ရောၚ် ဂွံတီကေတ်ရ။
ပ္ဍဲသၚ်္ခဠၜုရဳ (ဝၚ်္က) တ္ၚဲဏအ် ၜိုတ်အခိၚ်နူဂယး (၈) နာဍဳဂှ်ဝွံ ကွဳစက်၊ ကွဳသၠာပိ၊ ကွဳလိုန်ဓါတ်တအ် ပြေၚ်ရေၚ်ရာန်ကေတ်မံၚ် ကၠေၚ်ဓါတ်၊ ကၠေၚ်ဍေန်တအ် နွံဗွဲမဂၠိုၚ်တုဲ အတိုၚ်စၞောန်ညးတာလျိုၚ်အုပ်ဓုပ် သၚ်္ခဠၜုရဳတံဂှ်ရ သွံတြးမံၚ်ကၠေၚ်စက် ဒဳဇြေဝ်မွဲလဳတာဂှ် (၃၁.၉၁) ၝာတ်၊ ကၠေၚ်ဓါတ် (95) မွဲလဳတာ (၃၂.၈၂) ၝာတ်၊ ကၠေၚ်ဓါတ် (91) မွဲလဳတာ (၃၂.၄၂) ၝာတ် ကဵု ဗေန်ဇြေန်မွဲလဳတာ (၄၁.၄၁) ၝာတ်နွံရ။
အတိုၚ်သၞောဝ်အလဵုအသဳသေံတအ် ဖျေံလဝ်ဂှ်ရ “ကၠေၚ်ဓါတ်၊ ကၠေၚ်ဍေန်တအ် ဂွံပိုတ်သ္ကုတ်အာဂှ် ပရေၚ်သ္ဒးဒှ်ဓဝိၚ်ဟၟဲ သွံရာန်အာ ရုံရုံဂပ်ဂပ်ရရောၚ်’’ သာ်ဝွံ တၠဆေၚ်ကၠေၚ်တအ် ဂးရ။
ပြဟ်ဟ်ဏအ် ပ္ဍဲကဵုဒၞါဲဆေၚ်ကၠေၚ်ဗွဲမဂၠိုၚ်ဂှ်ဝွံ သွံတြးကဵုမံၚ် သွက်ကွဳစက်၊ ကွဳလိုန်ဓါတ် တအ် အတိုၚ်ဓမ္မတာရတုဲ ကွဳစက်မွဲဖ္ဍိုက်မ္ဂး သၞောတ်ဗ္ၜတ်လဝ် သွက် (၁၀၀၀) ၝာတ်၊ ညးကၠုၚ်ရာန်ကဵုဂါလန် စေဝ်ကၠေၚ်တအ် ညးမွဲတၠမ္ဂး (၂၀) လဳတာဟေၚ် သၞောတ်ဗ္ၜတ်သွံကဵုမံၚ်ရ။
ပ္ဍဲ(ဝၚ်္က) ဩၚ်မန်၊ ဩၚ်သေံဏံ “ဟိုတ်နူဆေၚ်ဍောတ်တ်လ္ၚဵုတအ် ကၟာတ်လဝ်ဆေၚ်တုဲ ကၠေၚ်စက်ဂွံစကာသုၚ်စောဲပိုတ်သ္ကုတ်မံၚ်ဂှ်ရ ညးလ္ၚဵုတအ် ဒှ်ဓဝိၚ်ကဵုကၠေၚ်အိုတ်တုဲ ကၠုၚ်စိုပ်ပြေၚ်ရေၚ်မံၚ် ပ္ဍဲဆေၚ်ပါန်နမာန်ကၠေၚ်ဂှ်ရောၚ်” သာ်ဝွံ ညးဒေသတအ် ဂးရ။
တုဲပၠန် ကွဳစက်ကာဂမၠိုၚ် ကိစ္စသွံရာန်တြးကၠေၚ်စက် ကၠတ်ထပၠုပ်ပ္တိတ်မံၚ် လ္ပာ်ဒေသပယျဵုသေံ-ဗၟာ ဒေသကျာ်ပိတေံ ဗွဲမဟွံလုပ်ကဵုသၞောဝ်တအ်ဂှ် ဒပ်ပၞာန်စၟဳစၟတ် တၞံပကုက်တအ် ပတေၚ်လဝ်ပရေၚ်ဂီုကၠီုတုဲ တၟာတ်တာဒၞါအာ တေၚ်တေၚ်ဂြတ်ဂြတ် ရောၚ် ဂွံတီကေတ်ရ။
ဟိုတ်နူပဋိပက္ခပၞာန် အေဿရေ ကဵု အဳရာန်တုဲ လ္ပါ်ကဵုအဳရာန်တအ် တၟာတ်ဒၞါတာလဝ် ပ္ၚံက်ၜဳဟဝ်မုဇ်ဂှ်ရ နူကဵုကၟိန်ဍုၚ်သေံ ဒေါံဇူကၟာတ်အာ ပရေၚ်သွံတြး ကၠေၚ်ဓါတ်၊ ကၠေၚ်ဍေန် ဇရေၚ်ဍုၚ်ဇိုၚ်ဝုတ်ဒိုဟ်ဂမၠိုၚ်ဂှ် သီုကၟိန်ဍုၚ်ဗၟာပါလုပ်ကီုရောၚ် ဂွံတီကေတ်ရ။
