ကၠေၚ်စက်သ္ဂောံလုပ်စိုပ် အပ္ဍဲဒေသလှာဒကှ်၊ တွဵုရးကရေၚ်ဂှ်ဝွံ ပရေၚ်စၟဳစၟတ် သၞောတ်ဗ္ၜတ်နွံဂှ်ရ ကၠေၚ်ပိုတ်သ္ကုတ်မံၚ်တုဲ မွဲလဳတာဂှ် ၚုဟ်သၠုၚ်တိုန်အာ စဵုကဵု (၁) ဠက်ဒကေဝ်ပြၚ်ရောၚ် ဂွံတီကေတ် နူညးဒေသတံရ။
ကၠေၚ်ဓာတ်ပါ်ပရအ်အရၚ် နူသၞေဟ်ဒုၚ်ၜဝ်ဂှ်ဝွံ ကိုပ်ကၠာတေံ နကဵုဓဝ်ကၠိုဟ်ခၠၚ်ဟေၚ် ပၠောပ်ဏာဒၟံၚ် လ္ပာ်လှာဒကှ်ကီုလေဝ် သၟာၚ်နူကၠေၚ်ပါ်ပရအ် အရၚ်တွဵုရးဍုၚ်မန် ဂွံဟွံလောဲကၠုၚ်ဂှ်မ္ဂး ကၠေၚ်စက်ညံၚ်ဟွံဂွံစိုပ် ဇရေၚ်ဒပ်ပၠန်ဂတးဂမၠိုၚ်ဂှ် နူကမ္မယှေန်ပၞာန်တံ သၞောတ်ဗ္ၜတ်မံၚ်ဂှ်ရ ပ္ဍဲပွိုၚ်ဍုၚ်လှာဒကှ်ဂှ် ကၠေၚ်ပိုတ်သ္ကုတ်မံၚ်ရောၚ် ဂွံတီကေတ်ရ။
ပ္ဍဲပွဳဗွိုၚ်ဍုၚ်လှာဒကှ်ဂှ်ဝွံ ဆေၚ်ကၠေၚ်ဟွံအောန်နူ (၆) ဆေၚ် ကၠေၚ်ဓာတ်ပိုတ်သ္ကုတ်မံၚ်ဂှ်ရ ဒးတၟာတ်လဝ်ဖိုဟ်တုဲ နူကဵုဆေၚ်ကၠေၚ်ဓာတ်သှေ်သၟေဟ်တံဂှ် မွဲလဳတာမ္ဂး နူကဵု (၈၀၀၀) ဒကေဝ် စဵုကဵု (၁၀၀၀၀) ဒကေဝ် ဒးရာန်စကာမံၚ်ရဂှ် ညးဗြဴဒေသဝေသာလဳမွဲတၠ ဟီုရ။
“လ္ပာ်ပိုဲဂှ် ဆေၚ်ကၠေၚ်ဇၞော်ဇၞော် နွံၜိုတ် (၆) ဆေၚ်ရ။ ကြပ်သီုဖအိုတ်ဂှ် ကၠေၚ်ပိုတ်သ္ကုတ်မံၚ်ရ။ နူကဵုမုဟ်ဍုၚ် ရာန်နၚ်ဂွံတှေ် သွံပ္တိတ်ကဵုညိညရ။ ကၠေၚ်ဓာတ်ပိုတ်ဂှ် ပရေံအိုတ်ရ။ သီုဖအိုတ် ဒးစကာမံၚ်ကၠေၚ်တှေ်။ ကွဳစက်ဂြိပ်မံၚ် နူလှာဒကှ် – ကျာ်ပိဂှ် ၜိုတ်ကဝက် ရုံရ။ လ္ပာ်တၟံဗြဴဂှ် အာဂွံကီုလေဝ် ကေၚ်အာမံၚ်တွဵုဟွံသေၚ်တှေ် ခက်ခုဲဂၠိုၚ်ဟာ” သာ်ဝွံ ညးဟီုရ။
သၞေဟ်ကၚ်စၟဳစၟတ်အၜေတ်ဂှ်ဝွံ စပ္တံနူဂိတုဖေဖဝ်ဝါရဳသတ္တဟပထမတုဲကၠုၚ်တေံ သၞောတ်ဗ္ၜတ်ထောံ အခေါၚ်ပၠောပ်ကၠေၚ်စက် ဇရေၚ်ဍုၚ်လှာဒကှ်တုဲ အခိၚ်လၟုဟ်ဏံဝွံ နူကဵုဒဒန်ထီုမၠဵုမွဲတဆံၚ် ကွဳစက်ဖ္ဍိုက်ကၠေၚ်စက် အာလ္ပာ်မွဲဂြောဝ်ဂှ်လေဝ် ရပ်စပ်မံၚ်ရောၚ် ညးဒဳကွဳစက်မွဲတၠ ဟီုရ။
