ဂကောံဒပ်ပၞာန်ဗၟာတံ ဟိုတ်နူဗ္တိုက်ကဵု ၜၚ်ကျာ ကေုာံ ပ္ဍဲဗလးတိဂှ်ရ အပ္ဍဲဂိတုဖေဖဝ်ဝါရဳတုဲကၠုၚ်ဏံဝွံ အလုံမွဲဍုၚ် ညးဗြဴမနွံပဋိသန္ဓိပါလုပ်ကီု သီုဖအိုတ် ညးဗြဴ ဒးချိုတ်အာ (၆၀) တၠပြၚ်ရောၚ် သမဂ္ဂညးဗြဴဗၟာ BWU လလောၚ်ပ္တိ်တ်လဝ် နူတနေံဏံရ။
ပ္ဍဲကဵုလိက်လလောၚ် BWU ဂှ်ဝွံ ဟိုတ်နူဗ္တိုက်နကဵုၜၚ်ကျာတုဲ ညးဗြဴချိုတ် (၄၆) တၠ၊ နကဵုလွဟ်ဇၞော် (၈) တၠ၊ ညးဒးဒုၚ်ဂစိုတ်ဟွံဗဗွဲဓဝ် (၇) တၠ၊ ညးဒးကမ်လွဟ် (၂) တၠ ဒးချိုတ်အာနွံဂှ် ဓမံက်ထ္ၜးလဝ်ရ။
အပ္ဍဲကဵုညးဗြဴချိုတ်အာ (၆၃) တၠဂှ်ဝွံ ညးဗြဴမနွံပဋိသန္ဓိမွဲတၠလေဝ် ပါလုပ်တုဲ ညးဗြဴသၟဝ်အာယုက် (၁၈) သၞာံ ပါလုပ် (၁၈) တၠရ။
“ပ္ဍဲကဵုဗလးတိဂှ် ဂၠိုၚ်နူဏံမာန်မံၚ်ဏောၚ်။ ဍေံတံ ဗ္တိုက်ကဵုၜၚ်ကျာ ဂၠိုၚ်မံၚ်ဏောၚ်။ ကောန်ၚာ်ဍောတ်တ်တံ၊ ညးဗြဴမနွံပဋိသန္ဓိတံ၊ ညးဗြဴအာယုက်ဇၞော်တံ သွက်ဂွံဂြိပ်ပဲါဂှ် ခက်ခုဲရ။ ဟိုတ်ဂှ်ရ ညးတံ ဒးဒုၚ်ဂၠိုၚ်ရ” သာ်ဝွံ ညးတာလျိုၚ်နူသမဂ္ဂညးဗြဴ BWU မွဲတၠ ဟီုသွဟ်လဝ်ကဵု IMNA ရ။
ပ္ဍဲကဵုတွဵုရးဍုၚ်မန်ဂှ်လေဝ် နူတမ်ဒပ် (ခမရ – ၅၉၁) ဖျေံသဇိုၚ်ကွာန်ဘာ၊ ပွိုၚ်ဍုၚ်ရေဝ် ပန်ကဵုလွဟ်ဇၞော်ဂှ်ဝွံ ဒတုံခတိုဟ်ဒၟံၚ် ပ္ဍဲဗဒဲါပွဳဗွိုၚ်ကၠအ်ဂူဂှ်ရ ဂကောံသ္ၚိကၟိန်မွဲသ္ၚိ ဒးအာဘဲဝပ်မကမ်ဂှ်မ္ဂး အပါဂှ် ချိုတ်အာတုဲ မိ ကေုာံ ကောန်ဝုတ်ဂှ် ဒးအာဝပ် ဗွဲမသကာတ်မြဟ်ဏီရ။
