ပ္ဍဲပေဲါကောံဓရီုစၠတ်ထဝ်တွဵုရးဍုင်မန် ဂိတုမာတ် (၂၀) ၊ တ္ၚဲဏံဝွံ ဒၞာဲဥက္ကဌစၠတ်ထဝ်ဂှ် ရုဲစှ်ဏာ ဥူတိတ်ထိုဲ နူဗော်ကျခါင်ယျေ ကေုာံ ဒၞာဲဒုဥက္ကဌဂှ် ရုဲစှ်ဏာ ဥူမေန်အောင်မျေအ်တုဲ ညး (၂) တၠ နူဗော်ကျခါင်ယျေဏံဝွံ ညးပြိုင်ပ္ကာန်ဟွံမွဲမွဲသာ် ရုဲစှ်ခါန်ကၞက်ဏာလဝ်ရောင် ဂွံတီကေတ်ရ။
ဥူတိတ်ထိုဲဝွံ ပ္ဍဲကဵုပေဲါရုဲမာဲ နကဵုသ္ကုတ်တုဲကၠုင်ဏံဂှ် လုပ်ပြိုင်ပ္ကာန်လဝ် ပ္ဍဲဆန္ဒမာဲမတ်မလီု နဒဒှ်ညးစၞးဗော်ကျခါင်ယျေတုဲ ဥူမေန်အောင်မျေအ်ဂှ်လေဝ် လုပ်ပြိုင်ပ္ကာန်လဝ် ပ္ဍဲဆန္ဒမာဲ ပွိုင်ဍုင်ကျာ်မြဟ် နဒဒှ်ညးစၞးဗော်ကျခါင်ယျေမွဲတၠကီုရ။
ပ္ဍဲပေဲါကောံဓရီုစၠတ်ထဝ်တွဵုရးဍုင်မန် ဂိတုမာတ် (၂၀) တ္ၚဲဏံဝွံ ပ္တိုန်စရင်သွက်ဂွံဒုင်ရုဲစှ် ဒၞာဲသဘာပတိ ဒှ်အာညးၜါတၠဂှ်ရ နကဵုသၞောတ်သ္ဂုတ်သွာတ်ပါ်မာဲဂှ် ဥူအောင်ကျဳတုင် ဂွံဒုင်ရုဲစှ်ဏာ နဒဒှ်သဘာပတိတုဲ လၟေင်ကမၠောန်ရုဲစှ် ဥက္ကဌစၠတ်ထဝ်ကဵု ဒုဥက္ကဌဂှ်လေဝ် နူကဵုသဘာပတိ ကၠောန်သ္ပရေင်တၠုင်ဏာရ။
ပေဲါကောံဓရီုစၠတ်ထဝ်တွဵုရးဍုင်မန်ဝွံ ညးစၞးနူဗော်ကျခါင်ယျေ (၁၁) တၠ၊ ညးစၞးဒပ်ပၞာန် (၈) တၠ၊ ညးစၞးဗော်ညဳသၟဟ်မန် (၇) တၠကဵု ညးစၞးဗော်ညဳသၟဟ်ကောန်ဍုင်အရင်၊ ဗော်ညးဍုင်ကွာန်၊ ဗော်ပၠတရဴညးဍုင်ကွာန်၊ ဗော်တောတက်ဖောအ်ဗြေဝ်ပအိုဝ် ကေုာံ ဗော်တောတက်ဂုန်ဖဵုပိုန်ဒြပ်ကောန်ဂကူတံ ညးစၞးမွဲမွဲတၠ တိုန်စိုပ်လဝ်ရောင် ဂွံတီကေတ်ရ။
ပ္ဍဲစၠတ်ထဝ်တွဵုရးဍုင်မန်ဝွံ ဗော်ညဳသၟဟ်မန် ကလိဂွံလဝ်ညးစၞးဒုတိယဂၠိုင်အိုတ်ဂှ် ဟွံလုပ်ပြိုင်ပ္ကာန် ပ္ဍဲဒၞာဲညးဇမၞော်စၠတ်ထဝ်ကီုလေဝ် ပ္ဍဲဂကောံအလဵုအသဳတွဵုရးဂှ်မ္ဂး သ္ဂောံပါလုပ် ပ္ဍဲအခန်ကဏ္ဍကိစ္စဇၞော်ဂှ် တင်စၟဳစနွံမင်ရောင်ဂှ်လေဝ် အခိင် IMNA သၟာန်သၟုက်လဝ်ကၠာတေံဂှ် ဟီုဂးလဝ်နွံရ။
ပ္ဍဲဂိတုမာတ် (၃၀) ဏံမ္ဂး သွက်ဂွံရုဲစှ်ပ္တိုန် သမ္မတ ကေုာံ ဒုသမ္မတမာန်ဂှ် စကၠောန်ဗဒှ်အာ ပေဲါကောံဓရီုစၠတ်ထဝ်ကၟိန်ဍုင်ရောင် ဂွံတီကေတ်ရ။