“ပ္ဍဲကဵုအၜေတ်ဂှ် ဍေံတံ ဟွံကဵုပ္တိုန်ပုဟ်။ ဟွံကဵုအာ လ္ပာ်မန်ပုဟ်။ တွဵုရးကရေၚ်ဟီုတှေ် ဒးအာကေတ်ကၠေၚ်လ္ဂုၚ်ဏောၚ်။ ဆဂး ကၠေၚ်တံဂှ် ဂွိၚ်ဖေက်စိုပ်အာ ဇရေၚ်ဂကောံပၠန်ဂတး။ ဆေၚ်ကၠေၚ်ဇၞော်ဇၞော်တံလေဝ် ဟွံဂွံမံၚ်ကၠေၚ်ပုဟ်။ အရိုဟ်လန်ဂှ်တှေ် ဂွံမံၚ်ပါ်ပရအ်အရၚ် နူမုဟ်ဍုၚ်ရ။ ဗွဲကြဴဏံ က္ၜၚ်ကၠေၚ်ဟွံစိုပ်တုဲ ဍေံတံလေဝ် ဟွံပါ်ပရအ်ကဵုကၠေၚ်ရပုဟ်” သာ်ဝွံ ညးဟီုရ။
တုပ်သာ်ဂှ်ကီု ပွိုၚ်ဍုၚ်ကအ်ကြိက် ဒးပတှေ်ဒၟံၚ်ကၠေၚ်စက်ပၠောပ်နူဗြဝတဳဂှ်လေဝ် ဗွဲကြဴနူကၟိန်ဍုၚ်သေံတၟာတ်ထောံ အခေါၚ်ရာန်ကၠေၚ်စက်တုဲဂှ် နူမတ်မလီုမွဲတဆံၚ် နဲဂွံဂှ်ဒးပၠောပ်ရာန်ကေတ်မံၚ်တုဲ ၚုဟ်ကၠေၚ်က္ဍၚ်တိုန်မံၚ်ရောၚ် ညးဒေသကအ်ကြိက်မွဲတၠ ဟီုရ။
“ၚုဟ်က္ဍၚ်မံၚ်၊ ကွဳစက်အာမတ်မလီုတံ ပ္တိတ်သွံရ။ ဒးရာန်အေနူဂှ်ရ။ ဆေၚ်ကၠေၚ်ဇၞော်ဇၞော် ပ္ဍဲကအ်ဗိန်ဟီုတှေ် တၟာတ်ထောံအိုတ်ရ။ ကွဳလိုန်ဓာတ် အာကၠုၚ်အောန်ရ။ သၠာပိတံလေဝ် အာကၠုၚ်အောန်ရ။ ကပေါတ်စသုၚ်စကာပါၚ်ဖဴတံ ၚုဟ်တိုန်ရ။ ကနူၜဳတံ၊ ၚုဲတံ ၚုဟ်တိုန်ရ။ (ပဲပြား) ဂှ်လေဝ် တိုန်အာ (၅၀၀)” သာ်ဝွံ ညးဟီုရ။
ဟိုတ်နူကၠေၚ်စက်အောန် ကေုာံ ဒးရာန်ၚုဟ်က္ဍၚ်ဂှ်ရ စရိတ်ဍိုက်ကွဳစက် မတ်မလီု – လှာဒကှ်ဂှ် ၚုဟ်သၠုၚ်တိုန်အာ စဵုကဵု (၁၂၀၀၀၀) ဒကေဝ်တုဲ ကံက်ကေတ်ဒၟံၚ် နကဵုသြန်သေံ ၜိုတ် (၁၀၀၀) ၝာတ်ရဂှ် ညးဒဳကွဳစက်မွဲတၠ ဟီုရ။
အခိၚ်လၟုဟ်ဏံဝွံ ဟိုတ်နူသၞောတ်ဗ္ၜတ် ပရေၚ်ဖ္ဍိုက်ပလံၚ်ကၠေၚ်ဓာတ် ကေုာံ ပရေၚ်သွံရာန်ဂှ်ရ ဒးပတှေ်ဒၟံၚ် ဗွဝ်ဖျာဒမၠုက်တုဲ သွက်ညးဍုၚ်ကွာန်၊ ညးဒေသ အဆံၚ်သဇိုၚ်တံ သကဵုဒှ်ခက်ခုဲဂၠိုၚ်အာရ။
