သၞာံ (၂၀၂၆) စနူဂိတုမာတ် စၟတ်တ္ၚဲ (၅) နူတနေံဏအ်ကဵု တ္ၚဲဏအ်ဝွံ ဗၠာဲသၟိၚ်သေံတအ် စၟဳစၟတ်ရပ်ဂွံ ကောန်ဍုၚ်ဗၟာ ကၠတ်လုပ်ဍုၚ်မလေဝ်ယှာ လၟိဟ်ဗ္ဒါဲ (၆၀) တၠနွံရောၚ် ဂွံဆဵုကေတ်ပရိုၚ်ရ။
ကောန်ဍုၚ်ဗၟာ ကၠတ်လုပ်ကၠုၚ်လ္ပါ်သေံ သွက်သ္ဂောံအာစိုပ် ဍုၚ်မလေဝ်ယှာတေံဂှ် ဒပ်မၚ်ဂီုကၠီုဗၠာဲသၟိၚ်သေံတအ် လုပ်စိုပ်စၟဳစၟတ် ပ္ဍဲခရိုၚ်သောၚ်ခလာ ဒၞါဲခဒမ်လဟိၚ်စိုတ်မွဲဒၞါဲဂှ် ရပ်စပ်ဂွံ ကောန်ဍုၚ်ဗၟာ လၟိဟ် (၄၁) တၠကဵု သီုဃံၚ်ထပၠုပ်မၞိဟ် (၇) တၠ ပါလုပ်မံၚ်ရ။
အပ္ဍဲကဵုမရပ်ဂွံ ညးကၠတ်လုပ်ဍုၚ်ဂမၠိုၚ်တအ်ဂှ်ဝွံ မၞိဟ်တြုံ၊ မၞိဟ်ဗြဴ သီုဖအိုတ် (၄၁) တၠ သီုပါလုပ်ကောန်ၚာ် အာယုက်အကြာ (၅) သၞာံကဵု (၁၀) သၞာံ (၂) တၠတုဲ ဃံၚ်စအကြာပၠုပ်မၞိဟ် ကောန်ဍုၚ်ဗၟာ (၂) တၠကဵု ကောန်ဍုၚ်သေံ (၅) တၠ ပါလုပ်မံၚ်ရ။
တ္ၚဲဏအ် ဂိတုမာတ် စၟတ်တ္ၚဲ (၆)၊ ပ္ဍဲအကြာကမ္မရဳကဵု သုဖါန်ၜုရဳဂှ်ဝွံ ဗၠာဲသၟိၚ်သေံတအ် ထပ်ရပ်ဂွံ ကောန်ဍုၚ်ဗၟာ ကၠတ်လုပ်ဍုၚ်မလေဝ်ယှာ (၁၆) တၠ ကဵု ညးဍိုက်ပါဗက် ပ္ဍဲကွဳစက်ဂှ် (၅) တၠနွံရောၚ် ဂွံတီကေတ်ရ။
ကောန်ဍုၚ်ဗၟာ ကၠတ်လုပ်ဍုၚ်မလေဝ်ယှာတအ်ဝွံ ဒးကဵုစရိတ်ဂၠံၚ် ကုဃံၚ်ထပၠုပ်မၞိဟ်တအ် ညးမွဲတၠမ္ဂး ဩန်သေံ အကြာ (၃၅၀၀၀) ၝာတ် ကဵု (၅၀၀၀၀) ၝာတ်နွံတုဲ သွက်ဂွံဆက် လုပ်အာ ဍုၚ်မလေဝ်ယှာတေံပၠန်ဂှ် ဒးကဵုကၠုၚ်ဩန် အကြာ (၅) လက်ၝာတ်ကဵု (၁) ကိုဋ်ၝာတ်ရ။
အတိုၚ်သၞောဝ်ဥပဒေ ကၟိန်ဍုၚ်သေံမ္ဂး ဃံၚ်ထပၠုပ်မၞိဟ်ကီု ကောန်ဍုၚ်ဗၟာကၠတ်လုပ်ဍုၚ် ဟွံလုပ်ကဵုသၞောဝ်တအ်ကီုဂှ် ရပ်ထိၚ်လဝ် ဒၞါဲရုၚ်ညးတာလျိုၚ်ဗၠာဲသၟိၚ်သေံတအ်တုဲ ဆက်စၟဳစၟတ်ကေတ်မံၚ်အရေဝ်နွံရောၚ် ဂွံတီကေတ်ရ။
ပ္ဍဲကၟိန်ဍုၚ်သေံ ဇၟာပ်ဒေသခရိုၚ်ဂှ် ဗၠာဲသၟိၚ်သေံတအ် ပတေၚ်လဝ်ပရေၚ်ဂီုကၠီုတုဲ အကြာမွဲၜါတ္ၚဲဏအ် စၟဳစၟတ်ရပ်စပ်ဂွံမံၚ် ကောန်ဍုၚ်ဗၟာ ကၠတ်လုပ်ဍုၚ်သေံကီု ညးကၠတ်လုပ်ဍုၚ်မလေဝ်ယှာကီု အဆက်က်နွံကၠုၚ်တုဲ သရောပ်မ္ဂး ပွိုၚ် (၂) တ္ၚဲဏအ် လၟိဟ်ဗ္ဒါဲ (၁၀၀) တၠ နွံကၠုၚ်ယျရောၚ် ဂွံတီကေတ်ရ။
ဗီုရုပ်တၚ်နၚ်ပရိုၚ် – (โจโฉ)