အပ္ဍဲဂိတုဖေဖဝ်ဝါရဳတုဲကၠုၚ်ဏံ ပရူဒဒှ်ညးဗြဴဒးချိုတ်ဂၠိုၚ်အိုတ်ဂှ်ဝွံ ဟိုတ်နူဒပ်ပၞာန်ဗၟာ (ကမ္မယှေန်ပၞာန်) ထောံဖျေံဗမ် ပ္ဍဲကွာန်ယိုဝ်ၚူ၊ ပွိုၚ်ဍုၚ်ပုဏ္ဏာကျောန်၊ တွဵုရးရခေၚ် ပ္ဍဲဂိတုဖေဖဝ်ဝါရဳ (၂၄) ဂှ်တုဲ ညးဗြဴဒးချိုတ်အာ စဵုကဵု (၁၃) တၠရ။
တုပ်သာ်ဂှ်ကီု ဟိုတ်နူဂကောံပကီုပရာပ်ဒပ်ပၞာန်ဗၟာတံ ဗ္တိုက်ကဵုၜၚ်ကျာ၊ ပန်ကဵုလွဟ်ဇၞော်၊ မာၚ်တိုပ်တိ၊ ဒးဒုၚ်ပကီုပရာပ် ဆေၚ်စပ်ကဵုလိၚ် ကေုာံ ပဋိပက္ခဂမၠိုၚ်ဂှ်တုဲ ပ္ဍဲဂိတုဖေဖဝ်ဝါရဳတုဲကၠုၚ်ဏံဝွံ ညးဗြဴ စဵုကဵု (၆၆) တၠ ဒးအာဘဲဝပ်နွံရဂှ်လေဝ် ဓမံက်ထ္ၜးလဝ် ပ္ဍဲလိက်ဒုၚ်စဳရေၚ် BWU ရ။
အပ္ဍဲကာလဒပ်ပၞာန်ဗၟာသီအဝဵုဏံဝွံ သွက်ဂွံကၠောန်ဗဒှ် ပေဲါရုဲမာဲပတောံမာန်ဂှ်ကဵု သွက်သ္ဂောံကော်စၠတ်ထဝ်ဂှ် ဂိုတ်ဂ္စာန်ဒၟံၚ်ကီုလေဝ် မွဲလ္ပာ်ပၠန်ဂှ် ဆက်လုတ်လောန်မံၚ်ဒုဟ် ပရေၚ်ဖံက်ပကဝ်အခေါၚ်အရာမၞိဟ်ကဵု အမှုရာဇဝတ်ပၞာန်ရဂှ်လေဝ် ချူဓမံက်လဝ် ပ္ဍဲလိက်လလောၚ် BWU ဂှ်ကီုရ။
တုဲပၠန် ပ္ဍဲကဵုဘဝလၟေၚ်တ္ၚဲညးဗြဴဂမၠိုၚ်တံဂှ်လေဝ် ဟိုတ်နူပရေၚ်ပကီုပရာပ်လိၚ် ဆက်စပ်ကဵုပဋိပက္ခဂမၠိုၚ်၊ ဟိုတ်နူပရေၚ်ဖံက်ပကဝ်အခေါၚ်အရာမၞိဟ်နာနာဂှ်တုဲ ဒးဆဵုဂဗဒၟံၚ် ပရေၚ်ဆောံလေၚ်လမျီုလေဝ်နွံရ။
အပ္ဍဲပွိုၚ် (၅) သၞာံတုဲကၠုၚ်ဏံဂှ် အမှုပရေၚ်ပကီုပရာပ်ဆေၚ်စပ်ကဵုလိၚ်လ္တူညးဗြဴ နွံကၠုၚ် ဗဒဲါ (၁၀၀၀) တုဲ ဗွဲတၟေၚ်မ္ဂး ဂကောံဒပ်ပၞာန်ဗၟာတံဝွံ ကုညးဗြဴကောန်ဍုၚ်အရၚ်တံကဵု ညးအာယုက်ဟွံပေၚ်ဂမၠိုၚ်တံဂှ် သ္ပဒၟံၚ်ဗီုလွဟ်ပၞာန်တုဲ စွံပွန်ဗ္တိုက်မံၚ်ရဂှ်လေဝ် ဓမံက်ထ္ၜးလဝ် ပ္ဍဲလိက်ဒုၚ်စဳရေၚ် ဂအုပ်ဂကောံညးဗြဴ (ကၟိန်ဍုၚ်ဗၟာ – WLB – ၂၀၂၅) ရ။
